ەرمەك قوجامسۇگىروۆ،
الماتى قالاسى قوعامدىق كەڭەسىنىڭ بەلسەندى مۇشەسى، اتوم ەنەرگەتيكاسى بويىنشا ساراپشى:
كونستيتۋسيالىق رەفورمالار جونىندەگى كوميسسيانىڭ العاشقى وتىرىسى – ەلدىڭ ساياسي-قۇقىقتىق دامۋى جولىنداعى ايرىقشا مانگە يە كەزەڭنىڭ باستالۋى. بۇل جيىن فورمالدى باستاما عانا ەمەس، مەملەكەتتى باسقارۋ جۇيەسىن جاڭعىرتۋعا باعىتتالعان تەرەڭ ينستيتۋسيونالدىق وزگەرىستەردىڭ ناقتى باستالعانىن كورسەتەدى.
جاڭا قازاقستان دۇنيەجۇزىندەگى ساياسي وزگەرىستەرگە دايىن بولۋى كەرەك. كونستيتۋسيالىق رەفورمالار جونىندەگى كوميسسيا ەل نازارىنداعى باستى ماسەلەلەردى شەشۋگە ۇمتىلادى. ويتكەنى ناعىز ازاماتتىق قوعامنىڭ كوكەيكەستى سۇراقتارى تەك زاڭنامالىق تۇرعى ارقىلى شەشىلەدى. ءماجىلىس – سەنات – مينيسترلىك اراسىنداعى تالقىلاۋ جەڭىلدەپ، زاڭ قابىلداۋ پروسەسى جەدەلدەيدى. ءبىر پالاتالى پارلامەنتتىك رەفورما سەنات پەن ءماجىلىس اراسىنداعى بۇرىننان قالىپتاسقان ۇساق كەلىسپەۋشىلىكتەردى شەشەدى.
العاشقى وتىرىستىڭ باستى ماڭىزى – رەفورمالاردىڭ باعىت-باعدارىن ايقىنداپ، كونستيتۋسيالىق وزگەرىستەردىڭ تۇجىرىمدامالىق نەگىزىن قالىپتاستىرۋىندا. كوميسسيا قۇرامىنا ءارتۇرلى سالا وكىلدەرىنىڭ – زاڭگەرلەردىڭ، ساياساتتانۋشىلاردىڭ، ازاماتتىق قوعام مەن عىلىمي قاۋىمداستىقتىڭ قاتىسۋى ۇسىنىلىپ وتىرعان باستامالاردىڭ ءبىرجاقتى ەمەس، جان-جاقتى ءارى قوعامدىق مۇددەنى ەسكەرەتىن سيپاتتا بولۋىنا مۇمكىندىك بەرەدى.
بۇگىندە قازاقستاندا 8 پارتيا بار، ءبىراق ەلدەگى پارتيا سانى ەكەۋ بولعان دۇرىس. ال ءار پارتيانى مەملەكەت قارجىلاندىرۋ كەرەك. ايتپەسە، بيزنەس وكىلدەرى مەن شەتەلدىك كومپانيالار ساياسي پارتيالاردى قارجىلاندىراتىن بولسا، ولار ءوز مۇددەلەرىن ويلاپ، كونستيتۋسيالىق قاۋىپسىزدىگىمىز بۇزىلۋى ىقتيمال.
بۇل كەزەڭدە ەڭ ماڭىزدىسى – كونستيتۋسيانى «تۇزەتۋ وبەكتىسى» رەتىندە ەمەس، قوعام مەن مەملەكەت اراسىنداعى قوعامدىق كەلىسىمنىڭ «ءتىرى» قۇجاتى رەتىندە قاراستىرۋ. ياعني، رەفورمالار بيلىك ينستيتۋتتارىنىڭ ءوزارا تەپە-تەڭدىگىن كۇشەيتۋگە، ادام قۇقىقتارىن قورعاۋ تەتىكتەرىن ناقتىلاۋعا جانە جەرگىلىكتى ءوزىن-وزى باسقارۋدىڭ ءرولىن ارتتىرۋعا باعىتتالۋى ءتيىس.
سونداي-اق العاشقى وتىرىس اشىقتىق پەن ديالوگ قاعيداتتارىنىڭ ساقتالاتىنىن اڭعارتتى. ەگەر كوميسسيا جۇمىسى الداعى ۋاقىتتا دا قوعامدىق پىكىرگە سۇيەنىپ، ساراپتامالىق تالداۋلارعا نەگىزدەلسە، بۇل رەفورمالاردىڭ لەگيتيمدىلىگى مەن ۇزاقمەرزىمدى تيىمدىلىگىن قامتاماسىز ەتەدى.
كونستيتۋسيالىق كوميسسيانىڭ العاشقى وتىرىسى – قۇقىقتىق مەملەكەت قۇرۋ جولىنداعى ساياسي ەرىك پەن قوعامدىق سۇرانىستىڭ توعىسقان تۇسى. ەندىگى مىندەت – وسى باستامانى مازمۇندى، ساپالى جانە ناقتى ناتيجەلەرگە جەتكىزۋ.