4 قاڭتاردا پرەزيدەنت ۇكىمەت قۇرامىن جاڭارتتى.
بۇگىنگى وتكەن ۇكىمەت وتىرىسىندا جاڭا تاعايىندالعان مينيسترلەر انت بەردى، دەپ حابارلايدى Almaty-akshamy.kz
عالىمجان قويشىبايەۆ قازاقستان پرەمەر-مينيسترىنىڭ ورىنباسارى – ۇكىمەت اپپاراتىنىڭ باسشىسى لاۋازىمىنا تاعايىندالدى.
ءزۇلفيا سۇلەيمەنوۆا سەرىكقالي برەكەشيەۆتىڭ ورنىنا كەلدى. ول قايتا قۇرىلعان ەكولوگيا جانە تابيعي رەسۋرستار مينيسترلىگىن باسقارادى. ايتا كەتەرى، 32 جاستاعى سۇلەيمەنوۆا - ۇكىمەتتەگى ەڭ جاس مينيستر.
يندۋستريا جانە ينفراقۇرىلىمدىق دامۋ مينيسترلىگىنە قايىربەك وسكەنبايەۆتىڭ ورنىنا مارات قارابايەۆ كەلدى.
وقۋ-اعارتۋ ءمينيسترى بولعان اسحات ايماعامبەتوۆتى عاني بەيسەمبايەۆ الماستىردى. 1990 جىلعى اسحات ورالوۆ مادەنيەت جانە سپورت ءمينيسترى بولىپ تاعايىندالدى.
43 جاستاعى ازامات ەسقارايەۆ ادىلەت ءمينيسترى بولىپ تاعايىندالدى، بۇعان دەيىن بۇل قىزمەتتى قانات مۋسين اتقاردى.
ادىلەت ءمينيسترى ازامات ەسقارايەۆ، يندۋستريا جانە ينفراقۇرىلىمدىق دامۋ ءمينيسترى مارات قارابايەۆ، ەكولوگيا جانە گەولوگيا ءمينيسترى ءزۇلفيا سۇلەيمەنوۆا، وقۋ-اعارتۋ ءمينيسترى عاني بەيسەمبايەۆ، مادەنيەت جانە سپورت ءمينيسترى اسحات ورالوۆ انت بەردى.
«قازاقستان حالقى مەن پرەزيدەنتى الدىندا ءوز وتانىم – قازاقستاننىڭ ەكونوميكالىق جانە رۋحاني دامۋ ىسىنە بارلىق كۇش-جىگەرىم مەن ءبىلىمىمدى جۇمساۋعا، مەملەكەتتىڭ كونستيتۋسياسى مەن زاڭدارىن قاتاڭ ساقتاۋعا، ءوزىمنىڭ ىس-ارەكەتىمدە زاڭدىلىق پەن ادىلەتتىلىك، ازاماتتىق، ۇلتارالىق جانە كونفەسسياارالىق تاتۋلىق پرينسيپتەرىن ۇستانۋعا، قازاقستان حالقىنا ادال قىزمەت ەتۋگە، ءوز ەلىمنىڭ مەملەكەتتىلىگى مەن دۇنيەجۇزىلىك قوعامداستىقتاعى بەدەلىن نىعايتا بەرۋگە انت ەتەمىن»، - دەلىنگەن مينيسترلەر بەرگەن انت ماتىنىندە.