ەركىن كۇرەستەن قازاقستان كومانداسىنىڭ باس باپكەرى ماديار قۇرامىسوۆ مامىر ايىندا ستامبۋلدا (تۇركيا) وتەتىن سوڭعى ليسەنزيالىق جارىسقا كىمدەردىڭ قاتىساتىنىن ايتتى، دەپ حابارلايدى almaty-akshamy.kz olympic.kz-كە سىلتەمە جاساپ.
باس باپكەردىڭ ايتۋىنشا، الەمدىك ليسەنزيالىق تۋرنيرگە باراتىن سپورتشىلار تۇركيادا وتكەن "ياشار دوگۋ" تۋرنيرىندە انىقتالعان.
"ءبىز ازيا ايماقتىق ليسەنزيالىق ءتۋرنيرى باستالماي تۇرىپ، جولداما بولماعان جاعدايدا، سوڭعى ىرىكتەۋدە كىمدەردىڭ كۇرەسەتىنىن بەلگىلەپ قويدىق. "ياشار دوگۋ" حالىقارالىق ءتۋرنيرىنىڭ قورىتىندىسىن نازارعا الامىز. ءقازىر بىزدە 3 سالماقتا جولداما جوق.
سوندىقتان، ستامبۋلداعى سوڭعى تۋرنيرگە تومەندەگى بالۋاندار قاتىسادى:
57 كەلى: راحات قالجان؛
65 كەلى: ادلان اسقاروۆ؛
74 كەلى: تالعات سىرباز.
جولدامانى كىم جەڭىپ الادى، سول وليمپياداعا بارادى"، - دەدى باس باپكەر.
كۇرەس تۇرلەرىنەن سوڭعى ليسەنزيالىق جارىس 8 مامىردا باستالادى. ال بىشكەكتە وتكەن ليسەنزيالىق تۋرنيردە الىشەر ەرعالي (97 كەلى) مەن يۋسۋپ باتىرمۇرزايەۆ، سەربياداعى الەم چەمپيوناتىندا ازامات داۋلەتبەكوۆ (86 كەلى) جولداما يەلەنگەن.