جاڭا وقۋ جىلىنا ازىرلىك
جاڭا وقۋ جىلى انە-مىنە دەگەنشە اياڭداپ كەلىپ تە قالدى. جوو مەن كوللەدجدەر ستۋدەنتتەرگە ەسىگىن اشىپ، ءداستۇرلى فورماتتا ءبىلىم بەرەتىندىگىن جاريالادى. كارانتين تالاپتارىنا بايلانىستى وقىتۋشىلار مەن ستۋدەتتەردىڭ ەكپە سالۋلارى مىندەت ەكەندىگىن، وقۋ بارىسىندا ساقتىق شارالارىن قاتاڭ قاداعالاپ، ماسكالىق رەجيمدى ساقتاۋلارى قاجەت ەكەندىگىن اتاپ ءوتتى. ستۋدەنتتەرمەن تەزىرەك قاۋىشىپ، ولارعا قاۋىپسىزدىكتى قامتاماسىز ەتۋ ءۇشىن ەكپە سالعىزۋعا اسىقان تولەۋعالي تايتولەيەۆ بىلتىر كوروناۆيرۋسپەن اۋىرعان. "مۇنداي قيىندىقتى ەشكىمنىڭ باسىنا بەرمەسىن"، - دەيدى وقىتۋشى.
«مەنىڭ تانىستارىم قايتىس بولدى، تۋىستارىم قايتىس بولدى. كوپ ادام و دۇنيەگە كەتىپ جاتىر. ايتايىن دەگەنىم، سولاردىڭ بارلىعى دا ەكپە الماعاندار. الماسا، بولمايدى. سەبەبى بۇرىن دا الىپ جۇردىك قوي ەكپەنى بالا كەزىمىزدەن»، – دەدى الماتى مەملەكەتتىك ەنەرگەتيكا جانە ەلەكتروندى تەحنولوگيالار كوللەدجىنىڭ ديرەكتورى تولەۋعالي تايتولەيەۆ.
ەل اراسىنداعى ءتۇرلى الىپ-قاشپا اڭگىمەلەر ەكپە ەگۋ قارقىنىنا كەدەرگى كەلتىرىپ تۇرعانى جاسىرىن ەمەس. الايدا ماماندار دۇنيە ءجۇزى بويىنشا 2 ميللياردتان استام ادام ەكپە العان بولسا، دەمەك، ۆاكسينانىڭ تيىمدىلىگى جوعارى دەگەن پىكىر ءبىلدىردى.
«بىزگە وسى پاندەميا جاعدايىندا ءومىر ءسۇرۋدى ۇيرەنۋ كەرەك. ۆاكسينا كوروناۆيرۋس جۇقتىرۋدان 100 پايىز قورعاماسا دا، اۋرۋدى اۋىر وتكەرۋدەن جانە ولىمنەن قورعايدى دەپ سەنىمدى تۇردە ايتا الامىن. ال، ۆيرۋس مۋتاسياعا ۇشىراعاندىقتان، ەكپە ءتيىمسىز بولىپ قالدى دەگەن جاي عانا قاۋەسەت. ۆاكسينانىڭ ءار ءتۇرى ابدەن زەرتتەلگەن ءارى تيىمدىلىگىن دالەلدەگەن»، – دەدى قازاق رەپرودۋكتيۆتى مەديسينا اسوسياسياسىنىڭ پرەزيدەنتى ۆياچەسلاۆ لوكشين
جاڭا وقۋ جىلى قارساڭىندا ستۋدەنتتەردى قابىلداۋعا دايىندىقتىڭ ەڭ ماڭىزدى بولىگى – ۇجىمداعىلاردىڭ جاپپاي ەكپە الۋى، - دەدى قازاق ۇلتتىق مەديسينا ۋنيۆەرسيتەتىنىڭ قىزمەتكەرى. مۇنداعى قىزمەتكەرلەر مەن ستۋدەنتتەردىڭ 90 پايىزى ۆاكسينا سالعىزىپتى.
«كوروناۆيرۋس ينفەكسياسىنىڭ الدىن الۋ بويىنشا جالعىز جول – ۆاكسينا الۋ. ويتكەنى قوعامدىق يممۋنيتەت قالىپتاستىرۋ ءۇشىن ەكپە الۋ كەرەك. مەن ءوزىم ۆاكسينا الدىم. الدىمەن ماماندارمەن سويلەسىپ، تولىق زەرتتەدىم»، – دەدى س.اسفەندياروۆ اتىنداعى قازۇمۋ جاستار ساياساتى باسقارماسىنىڭ باس مامانى رىمكەش جارماعانبەت.
ايتا كەتۋ كەرەك، ەگۋ ناۋقانى باستالعالى قالا بويىنشا 853 مىڭ 5 ادام ەكپەنىڭ 1-كومپونەنتىن السا، 699 مىڭ 67 ادام ۆاكسينانىڭ 2 كومپونەنتىن دە سالعىزعان. ونىڭ 110 مىڭ 236-سى - الپىستى القىمداعاندار.