وقۋ-اعارتۋ مينيسترلىگىنىڭ باسپا ءسوز قىزمەتى 1 قىركۇيەك كۇنى وتەتىن "العاشقى قوڭىراۋ" شاراسىن ۇيىمداستىرۋدىڭ ءتارتىبى تۋرالى تۇسىندىرمە تاراتتى، دەپ حابارلايدى Almaty-akshamy.kz.
«قىركۇيەكتىڭ ءبىرىنشى كۇنى ءبىلىم بەرۋ ۇيىمدارىندا ءبىلىم كۇنىنە ارنالعان سالتاناتتى جيىن وتەدى. وڭىرلىك ءبىلىم باسقارمالارى جاڭا 2022-2023 وقۋ جىلىن جاريالايتىن ءىس-شارانىڭ جوعارى يدەيالىق-قۇندىلىق مازمۇنىن قامتاماسىز ەتۋ ماقساتىندا قاجەتتى ءىس-قيمىلداردى ۇيلەستىرەدى»، - دەپ جازىلعان مالىمەتتە.
سونداي-اق سالتاناتتى جيىن وتكىزۋ كەزىندە ءبىرقاتار مەرەكەلىك ءراسىم وتكىزۋگە رۇقسات ەتىلمەيتىنى ايتىلعان.
«سالتاناتتى جيىندى وتكىزۋ ءتۇرىن، قاتىسۋشىلار قۇرامىن ءبىلىم بەرۋ ۇيىمدارى دەربەس ايقىندايدى. انيماتورلاردى، مەرەكەلىك اگەنتتىكتەردى، ارتىستەردى، مەرەكەلىك ءىس-شارالاردى وتكىزۋ ءۇشىن اقىلى جەكە ستۋديالاردى تارتۋعا؛ مەرەكەلىك داستارحاندار جايۋعا؛ مەكتەپ عيماراتى مەن اۋماعىن شارلارمەن بەزەندىرۋگە رۇقسات ەتىلمەيدى.
مەملەكەتتىك تۋدى الىپ شىعۋ جانە گيمندى ورىنداۋ قازاقستان رەسپۋبليكاسىنىڭ مەملەكەتتىك رامىزدەرىن پايدالانۋ تارتىبىنە سايكەس جۇرگىزىلەدى»، - دەپ جازادى ۆەدومستۆونىڭ باسپا ءسوز قىزمەتى.
مينيسترلىك باق-تا تاراعان كەيبىر مالىمەتتەر تۋرالى دا تۇسىنىكتەمە بەردى.
«بالالارعا ەكولوگيالىق تاربيە بەرۋ، قورشاعان ورتانى لاستاماۋ، تابيعات پەن جانۋارلارعا قامقور بولۋ ماقساتىندا سالتاناتتى جيىن كەزىندە شارلار مەن كوگەرشىندەردى پايدالانۋ ۇسىنىلمايدى»، - دەپ جازىلعان رەسمي مالىمەتتە.