جاڭا جىلدان باستاپ مۇعالىمدەردىڭ جالاقىسى وسەدى

 ەلىمىزدەگى ورتاشا جالاقى 312 مىڭ تەڭگە، ال مەكتەپتەردەگى مۇعالىمدەردىڭ ورتاشا جالاقىسى 343 مىڭ تەڭگەنى قۇرايدى.

بۇل تۋرالى ق ر وقۋ-اعارتۋ ءمينيسترى اسحات ايماعامبەتوۆ ايتتى، دەپ حابارلايدى Almaty-akshamy.kz.

«ءبىز جالاقى بويىنشا 2019 جىلعى ستاتيستيكا مەن 2022 جىلدىڭ ەكىنشى توقسانىنداعى ستاتيستيكانى سالىستىردىق. 2019 جىلى ەلىمىزدەگى ورتاشا جالاقى 168 مىڭ تەڭگە بولسا، ورتا ءبىلىم دەڭگەيى بويىنشا ورتاشا جالاقىمىز 115 مىڭ تەڭگەنى قۇرادى. ياعني، ەلدەگى ورتاشا جالاقىدان الدەقايدا تومەن. 2022 جىلدىڭ ەكىنشى توقسانىندا ەلىمىزدەگى ورتاشا جالاقى 312 مىڭ تەڭگە بولسا، ورتا ءبىلىم دەڭگەيى بويىنشا ورتاشا جالاقى 343 مىڭ تەڭگەگە جەتتى. دەمەك، ورتاشا جالاقىدان ءسال جوعارى. بۇل – پرەزيدەنتتىڭ العا قويعان تاپسىرماسى»، -  دەدى اسحات ايماعامبەتوۆ الماتى ءبىلىم فورۋمى بارىسىندا.

ءمينيستردىڭ ايتۋىنشا، 2023 جىلدىڭ  قاڭتارىنان باستاپ مۇعالىمدەردىڭ ەڭبەكاقىسى تاعى 25%-عا وسەدى.

«جالپى العاندا، وقىتۋشىنىڭ مارتەبەسىن كوتەرۋ جانە ولار ءۇشىن ادەتتەن تىس فۋنكسيالارعا تارتپاۋ، جاۋاپكەرشىلىكتى ازايتۋ، جالاقىنى كوتەرۋ، جوو-لاردىڭ اكادەميالىق ەركىندىگىمەن جانە پەداگوگيكالىق ماماندىقتار بويىنشا بىتىرۋشىلەردى اتتەستاتتاۋ جۇيەسىمەن قاتار، ءىس-شارالار كەشەنى، بىزگە قاجەتتى ناتيجە بەرەدى. مەن بولاشاققا جانە ارىپتەستەرىمىزدى مەكتەپتەرگە جۇمىسقا تارتۋ مۇمكىندىگىنە سەنىممەن قارايمىن»، - دەدى مينيستر.