الماتىنىڭ حالىققا قىزمەت كورسەتۋ ورتالىقتارىندا «حالىق ۇنىنە قۇلاق اساتىن مەملەكەت» قاعيداتىن ىسكە اسىرۋ شەڭبەرىندە اشىق ەسىك كۇندەرى وتۋدە، دەپ حابارلايدى Almaty-akshamy.kz قازاقپاراتقا سىلتەمە جاساپ.
الاتاۋ اۋداندىق حقو بولىمىندە وتكەن اشىق ەسىك كۇنىنە اۋداندىق پروكۋراتۋرا، تۇرعىن ءۇي باسقارماسى مەن جۇمىسپەن قامتۋ ءبولىمىنىڭ ماماندارى قاتىسىپ، تۇرعىنداردى قابىلدادى. جۇمىسسىزدىق، جاردەماقىنى راسىمدەۋ، تۇرعىن ءۇي كەزەگىن بەلگىلەۋ ماسەلەلەرى بويىنشا 40-قا جۋىق ازاماتتىڭ سۇراقتارى قارالىپ، ءار مەملەكەتتىك مەكەمە ءوز قۇزىرەتى شەگىندە ازاماتتاردىڭ ماسەلەلەرىن باقىلاۋعا الدى. كەيبىر تۇرعىنداردىڭ ماسەلەسى سول جەردە شەشىلدى.
«حقو-دان قىزمەت الۋعا كەلەتىن ازاماتتاردىڭ قۇجاتتارىن قابىلداۋ بارىسىندا كەلەڭسىزدىكتەرگە تاپ بولىپ جاتامىز. قۇجاتتارىن دۇرىستاپ اكەلۋدى وتىنسەك، «اۋرە-سارساڭعا سالدىڭ» دەپ كليەنتتەر رەنجىپ جاتادى. مىناداي قابىلداۋلار، كليەنتتەردىڭ ماسەلەلەرىن دەر كەزىندە، اۋرە-سارساڭسىز بىتىرۋگە سەپتىگىن تيگىزەدى»، - دەدى الاتاۋ اۋداندىق ءبولىمىنىڭ باسشىسى ايدوس اينابەكوۆ.
«الاتاۋ اۋداندىق حقو-دا ءوتىپ جاتقان قابىلداۋ ازاماتتاردىڭ سۇراۋى بويىنشا ايدىڭ سوڭىنا دەيىن، دۇيسەنبى، سارسەنبى جانە جۇما كۇندەرى، ساعات 10.00-دەن 13.00-گە دەيىن وتكىزىلەدى دەپ جوسپارلانۋدا. شارا بارلىق سانيتارلىق نورمالاردى، سونىمەن قاتار الەۋمەتتىك قاشىقتىقتى ساقتاي وتىرىپ وتكىزىلدى»، - دەدى الماتى حقو باسپا ءسوز قىزمەتىندە.
ايتا كەتەيىك، الاتاۋ اۋداندىق حقو مەكەنجايى، «نۇركەنت» ىقشاماۋدانى، 5-كورپۋستا ورنالاسقان. بۇعان دەيىن الماتىنىڭ تۇركسىب اۋداندىق حالىققا قىزمەت كورسەتۋ ورتالىعىندا اشىق ەسىك كۇنى وتكەن بولاتىن. وندا «قازاقستان حالقىنا» قورىنا قاتىستى سۇراقتار حقو-نىڭ قۇزىرەتىنە جاتپايتىنى ايتىلعان ەدى.