الماتىدا گاز جانە ءورت قاۋىپسىزدىگى ماسەلەلەرى بويىنشا اۋقىمدى ءتۇسىندىرۋ جۇمىستارى جالعاسۋدا. بۇل باستاماعا قۇتقارۋشىلارمەن بىرگە مادەنيەت پەن سپورت سالاسىنىڭ تانىمال وكىلدەرى قاتىسۋدا. قالالىق توتەنشە جاعدايلار دەپارتامەنتىمەن بىرلەسىپ جۇزەگە اسىرىلىپ جاتقان اكسيانىڭ ماقساتى – كومىرقىشقىل گازىنان ۋلانۋعا بايلانىستى قايعىلى جاعدايلاردىڭ الدىن الۋ.
الماتىلىقتارعا كەزەكتى بەينەۇندەۋدى ءانشى، اكتريسا جانە تەلەجۇرگىزۋشى ديلناز احمادييەۆا مەن ارتيست ءبىرجان حاسانعالييەۆ جولدادى. ولار جەكە ۇلگى كورسەتىپ، قاراپايىم ءارى تۇسىنىكتى فورمات ارقىلى ءومىردى ساقتاپ قالۋعا كومەكتەسەتىن قاۋىپسىزدىك ەرەجەلەرىن ەسكە سالدى.
«وزىڭنەن باستا» چەللەندجى اياسىندا اكسيا قاتىسۋشىلارى كومىرقىشقىل گازىن انىقتايتىن داچيكتەر مەن تابيعي گازدىڭ تارالۋىنا اسەر ەتەتىن گازاناليزاتورلاردىڭ جۇمىسىن كورسەتتى. قۇتقارۋشىلاردىڭ ايتۋىنشا، مۇنداي قۇرىلعىلار ءقاۋىپتى دەر كەزىندە بايقاپ، قايعىلى سالداردىڭ الدىن الۋعا مۇمكىندىك بەرەدى.
تجد مالىمەتىنشە، كومىرقىشقىل گازىنىڭ باستى ءقاۋپى – ونىڭ ءتۇسى دە، ءيىسى دە جوق. ول بولمە ىشىندە كوزگە كورىنبەي جينالىپ، ساناۋلى مينۋتتار ىشىندە اۋىر ۋلانۋعا نەمەسە ادام ولىمىنە اكەلۋى مۇمكىن. مۇنداي جاعدايلار كوبىنە گاز جابدىقتارىنىڭ اقاۋلىعىنان، گاز قۇبىرلارى قوسىلىستارىنىڭ گەرمەتيكالىعىنىڭ بۇزىلۋىنان، جەلدەتۋ ارنالارىنىڭ جابىلىپ قالۋىنان، سونداي-اق تۇرعىن ۇيلەردى جىلىتۋ ءۇشىن گاز پليتالارى مەن كونفوركالاردى پايدالانۋدان تۋىندايدى. بۇل اسىرەسە جەكە تۇرعىن ۇيلەردە ءجيى كەزدەسەدى.
اكسياعا ءۇش دۇركىن الەم چەمپيونى، جاۋىنگەرلىك سامبودان الەم كۋبوگىنىڭ يەگەرى جانە برازيليالىق دجيۋ-دجيتسۋدان ازيانىڭ ەكى دۇركىن چەمپيونى ارمان وسپانوۆ تا قوسىلدى. ول قازاقستاندىقتاردى ۇيلەر مەن پاتەرلەرگە گاز داچيكتەرىن ورناتۋعا شاقىرىپ، مۇنداي قاراپايىم قۇرىلعىلار ولىمگە اكەلەتىن ۋلانۋدىڭ الدىن الاتىنىن اتاپ ءوتتى.
باستامانى مادەنيەت پەن ونەر سالاسىنداعى وزگە دە تانىمال تۇلعالار قولدادى. ولار الماتىلىقتارعا گاز جابدىقتارىنىڭ جاعدايىن تۇراقتى تۇردە تەكسەرىپ وتىرۋدىڭ، جەلدەتۋ جۇيەسىنىڭ دۇرىس جۇمىس ىستەۋىن قاداعالاۋدىڭ جانە ءورت قاۋىپسىزدىگىنىڭ قاراپايىم تالاپتارىن ساقتاۋدىڭ ماڭىزدىلىعىن ەسكە سالدى. ولاردىڭ ايتۋىنشا، قاۋىپسىزدىككە جاۋاپكەرشىلىكپەن قاراۋ – ءوز ومىرىڭە عانا ەمەس، جاقىندارىڭنىڭ ومىرىنە دە جاسالعان قامقورلىق.