دارەتحاناعا ءتۇسىپ كەتكەن شاقالاقتى ءتارتىپ ساقشىلارى قۇتقاردى.
كەشە تۇندە قالانىڭ تۇركسىب اۋدانىندا جاڭا تۋعان نارەستەنى قۇتقارۋعا ارنالعان ارنايى ءىس-شارا ءوتتى.
«بىزگە تۇنگى ساعات ەكىدە كامەلەتكە تولماعان قىزدىڭ تۇسىك تاستاعاندىعى تۋرالى قوڭىراۋ كەلىپ ءتۇستى. ول قالاداعى اۋرۋحانالاردىڭ بىرىنە جاتقىزىلدى. دارىگەرلەرمەن سويلەسكەننەن كەيىن مەن وقيعا ورنىنا بارىپ، تەكسەرۋدى ءجون كوردىم. باسىما “بالا قايدا؟” دەگەن سۇراق كەلدى. قىزدىڭ اناسىنان وقيعا ورىن العانعا دەيىن ونىڭ سىرتتاعى دارەتحانادا ءبىراز ۋاقىت بولعانىن ءبىلدىم. دارەتحانا ىشىنەن قان ىزدەرىن تاۋىپ، ىشىندە جاتقان بالانى كوردىم. ول دەم الىپ جاتتى. وسى كەزدە تەرگەۋ جەدەل توبى كەلدى، ونىڭ قۇرامىندا كريمينالدىق پوليسيا ءبولىمىنىڭ جەدەل ۋاكىلى عازيز حاماسقالييەۆ بولدى. ءبىز دارەتحانانىڭ ەدەنىنەن تاقتايلاردى تەز الىپ تاستادىق. ارىپتەسىم عازيز تومەن ءتۇسىپ، بالانى قىزمەتتىك كويلەگىنە وراپ، ابايلاپ شىعارىپ الدى. سول كەزدە نارەستە جىلادى. ءبارىمىز مازاسىز كۇيدە ەدىك، ۋايىمدادىق. بالانى تەز ارادا دارىگەرلەرگە تاپسىردىق»، – دەدى تۇركسىب اۋداندىق پب-نىڭ كامەلەتكە تولماعاندار ءىسى جونىندەگى ۋچاسكەلىك ينسپەكتورى نۇرجان شاتۋنوۆ.
17 جاستاعى ءجاسوسپىرىمنىڭ اناسىنىڭ ايتۋىنشا، ول قىزىنىڭ جۇكتى بولعانىن بىلمەگەن. قازىرگى ۋاقىتتا بۇل دەرەك بويىنشا تۇركسىب اۋداندىق پب-نا قاراستى پوليسيا بولىمىندە تەرگەۋ امالدارىن باستالدى. وقيعانىڭ ءمان-جايى انىقتالۋدا.
«ءقازىر بالانىڭ جاعدايىن ءبىلىپ قايتتىق. ول دارىگەرلەردىڭ باقىلاۋىندا جانساقتاۋ بولىمىندە جاتىر. ءوز بەتىنشە دەم الىپ جاتىر – بۇل جاڭالىققا بالانى قۇتقارۋعا قاتىسقان بارلىق ارىپتەستەرىم قاتتى قۋاندى. دەمەك، بالا ءومىر سۇرەدى. ول تۋىلعاننان بەرى ءوز ءومىرى ءۇشىن كۇرەستى. وعان زور دەنساۋلىق، ۇزاق عۇمىر تىلەيمىز. باقىتتى بولىپ وسە بەرسىن. مەن ءۇش ۇلدىڭ اكەسىمىن. سوندىقتان بۇل وقيعا مەنى بەيجاي قالدىرمادى. ءبىز ءوز ارىپتەستەرىمىزبەن بىرگە قۇتقارىلعان نارەستەنىڭ تاعدىرىن مىندەتتى تۇردە قاداعالايمىز جانە مۇمكىندىگىنشە وعان قاتىساتىن بولامىز»، – دەدى شاتۋنوۆ.