جاڭا جىلدى جۇمىستا وتكىزەتىندەر كىمدەر؟

مەرەكەگە قاراماي جۇمىس ىستەيتىندەر كىمدەر؟

ءبىزدىڭ قوعامدا ماڭىزى زور، اۋاداي قاجەت ماماندىق يەلەرى بار. ولار بۇل كۇنى كەزەكشىلىككە ءتۇسىپ، ساعات 00.00-دە جۇمىستا بولادى. ءبىرى ۇلكەن مىندەتتى ارقالاسا، ءبىرى تابىس تابۋدى كوزدەيدى. جاڭا جىل تۇنىندە تىنىمسىز قىزمەت ەتەتىن مامانداردىڭ ءبىرازىن جىپكە تىزسەك، دەپ حابارلايدى Almaty-akshamy.kz Elorda.info-عا سىلتەمە جاساپ. 

پوليسيا قىزمەتكەرلەرى

مەرەكە كۇندەرىندە پوليسەيلەردىڭ قىزمەتتىك جاۋاپكەرشىلىكتەرى تىپتەن ۇدەي تۇسەدى. جاڭا جىل ءتۇنى قىزىق پەن قىلمىس قاتار جۇرەتىنى بەلگىلى. اششى سۋعا تويىپ العان ادامدار مىنەز كورسەتىپ، تويدىڭ سوڭىن توبەلەسكە ۇلاستىرادى. سونىمەن قاتار الاڭداعى شىرشا ماڭى، بۇزاقىلار، قوعامداعى كەلەڭسىز جاعدايلاردىڭ سۇراۋى وسى ماماندىق يەلەرىنىڭ موينىندا.

"جەدەل جاردەم"

اۋرۋ-سىرقاۋ مەرەكەگە قارامايدى. ادام ءومىرى دارىگەرلەردىڭ قولىندا بولعاندىقتان، بۇل ماماندىق يەلەرىنىڭ جاڭا جىلدى جۇمىستا قارسى الۋى تاڭعالاتىن دۇنيە ەمەس. ءتىپتى، "جەدەل جاردەم" كولىگىنىڭ ىشىندە دە قارسى الاتىن كەزدەرى بولادى.

«جاڭا جىل ءتۇنىن "جەدەل جاردەم" قىزمەتكەرلەرى دە قىزۋ جۇمىس ۇستىندە وتكىزەدى. بىلتىر جاڭا جىلدا كەزەكشىلىككە شىقتىم. تىنىش ءوتتى دەۋگە كەلمەيدى. جارتى ساعات قالعاندا، جەدەل قوڭىراۋ ءتۇستى. كورسەتىلگەن مەكەنجايعا جەتىپ، جاڭا جىلدى تانىمايتىن ادامدارمەن قارسى الدىم. نەگىزى ءبىرىنشى قاڭتاردا شاقىرتۋلار سانى كوپ بولادى، مەرەكەلىك داستارحاننان كەيىن سوزىلمالى اۋرۋلارى اسقىنىپ كەتەدى»، - دەدى "جەدەل جاردەم" قىزمەتكەرى ءمادينا وسپانوۆا.

تاكسيستەر

تاكسيستەر بۇل كۇنى جاقسى تابىس تابادى. جۇرگىزۋشىلەر ادەتتەگىدەي اسىققان جولاۋشىلاردى دىتتەگەن جەرلەرىنە جەتكىزەدى، ءبىراق اقىسى، ارينە، جوعارى.  

«جاڭا جىل قارساڭىندا تاكسيشىلەردىڭ تابىسى ەكى ەسەگە دەيىن وسەدى. سوندىقتان 31 جەلتوقسان كۇنى تولىق جانە تۇنگى 23:50 شاماسىنا دەيىن ىڭعايى كەلسە جۇمىس ىستەۋگە تىرىسام. وسىدان 3 جىل بۇرىن ۇيگە 00.15-تە ارەڭ دەگەندە جەتتىم»، - دەدى تاكسيست جاندوس وماروۆ.