ەلىمىزدە 4 پوزيتروندى-ەميسسيالىق توموگراف جۇمىس ىستەپ تۇر.
بۇگىن قازاقستان رەسپۋبليكاسى پرەمەر-مينيسترىنىڭ ورىنباسارى ەرالى توعجانوۆتىڭ توراعالىعىمەن مەملەكەتتىك، جەكە قۇرىلىمدار مەن سالانىڭ جەتەكشى ماماندارىنىڭ قاتىسۋىمەن يادرولىق مەديسينانى دامىتۋ ماسەلەلەرى جونىندە كەڭەس ءوتتى.
ۆيسە-پرەمەر قازاقستانداعى يادرولىق مەديسينا ىستەرىنىڭ اعىمداعى جاي-كۇيىن، تۇيتكىلدى ماسەلەلەرى مەن پەرسپەكتيۆالىق باعىتتارىن كوتەردى. دەنساۋلىق ساقتاۋ ۆيسە-مينيسترى اجار عينيات بايانداما جاسادى.
ول دياگنوستيكانىڭ زاماناۋي ءادىسىن جۇرگىزۋدى قاجەت ەتەتىن ونكولوگياسى بار پاسيەنتتەردىڭ سانى ارتىپ كەلە جاتقانىن اتاپ ءوتتى.
ءقازىر قازاقستاندا 4 پوزيتروندى-ەميسسيالىق توموگراف (پەت-ورتالىق) جۇمىس جاسايدى: نۇر – سۇلتان قالاسىندا – 2، الماتىدا – 1 جانە سەمەيدە - 1.
پرەمەر-مينيستردىڭ ورىنباسارى ونكولوگيالىق اۋرۋلارمەن كۇرەس جونىندەگى كەشەندى جوسپاردىڭ «تيىمدىلىگى جوعارى ەرتە دياگنوستيكا» باعىتى اياسىندا الداعى 2 جىلدا زەرتتەۋدىڭ يننوۆاسيالىق ادىستەرى ءۇشىن نۇر-سۇلتان، شىمكەنت، اقتوبە جانە قاراعاندى قالالارىندا تاعى 4 پەت-ورتالىق اشۋ جوسپارلانعانىن اتاپ ءوتتى.
كەڭەس قورىتىندىسى بويىنشا ەرالى توعجانوۆ پەت-ورتالىقتار جەلىسىن كەڭەيتۋ ارقىلى وتاندىق يادرولىق مەديسينانى دامىتۋدىڭ جول كارتاسىن ازىرلەۋدى تاپسىردى.
سونداي-اق، ءمجا شەڭبەرىندە ىنتىماقتاستىققا مۇددەلى جاۋاپتى مەملەكەتتىك كومپانيالار قاتارىنان ۆەدومستۆوارالىق جۇمىس توبىن قۇرۋدى جۇكتەدى.