ەلىمىزدىڭ ءاربىر تۇرعىنى «جاڭا قازاقستاندى» قۇرۋعا اتسالىسا الادى
ازاماتتاردىڭ ءوز ۇسىنىستارىن قازاقستاننىڭ «رۋحاني جاڭعىرۋ» قوعامدىق دامۋ ينستيتۋتىنىڭ رەسمي سايتىندا قالدىرۋىنا مۇمكىندىك جاسالدى، دەپ حابارلايدى Almaty-akshamy.kz Qazaqtv.com-عا سىلتەمە جاساپ.
بۇل تۋرالى ينستيتۋتتىڭ باسشىلىعى حابارلادى. قازاقستاندىقتاردىڭ ەلدى قايتا قۇرۋ جونىندەگى كوزقاراستارى دەنساۋلىق ساقتاۋ، ءبىلىم بەرۋ، ينفراقۇرىلىم، الەۋمەتتىك-ەكونوميكالىق پروبلەمالار سىندى كەڭ كولەمدى ماسەلەلەردى قامتۋى مۇمكىن.
«مۇنىڭ بارلىعى جالپىلانعان ۇسىنىستار تۇرىندە بولادى. سالالارعا، باعىتتارعا جانە وڭىرلەرگە بولىنەدى. ۇسىنىستاردى ايتۋ بارلىق ۋاقىتتا دا بولا بەرۋى كەرەك. سەبەبى حالىقتىڭ مۇڭ-مۇقتاجى، داۋىسى ءاردايىم ەستىلۋى، دىتتەگەن مەجەسىنە جەتۋى ءتيىس»، - دەيدى «رۋحاني جاڭعىرۋ» قازاقستاندىق قوعامدىق دامۋ ينستيتۋتى» كەاق باسقارما ءتوراعاسىنىڭ ورىنباسارى اسەم قايداروۆا.
«جاڭا قازاقستاندى» قۇرۋعا قاتىستى حالىق اراسىنداعى ۇسىنىستاردى جيناۋ، وڭدەۋ جانە ايتىلعان يدەيالاردى ءارى قاراي دامىتۋعا ارنايى ساراپشىلاردان تۇراتىن جۇمىس توبى اتسالىسادى. ونىڭ قۇرامىنا ساياساتتانۋشىلار، الەۋمەتتانۋشىلار، جۋرناليستەر، ازاماتتىق بەلسەندىلەر، عىلىمي-شىعارماشىلىق ينتەلليگەنسيا، سونداي-اق رەسپۋبليكانىڭ مەملەكەتتىك ورگاندارىنىڭ وكىلدەرى كىردى.
«مەملەكەت باسشىسى ديالوگ الاڭىن قۇرۋ، حالىقپەن قوعامدىق كەلىسىم قۇرۋ تۋرالى تاپسىرما بەردى. سونىڭ نەگىزىندە ءبىز حالىق اراسىنان، قازاقستان حالقىنان، قوعامدىق پىكىر كوشباسشىلارىنان، ساياساتتانۋشىلاردان، الەۋمەتتانۋشىلاردان، جۋرناليستەردەن يدەيالار-ۇسىنىستار جينايتىن توپ قۇردىق. حالىق ءۇنىن تىڭداپ، كەيىن ولاردىڭ شىعارعان ساراپتاماسىنا سايكەس انىقتاما دايىندالىپ، ول ءارى قاراي ۇكىمەتكە بەرىلەدى»، - دەيدى «رۋحاني جاڭعىرۋ» قازاقستاندىق قوعامدىق دامۋ ينستيتۋتى» كەاق باسقارما ءتوراعاسىنىڭ ورىنباسارى اسەم قايداروۆا.