تۇركىستان وبلىسىندا ۇرلىق جاساعان الماتى تۇرعىنى ۇستالدى

پوليسەيلەر جەكە زاتتارعا، مۇلىكتەرگە يە بولۋعا، قاراۋسىز قالدىرماۋعا شاقىرادى

ورداباسى اۋدانى پب كەزەكشى بولىمىنە جەرگىلىكتى تۇرعىن ارىزدانىپ كەلگەن. ونىڭ ايتۋىنشا، ءوزىنىڭ دۇكەنىنەن بەلگىسىز بىرەۋ “سامسۋنگ گالاكسي” ماركالى ۇيالى تەلەفونىن ۇرلاپ كەتكەن. وسىلايشا جابىرلەنۋشىگە 40 مىڭ تەڭگە شىعىن كەلتىرگەن، دەپ حابارلايدى Almaty-akshamy.kz

اتالعان دەرەك قك 188-بابى (ۇرلىق) قىلمىستىق قۇقىق بۇزۋشىلىعى بويىنشا تىركەلدى. پوليسيا قىزمەتكەرلەرى اتالعان حابارلاما بويىنشا جەدەل ىزدەستىرۋ شارالارىنا بىردەن كىرىستى. ءتارتىپ ساقشىلارى جان-جاقتى تەكسەرۋ جۇمىستارىنىڭ ناتيجەسىندە ۇرلىق جاسادى دەگەن كۇدىكپەن بۇرىن سوتتى بولعان، الماتى قالاسىنىڭ ايەل تۇرعىنى ۇستالدى. قازىرگى تاڭدا كۇدىكتى ازاماتشا قاماۋعا الىنىپ، تەرگەۋ امالدارى جۇرگىزىلۋدە.

بەلگىلى بولعانداي، كۇدىكتى ايەل دۇكەنگە كيىم-كەشەك ساتىپ الۋ ماقساتىندا كىرگەن. سودان سوڭ ۇستەل ۇستىندە تۇرعان ۇيالى تەلەفوندى كورىپ، وڭاي ولجاعا كەنەلۋدى ويلاعان. اتالعان تەلەفوندى بىلدىرتپەستەن الىپ، وقيعا ورنىنان بوي تاسالاعان.

سونىمەن قاتار اراعا تاۋلىك سالىپ، ورداباسى اۋدانىندا ءوزىنىڭ تانىسىمەن بىرگە تۇرىپ جۇرگەن ايەل تانىسىن دا سان سوقتىرىپ كەتكەن. ياعني ونى دۇكەننەن نان الىپ كەلەمىن دەپ الداپ، سورەدە تۇرعان سومكەسىنىڭ ىشىندەگى اقشالارىن قوسا الىپ كەتكەن. وسىلايشا الماتى قالاسىنا بەت الماق بولعان كۇدىكتى ايەلدى ءتارتىپ ساقشىلارى اۋدان ورتالىعىنىڭ بىرىنەن قولعا ءتۇسىردى.

ءوز كەزەگىندە پوليسەيلەر تۇرعىندارعا ءوز مۇلىكتەرىنە يە بولۋدى، قاراۋسىز قالدىرماۋدى ەسكەرتەدى. ەگەر ءسىز ۇرلىقتىڭ قۇربانى نەمەسە كۋاسى بولساڭىز، تەز ارادا “102” ءنومىرى ارقىلى پوليسەيلەرگە حابارلاسىڭىزدار.