ءبىلىم ساپاسى
الماتى قالاسى ءبىلىم بەرۋ ساپاسىن قامتاماسىز ەتۋ دەپارتامەنتىنىڭ باسشىسى گۇلنار ەرمەكبايەۆا ونلاين بريفينگ كەزىندە ءبىلىم سالاسىنىڭ ساپاسىن كوتەرۋ ءۇشىن قانداي شارالار قابىلدانىپ جاتقانى تۋرالى باياندادى.
دەپارتامەنت باسشىسى بيىلعى جىلدىڭ ەكى ايىندا جۇرگىزگەن باقىلاۋ قورىتىندىسىن ورتاعا سالدى.
گۇلنار ەرمەكبايەۆانىڭ ايتۋىنشا، وسى جىلدىڭ ماۋسىم مەن شىلدە ايلارىندا قالاداعى 207 ورتا ءبىلىم بەرۋ ۇيىمدارىنا تەكسەرۋ جۇمىستارى جۇرگىزىلگەن. تەكسەرۋ كەزىندە ءبىلىم بەرۋ ۇيىمدارىنداعى سانيتارلىق ەپيدەميالوگيالىق تالاپتاردىڭ ۇيىمداستىرىلۋى، ياعني اshyq جۇيەسىنىڭ بارلىق جەرلەردە ورناتىلۋى، ۇيىم قىزمەتكەرلەرىنىڭ تەرمومەترلىك قۇرىلعىلاردى قولدانىلۋى سياقتى تالاپتاردىڭ ورىندالۋى تەكسەرىلگەن.
ءبىز مەكتەپتەردىڭ جاڭا وقۋ جىلىنا دايىندىعىن تەكسەرىپ قانا قويماي، ولاردىڭ ماتەريالدىق-تەحنيكالىق قۇرالدارمەن قالاي قامتاماسىز ەتىلگەنىن، اعىمداعى نەمەسە كۇردەلى جوندەۋدىڭ جۇرگىزىلگەنىن، بەينەكامەرالاردىڭ بار-جوعىن تەكسەردىك. بارلىق ءبىلىم ۇيىمدارىندا اعىمداعى جوندەۋ جۇمىستارى جۇرگىزىلسە، 5 مەكتەپ پەن 1 كوللەدجدە كۇردەلى جوندەۋ جۇمىسى جۇرگىزىلدى. №54 مەكتەپ-گيمنازيا مەن №7 ورتا مەكتەپتەگى جوندەۋ جۇمىستارى بەلگىلەنگەن مەرزىمدە تاپسىرىلماي وتىر، – دەدى ءبىلىم بەرۋ ساپاسىن قامتاماسىز ەتۋ دەپارتامەنتىنىڭ باسشىسى.
گۇلنار ەرمەكبايەۆا باسشىلىق ەتىپ وتىرعان مەكەمە مەكتەپتەردى وقۋلىقتارمەن قامتاماسىز ەتۋ، بىلىكتىلىك ساناتتارىن بەرۋ، بوس ورىندارعا كونكۋرستىق راسىمدەردى جۇرگىزۋ جانە ءبىلىم بەرۋ ۇيىمدارىنىڭ باسشىلارىن تاعايىنداۋ ەرەجەلەرىن ساقتاۋ بويىنشا ۇلكەن جۇمىس جۇرگىزدى.
2021 جىلدىڭ قىركۇيەگىنەن باستاپ مەكتەپكە دەيىنگى ۇيىمداردا، مەكتەپتەردە، كوللەدجدەردە جانە ەلىمىزدىڭ اسكەري، ارنايى جوعارى وقۋ ورىندارىندا مەملەكەتتىك اتتەستاتتاۋ ەنگىزىلگەنى بەلگىلى.
دەپارتامەنت باسشىسىنىڭ ايتۋىنشا، ەلىمىزدە «مەملەكەتتىك اتتەستاتتاۋ مەملەكەتتىك جالپىعا مىندەتتى ءبىلىم بەرۋ ستاندارتى» تالاپتارىنىڭ ساقتالۋىن باقىلاۋ جانە ءبىلىم بەرۋ ۇيىمدارىنا ادىستەمەلىك كومەك كورسەتۋ ماقساتىندا پروفيلاكتيكالىق باقىلاۋ تۇرىندە جۇرگىزىلەدى. مەملەكەتتىك اتتەستاسيانىڭ ماڭىزدىلىعى – وقۋشىلاردىڭ ءبىلىمىن باقىلاپ، اتا-انالاردىڭ ساۋالناماسىن، ءبىلىم بەرۋ ۇيىمدارىنىڭ ءوزىن-وزى باعالاۋىن قاراستىرادى.
سونىمەن قاتار، 5 جىل ىشىندە بارلىق بالاباقشالار، مەكتەپتەر، كوللەدجدەر مەملەكەتتىك اتتەستاتتاۋدان ءوتۋى قاجەت.