الماتىدا كرەاتيۆتى ەكونوميكانى دامىتۋعا ەرەكشە كوڭىل بولىنەدى.
2021 جىلعى 30 جەلتوقساندا الماتى قالاسى اكىمدىگىنىڭ كرەاتيۆتى يندۋستريا باسقارماسىنىڭ قولداۋىمەن «Ruh Entertainment» كومپانياسى مەن الماتى قالالىق ءماسليحاتىنىڭ دەپۋتاتى قايرات قۇدايبەرگەن PUBG mobile ءموبيلدى ويىن ءپانى بويىنشا «Aر نامىس» اتتى قازاقستانداعى جاڭا كيبەرسپورتتىق ۇيىمنىڭ تۇساۋكەسەرىن وتكىزدى، دەپ حابارلايدى Almaty-akshamy.kz
ءموبيلدى قۇرىلعىلارداعى بۇل ويىن - الەمدەگى ەڭ تانىمال ويىنداردىڭ ءبىرى.
ءىس-شارا بارىسىندا ەۋروپا جانە الەم چەمپيوناتتارىندا ەلىمىزدىڭ اتىنان شىعاتىن تانىمال كيبەرسپورتشىلاردان تۇراتىن كوماندانىڭ ءبىرىنشى قۇرامى تانىستىرىلدى. كوماندانىڭ بارلىق قاتىسۋشىلارىمەن كاسىبي كەلىسىم-شارتتارعا قول قويىلدى جانە ولارعا ەڭ زاماناۋي گادجەتتەر بەرىلدى. 2018 جىلدان باستاپ كيبەرسپورت قازاقستاندا رەسمي سپورت ءتۇرى رەتىندە تانىلعانى بەلگىلى.
«ءبىزدىڭ ۇلكەن ماقساتتارىمىز بار. حالىقارالىق تۋرنيرلەردە ەڭ جوعارى ورىندارعا يە بولۋ ءۇشىن بار كۇشىمىزدى سالامىز. ءبىزدىڭ كوماندامىز ۇزدىك ويىنشىلاردان تۇرادى»، - دەدى جاڭا كوماندانىڭ نەگىزىن قالاۋشىلاردىڭ ءبىرى قايرات قۇدايبەرگەن.
«كيبەرسپورت بۇكىل الەمدە قارقىندى دامىپ كەلەدى. ءبىزدىڭ مىندەتىمىز-حالىقارالىق تۋرنيرلەردە جاقسى ناتيجە كورسەتىپ جۇرگەن جاستارىمىزدى قولداۋ جانە الەمدىك كيبەرسپورت كارتاسىنان ءوز ورنىن الۋ. وسى ماقساتتا ءبىز كيبەرسپورتتى پەرسپەكتيۆالى يندۋستريالاردىڭ ءبىرى رەتىندە الماتىنىڭ كرەاتيۆتى ەكونوميكاسىن دامىتۋ ستراتەگياسىنا ەنگىزدىك. كيبەرسپورتقا جۇيەلى قولداۋ كورسەتۋ جانە ءتۇرلى تۋرنيرلەردى ۇيىمداستىرۋ جوسپاردا بار. بۇل دا الماتىنى جاستاردىڭ كرەاتيۆتى قالاسى رەتىندە دارىپتەيدى»، - دەدى الماتى قالاسى اكىمىنىڭ كرەاتيۆتى ەكونوميكا جونىندەگى كەڭەسشىسى ەرنار قۇرماشيەۆ.
ايتا كەتەرلىگى، «الماتى-2050» دامۋ ستراتەگياسىنا سايكەس، قالا ەكونوميكاسىندا كرەاتيۆتى ەكونوميكانى دامىتۋ باعىتىندا قۇرىلىمدىق مانيەۆردى جۇزەگە اسىرۋ جوسپارلانعان. مەگاپوليس ستاندارتتى ەمەس ويلاۋ قابىلەتى بار كرەاتيۆتى، تالانتتى جانە بىرەگەي ادامدارعا ۇنەمى قولداۋ كورسەتەتىنى، ال زاماناۋي سيفرلىق قۇرالداردىڭ بولۋى قالا ەكونوميكاسىنىڭ ءوسۋ سەرپىنىن ارتتىراتىنى اتاپ ءوتىلدى.