جاڭا مەكتەپتىڭ قۇرىلىسى قولعا الىندى

اۋداننىڭ الەۋمەتتىك ينفراقۇرىلىمىن دامىتۋ ماسەلەلەرى اكىمدىكتىڭ تۇراقتى باقىلاۋىندا.

وقۋشى ورىندارىنىڭ تاپشىلىعىن ازايتۋ ءۇشىن اۋداندا مەكتەپتەرگە قوسىمشا عيماراتتار سالۋ جانە جوندەۋ بويىنشا جوسپارلى جۇمىس جۇرگىزىلۋدە. ماسەلەن، وتكەن جىلى 2 مەكتەپتىڭ (№34 جانە 144 گيمنازيالار) 850 ورىندىق 2 قوسىمشا عيماراتى پايدالانۋعا بەرىلىپ، قابانباي باتىر كوشەسىندە 850 ورىندىق جەكە مەكتەپ (پرومەتەۋس) اشىلدى،-دەپ حابارلايدى اlmaty-akshamy.kz. 

«جايلى مەكتەپ» جوباسى اياسىندا بيىل رايىمبەك داڭعىلى مەن اۋەزوۆ كوشەسى قيىلىسىنداعى ۋچاسكەدە 1،5 مىڭ ورىندىق جاڭا مەكتەپتىڭ قۇرىلىسىن باستاپ، 2024 جىلى پايدالانۋعا بەرۋدى جوسپارلاپ وتىرمىز. سونداي-اق اۋداننىڭ ەكى مەكتەبىنە ءارقايسىسى 300 ورىندىق قوسىمشا قۇرىلىستار سالۋ جوبالارى ازىرلەنۋدە. شىلدە ايىندا № 15 گيمنازيانى سەيسميكالىق كۇشەيتىپ، كۇردەلى جوندەۋ اياقتالادى جانە تامىز ايىنا دەيىن № 136 مەكتەپ-گيمنازيانى كۇردەلى جوندەۋ، سەيسميكالىق كۇشەيتۋگە جوبالاۋ-سمەتالىق قۇجاتتاما ازىرلەنەدى، - دەيدى الماتى قالاسىنىڭ اكىمى ەربولات دوسايەۆ.

مەكتەپكە دەيىنگى ءبىلىم بەرۋ سالاسىندا وتكەن جىلى 290 ورىندىق 5 جەكە مەنشىك بالاباقشا اشىلىپ، №7 بالاباقشانى سەيسميكالىق كۇشەيتۋ اياقتالعان. ماۋلەنوۆ كوشەسى، 57 مەكەنجايداعى قايتارىلعان بۇرىنعى بالاباقشا عيماراتىن كۇردەلى جوندەۋدەن وتكىزىلىپ، سەيسميكالىق كۇشەيتۋگە ارنالعان جوبالاۋ-سمەتالىق قۇجاتتاما مامىر ايىندا ساراپتامادان شىعادى،
2023 جىلدىڭ كۇزىندە قۇرىلىس-مونتاجداۋ جۇمىستارى اياقتالماق.