بۇل تۋرالى ءماجىلىستىڭ جالپى وتىرىسىنان كەيىن قارجى ۆيسە-مينيسترى ەرجان ءبىرجانوۆ ءمالىم ەتتى، دەپ حابارلايدى aqshamnews.kz.
— سالىق كودەكسىنە سايكەس، سالىق بەرەشەگى سالىقتىق قۇپياعا جاتپايدى. سالىق تولەمەي جۇرگەن بورىشكەرلەردىڭ ءتىزىمىن جاريالايمىز. ءتىزىمدى سايتىمىزعا ورنالاستىرا الامىز، — دەدى ول.
ونىڭ اتاپ وتۋىنشە، ەندى سالىق ورگاندارى بيزنەستىڭ بولماشى سالىق سوماسى ءۇشىن بۇكىل قىزمەتىنە توسقاۋىل قويمايدى. ءادىس وزگەرەدى.
— بۇرىنىراق زەينەتاقى نە الەۋمەتتىك تولەمدەر بويىنشا 100 تەڭگە بورىش بولعان جاعدايدا ەسەپشوت بۇعاتتالاتىن. ءقازىر سالىق بويىنشا شەكتى 20 اەك-تەن جوعارى، بۇل شامامەن 80 مىڭ تەڭگە، قايتا قارادىق. وعان دەيىن جاي عانا حابارلاندىرۋ جىبەرىلەدى. بورىشىڭىز بار ەكەنىن، سىزگە ءوسىمپۇل ەسەپتەلەتىنىن ەسكەرتەمىز. كەلەسى قادام - 20-دان 45 اەك-كە دەيىن، 180 مىڭ تەڭگەگە دەيىن ءبىز ينكاسساسيالىق وكىم بانكىڭىزگە قويىلاتىنىن، سالىقتى تولەۋ قاجەتتىگىن ايتامىز. ەگەر ول اتالعان سومانى تولەمەسە، وندا مۇلىكتى تىزىمگە الۋ جانە ونى ساتۋ جۇزەگە اسىرىلادى. سانكسيا سالىق مولشەرىنە قاراي قولدانىلادى. بولماشى سوماعا بولا بانكتىك ەسەپشوت بۇعاتتالمايدى، — دەدى ەرجان ءبىرجانوۆ.