قۇتقارۋشىلارعا پاتەر كىلتى تابىستالدى
جاڭا جىل قارساڭىندا قالالىق الماتى تجد باستىعىنىڭ ورىنباسارى سامات اساينوۆ الاتاۋ اۋدانى يندۋستريالىق ايماعىندا جاڭادان ىسكە قوسىلعان ءورت ءسوندىرۋ دەپوسىنىڭ عيماراتىندا ورنالاسقان جەتى قىزمەتتىك پاتەردىڭ كىلتىن تابىس ەتتى، دەپ حابارلايدى Almaty-akshamy.kz قازاقپارات سايتىنا سىلتەمە جاساپ.
ءبىر بولمەلى، ەكى جانە ءۇش بولمەلى پاتەرلەرگە ورنالاسقانداردىڭ اراسىندا ءورت ءسوندىرۋشى قۇتقارۋشىلار، بولىمشە كومانديرلەرى، ءورت ءسوندىرۋ جانە اۆاريالىق-قۇتقارۋ قىزمەتىنىڭ باس ماماندارى مەن ينسپەكتورلار بار.
«تاۋەلسىزدىكتىڭ 30 جىلدىعىندا مەن ءۇشىن قالانىڭ جاڭا اۋدانىندا جاڭا قىزمەتتىك پاتەرلەردىڭ كىلتتەرىن تاپسىرۋ - ۇلكەن مارتەبە. تۇرمىس جاعدايلارىن جاقسارتۋ گارنيزون قىزمەتكەرلەرى جۇمىسىنىڭ تيىمدىلىگىن ارتتىرۋعا ىقپال ەتەتىنى ءسوزسىز. جاڭا دەپولاردى سالۋ كەزىندە قىزمەتتىك تۇرعىن ءۇي ءبولۋ مۇمكىندىگىنىڭ پايدا بولۋىمەن ءاربىر قىزمەتكەردى تۇرعىن ۇيمەن قامتاماسىز ەتۋ تۋرالى شەشىم قابىلدانادى. اكىمدىكتىڭ قولداۋىمەن جەكە قۇرامنىڭ تۇرۋى ءۇشىن ءۇي-جاي قاراستىرىلعان جاڭا ءورت ءسوندىرۋ بولىمدەرى سالىنىپ جاتىر. ءبىز مەملەكەت پەن جالپى قوعام تالاپ ەتەتىن اۆاريالىق-قۇتقارۋ قىزمەتتەرىن دامىتۋدىڭ جاڭا كەزەڭىن ەسكەرە وتىرىپ، ءورت سوندىرۋشىلەردىڭ الەۋمەتتىك سيپاتتاعى ماسەلەلەرىن كەزەڭ-كەزەڭىمەن شەشۋ ءۇشىن بۇكىل كۇش-جىگەرىمىزدى سالامىز»، - دەدى سامات اساينوۆ.
ەكىنشى مامانداندىرىلعان ءورت ءسوندىرۋ ءبولىمى بولىمشەسىنىڭ كومانديرى، ازاماتتىق قورعاۋ اعا سەرجانتى قاناعاتوۆ نۇرجان دەپارتامەنت باسشىلىعىنا العىسىن ءبىلدىرىپ، بارشا قازاقستاندىقتارعا اشىق اسپان، اماندىق پەن دەنساۋلىق تىلەدى.