جاڭادان قۇرىلعان وبلىستارعا قوسىمشا قاراجات ءبولىنۋى مۇمكىن.
بۇل تۋرالى ق ر ۇلتتىق ەكونوميكا ءمينيسترى الىبەك قۋانتىروۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«قوسىمشا قاراجات ءبولۋ قاجەت بولاتىنى تۇسىنىكتى. جاڭادان قۇرىلعان اكىمدىكتەرگە نىسانداردى ساتىپ الۋعا، قوسىمشا شتات سانىنا قوسىمشا قاراجات كەرەك بولادى. وسى ورايدا جەرگىلىكتى بيۋدجەتتەن جانە رەسپۋبليكالىق بيۋدجەتتەن بولىنەدى»، - دەدى الىبەك قۋانتىروۆ ورتالىق كوممۋنيكاسيالار قىزمەتىندە.
ول ءۇشىن ءتيىستى تەتىكتەر قاراستىرىلعان، رەسۋرستار دا بار. وسىعان دەيىن ايتىلعانداي، 12 ملرد تەڭگە جاڭادان قۇرىلعان وبلىستارداعى اكىمدىكتەر مەن باسقارمالاردىڭ جۇمىسىن ۇيىمداستىرۋعا قاراستىرىلعان. سونىمەن قاتار ول وبلىس اكىمدەرىنىڭ ورىنباسارلارىنا قاتىستى سۇراققا جاۋاپ بەردى.
«اتالعان وڭىرلەرگە توقتالساق، ءار وبلىس بويىنشا ءۇش ورىنباساردان قاراستىرىلعان»، - دەدى مينيستر.
بۇدان بۇرىن حابارلانعانداي، الىبەك قۋانتىروۆ جاڭادان قۇرىلعان وبلىستاردا ينفراقۇرىلىم مەن جولداردىڭ ساپاسىنا قاتىستى پروبلەما بار ەكەنىن ايتتى.