الماتىدا دارىگەرلەر سيرەك كەزدەسەتىن پاتولوگياسى بار جاڭا تۋعان سابيگە ءساتتى وتا جاسادى
الماتىداعى بالالار شۇعىل مەديسينالىق كومەك كورسەتۋ ورتالىعىندا مەديسينا تاريحىنا ەنەتى وقيعا تىركەلدى. قازاقستاندىق دارىگەرلەر الەمدە سيرەك كەزدەسەتىن – نەبارى 30 رەت قانا تىركەلگەن پاتولوگيا بويىنشا سابيگە ءساتتى وتا جاسادى، دەپ حابارلايدى aqshamnews.kz.
جاڭا تۋعان نارەستە ومىرگە كەلگەن ساتتەن باستاپ وزدىگىنەن تىنىس الا الماعان. بەت پەن مويىن تۇسىندا كولەمى 4ح4 سم بولاتىن وسكىن تىنىس جولدارىن جاۋىپ، ونىڭ ومىرىنە تىكەلەي ءقاۋىپ توندىرگەن. دارىگەرلەردىڭ ايتۋىنشا، بالانىڭ جاعدايى باستاپقىدا وتە اۋىر بولعان. ول ءار دەمىندە ءومىر ءۇشىن ارپالىستى.
نارەستە اۋرۋحاناعا ارنايى ينكۋباتورمەن جەتكىزىلىپ، بىردەن جاساندى تىنىس الۋ اپپاراتىنا قوسىلدى. العاشىندا وسكىن ليمفانگيوما بولۋى مۇمكىن دەگەن بولجام ايتىلدى. الايدا كەيىنگى زەرتتەۋلەر ونىڭ ومىرلىك ماڭىزى بار جۇيكە مەن قان تامىرلارىنا اسەر ەتكەنىن كورسەتتى.
ورتالىقتىڭ دارىگەرلەرى بىرنەشە كونسيليۋم وتكىزىپ، ءاربىر قادامدى مۇقيات جوسپارلاپ، وتا جاساۋ تۋرالى شەشىم قابىلدادى. ەكى ساعاتقا سوزىلعان كۇردەلى وپەراسيا ءساتتى ءوتىپ، نارەستە العاش رەت وزدىگىنەن ەركىن تىنىس الدى.
وتادان كەيىنگى گيستولوگيالىق زەرتتەۋ ناتيجەسى دارىگەرلەردى تاڭعالدىردى: ىسىك دەپ ويلاعان ءتىن – مي ءتىنى بولىپ شىقتى. بۇل – گەتەروتوپيالىق مي ءتىنى دەپ اتالاتىن، ەمبريون دامۋ كەزىندە مي جاسۋشالارىنىڭ باس سۇيەك سىرتىندا ورنالاسۋىنان تۋىندايتىن اسا سيرەك انوماليا. دۇنيەجۇزىلىك تاجىريبەدە مۇنداي جاعدايلار تەك 30 رەت قانا تىركەلگەن.
– بۇل مەديسينالىق تۇرعىدا عانا ەمەس، ادامي تۇرعىدا دا ۇلكەن جەتىستىك، – دەيدى ورتالىق ديرەكتورى الىبەك سماعۇلوۆ. – ءسابيدىڭ ءومىرى عانا ەمەس، دەنساۋلىعى دا ساقتالىپ قالدى.
بۇگىندە ءسابي وزدىگىنەن دەم الىپ، ەمۋدى ۇيرەنىپ، ۇيىنە شىعارىلعان. دارىگەرلەر ونىڭ تولىق ساۋىعاتىنىنا سەنىمدى.
ايتا كەتەيىك، 2024 جىلى ورتالىقتا دامۋ اقاۋى بار 49 جاڭا تۋعان نارەستەگە وتا جاسالعان. ال بيىلعى جىلدىڭ باسىنان بەرى 24 ءسابي پەرزەنتحانادان جەدەل كومەكپەن جەتكىزىلىپ، دەر كەزىندە مەديسينالىق كومەك العان.
ەسكە سالا كەتەيىك، بۇعان دەيىن مەديسينا سالاسىندا سيرەك كەزدەسەتىن بەس ماماندىق جايلى جاريالاعان ەدىك.