راحمان الشانوۆ،
«تۇران» ۋنيۆەرسيتەتىنىڭ رەكتورى، قازاقستان جوو قاۋىمداستىعىنىڭ پرەزيدەنتى، قوعام قايراتكەرى:
كونستيتۋسيالىق رەفورمالار جونىندەگى كوميسسيانىڭ العاشقى وتىرىسى ەلدىڭ ساياسي، الەۋمەتتىك، ەكونوميكالىق ءارى قۇقىقتىق دامۋى ءۇشىن اسا ماڭىزدى ەكەنىن اڭعارتقانداي. سەبەبى كونستيتۋسيا – مەملەكەتتىڭ تەك نەگىزگى زاڭى عانا ەمەس، قوعامنىڭ دامۋ باعىتىن ايقىندايتىن، ازامات پەن بيلىك اراسىنداعى سەنىمنىڭ قۇقىقتىق ىرگەتاسى.
كەز كەلگەن رەفورمانىڭ كونستيتۋسيادان باستالۋى زاڭدى. ويتكەنى ءدال وسى قۇجاتتا مەملەكەتتىڭ قۇندىلىقتارى، بيلىك تارماقتارىنىڭ ءوزارا تەپە-تەڭدىگى، ازاماتتاردىڭ قۇقىقتارى مەن بوستاندىقتارىنىڭ كەپىلدىگى ايقىندالادى. قوعام وزگەرگەن سايىن، كونستيتۋسيا دا زامان تالابىنا ساي جەتىلدىرىلۋى ورىندى شىعار، ءبىراق قابىلدانعان زاڭ قايتا-قايتا وزگەرتىلمەۋى ءتيىس. كوميسسيانىڭ جۇمىسى وسى قاجەتتىلىكتەن تۋىنداپ وتىر.
العاشقى وتىرىستىڭ ماڭىزدىلىعى – رەفورمالاردىڭ فورمالدى سيپاتتا ەمەس، جۇيەلى ءارى تەرەڭ تالداۋ ارقىلى جۇرگىزىلۋىنە جول اشۋىندا. بۇل كەزەڭدە ەڭ باستىسى – كونستيتۋسيانىڭ قاعاز جۇزىندەگى نورمالارى ەمەس، ونىڭ ناقتى ومىردە قالاي جۇمىس ىستەيتىنىنە نازار اۋدارۋ. ياعني، ازاماتتاردىڭ قۇقىقتارىن قورعاۋ تەتىكتەرى، بيلىك ينستيتۋتتارىنىڭ جاۋاپكەرشىلىگى جانە زاڭ ۇستەمدىگىن قامتاماسىز ەتۋ ماسەلەلەرى الدىڭعى قاتاردا بولۋى قاجەت. سونىمەن قاتار، كونستيتۋسيا – ۇلتتىق بىرلىك پەن تۇراقتىلىقتىڭ باستى تىرەگى. ونى جاڭعىرتۋ قوعامدى بولەتىن ەمەس، بىرىكتىرەتىن ۇدەرىس بولۋى ءتيىس. سوندىقتان كوميسسيا جۇمىسىنا كاسىبي ساراپشىلارمەن قاتار، قوعامدىق پىكىردى ەسكەرۋ، اشىقتىق پەن ديالوگ قاعيداتتارىن ساقتاۋ اسا ماڭىزدى.
كونستيتۋسيالىق كوميسسيانىڭ العاشقى وتىرىسى – ەلدىڭ بولاشاق ساياسي ارحيتەكتۋراسىن ايقىندايتىن ماڭىزدى قادام. ەگەر رەفورمالار كونستيتۋسيانىڭ ءمانى مەن رۋحىن ساقتاي وتىرىپ جۇزەگە اسسا، بۇل قۇقىقتىق مەملەكەت قاعيداتتارىن نىعايتىپ، ازاماتتاردىڭ مەملەكەتكە دەگەن سەنىمىن ارتتىرا تۇسەدى.