بىرنەشە اي دەمالىس پەن گاسترولدىك ساپارلاردان كەيىن مۇحتار اۋەزوۆ اتىنداعى قازاق ۇلتتىق دراما تەاترى 96-شى ماۋسىمىنىڭ شىمىلدىعىن ءتۇردى.
"ونەردەن قۋات الماسا، تىرشىلىكتىڭ شىراعى سونەدى"دەيدى ۇلى مۇحتار اۋەزوۆ. ىندەتكە بايلانىستى شەكتەۋلەر بولدى. ءبىراق ادامنىڭ قارنى توق بولعانىمەن، رۋحى قاشان دا اش بولماۋى كەرەك. وسى اشتىقتان ساقتاسىن دەپ وتىرعاندا، اۋىر كەزەڭنىڭ قيىندىعى سەيىلگەن سياقتى. سوندىقتان مىنا ساحنا ءوز كورەرمەندەرىن قاتتى ساعىندى. تەاتردىڭ ءومىرى سىزدەردىڭ قولدارىڭىزدا، كوڭىلدەرىڭىزدە، قوشەمەتتەرىڭىزدە، اعايىن!» – دەپ باستادى ءسوزىن تەاتر ديرەكتورى ە.جۋاسبەك. ونەر ورداسىنىڭ كەزەكتى اشىلۋىنا وراي وتكىزىلگەن ءىس-شارادا ول كورەرمەندەردى جاڭا ماۋسىمنىڭ اشىلۋىمەن قۇتتىقتاپ، الداعى جوسپارلارىمەن ءبولىستى. سالتاناتتى جيىنعا تەاتر ارتىستەرى مەن رەجيسسەرلەرى قاتىستى. اتاپ ايتساق، تەاتر جانە كينو اكتەرى سايات مەرەكەنوۆ، رەجيسسەر الما كاكىشيەۆا، اكتەرلەر باقتيار قوجا، بەكجان تۇرىس، اسىلبەك بورانباي مەن اكتيريسالار ءداريا ءجۇسىپ، شىنار جانىسبەكوۆا قاتىستى.
سونىمەن قاتار ماۋسىماشاردا كورەرمەندەر نازارىنا تەاتردىڭ تاريحىنان سىر شەرتەتىن «ساحنا ساتتەرى» كورمەسى ۇسىنىلدى. ول جەردە سوڭعى 40 جىل ىشىندە تاريح ساحناسىنداعى ساتتەردى بەينەلەيتىن سۋرەتتەر مەن بينوكل، فوتواپپارات سياقتى قۇندى جادىگەرلەر قويىلدى. كورمە بارىسىندا بەلگىلى فوتوگراف قاليعۇمار قابدەشيەۆ ءوز فوتوالبومىن تەاترعا سىيعا تارتتى.
مەرەيلى ماۋسىمنىڭ اشىلۋ سالتاناتى م. اۋەزوۆتىڭ «اباي» سپەكتاكلىمەن جالعاستى. ونەر ۇجىمى ءار جاڭا ماۋسىمدا م.اۋەزوۆتىڭ ءبىر شىعارماسىن ساحنالاۋدى تەاتردىڭ ءداستۇرلى تۇردە قالىپتاسقان ءۇردىسى، جازىلماعان زاڭى دەپ بىلەدى. سپەكتاكلدە سۋىق جىلدار قويناۋىندا حالىق زارىنا زار، حالىق تىلەگىنە تىلەك قوسقان ۇلى گۋمانيستىڭ ءورشىل بەينەسى داۋىلدى تەڭىز بەتىندە تالماي قالىقتاعان سۇڭقاردى كوز الدىڭىزعا اكەلەدى. ايدار مەن اجاردىڭ باسىن اراشالاپ قالۋى، جۋاندىقتىڭ جەڭىلۋى، ادىلەتتىڭ ورناۋى – حالىقتىڭ جەڭىسى، حالىقتىڭ ۇلى ابايدىڭ جەڭىسى ەكەنىن ۇعۋعا بولادى.
تەاتر باسشىسى تاعى ءبىر سوزىندە «سپەكتاكل ول – ءتىرى ورگانيزم. قانداي تۋىندى بولماسىن، ول جاڭا دۇنيە. مۇندا، ەڭ باستىسى، ونىڭ ايتارى بولۋى كەرەك. وسى ورايدا ءبىز بۇل ماۋسىمدا كورەرمەنگە ەكى جاڭا سپەكتاكل ۇسىنعالى وتىرمىز. ونىڭ ءبىرى – «قان مەن تەر». ول وتكەن عاسىردا قازاق تەاتر ونەرىنىڭ بولشەگىنە اينالعان ۇلكەن سپەكتاكل بولعان. ءبىز سول پەساعا ورالىپ، «قان مەن تەر. اقبالا» دەپ اتاپ، ايەل ماسەلەسىن كوتەرگەلى وتىرمىز»، - دەدى تەاتر ە.جۋاسبەك. قاسيەتتى قاراشاڭىراق وسىنداي جاقسى جاڭالىقتارىمەن، جاڭا تىنىسپەن ءوز كورەرمەندەرىن جاڭا ماۋسىمدا كۇتەدى.
