«ۇلتتىق قور – بالالارعا» جوباسى اياسىندا جاڭا جىلدان باستاپ بالالاردىڭ ەسەپشوتىنا قاراجات تۇسە باستايدى. بۇل تۋرالى پارلامەنت پالاتالارىنىڭ بىرلەسكەن وتىرىسىندا قازاقستان حالقىنا جولداۋىن جاريالاعان مەملەكەت باسشىسى قاسىم-جومارت توقايەۆ
«وسى ورايدا حالىقتىڭ تۇرمىس ساپاسىنا تىكەلەي اسەر ەتكەن كەيبىر شارالاردى اتاپ وتكىم كەلەدى. مىسالى، 2020 جىلدان بەرى مۇعالىمدەردىڭ جالاقىسى ەكى ەسە ءوستى. دارىگەرلەردىڭ ايلىعى دا ايتارلىقتاي كوبەيدى. ءقازىر ولاردىڭ تابىسى ەلىمىزدەگى ورتاشا جالاقىدان الدەقايدا جوعارى. جۇرتقا زەينەتاقى جيناعىنىڭ ءبىر بولىگىن پايدالانۋ مۇمكىندىگى بەرىلدى. ميلليونعا جۋىق ادام وسى جوبانىڭ يگىلىگىن كوردى – تۇرعىن ءۇي ماسەلەسىن شەشىپ، باسپانالى بولدى»، - دەدى مەملەكەت باسشىسى.
پرەزيدەنت «جايلى مەكتەپ» جوباسى اياسىندا 400-گە جۋىق مەكتەپ سالىناتىندىعىن ايتتى.
«ءقازىر اۋىلدىق جەردە 300-دەن استام دەنساۋلىق ساقتاۋ نىسانى سالىنىپ جاتىر. «ۇلتتىق قور – بالالارعا» جوباسى قولعا الىندى. سونىڭ ارقاسىندا جاڭا جىلدان باستاپ بالالاردىڭ ەسەپشوتىنا قاراجات تۇسە باستايدى. يگەرىلمەي جاتقان نەمەسە زاڭسىز بەرىلگەن 8 ميلليون گەكتار جەر مەملەكەت مەنشىگىنە قايتارىلدى. مەن ناقتى ىسكە اسقان شارالاردىڭ ءبىر بولىگىن عانا اتاپ ءوتتىم. شىن مانىندە، كوپ جۇمىس اتقارىلدى، بولاشاقتا دا ءوز جالعاسىن تابادى»، - دەدى قاسىم-جومارت توقايەۆ.