جىل باستالعاندا كوپ ادام ودان ۇلكەن ءۇمىت كۇتەدى. بىرەۋلەر ءۇشىن بۇل ءومىردى "تازا پاراقتان" باستاۋعا مۇمكىندىك بولسا، ەندى بىرەۋلەر ءۇشىن وتكەنگە كوز جۇگىرتىپ، الداعى باعىتتى ايقىنداۋدىڭ ءساتى. وسى تۇستا كەي ادامدار جىل سايىن وزىنە ەسەپ بەرىپ، جەتكەن جەتىستىكتەرىن سارالاپ، كەلەسى جىلعا ناقتى ماقساتتار قويىپ، ارنايى ۋاقىت بولەدى. ولار ءۇشىن جىلدىق جوسپار - جاي عانا ءتىزىم ەمەس، ءومىرىن جۇيەلەۋدىڭ ءبىر جولى.
الايدا جاڭا جىل باستالىپ كەتسە دە، وتكەن جىلدى قورىتىندىلاماعان، الداعى جىلعا ەشقانداي جوسپار قۇرماعان، ءتىپتى مۇنى ادەتكە اينالدىرماعان ادامدار دا از ەمەس. كەيبىرى ماقسات قويۋدى ارتىق جۇمىس سانايدى، ەندى ءبىرى "ءبارى ءوز رەتىمەن بولادى" دەگەن ۇستانىمدى ءجون كورەدى.
سوندا ءبىر جىلعا ماقسات قويۋ راسىمەن قاجەت پە؟ ءبىر جىلعا جوسپار جازۋ قانشالىقتى "جۇمىس ىستەيدى"؟ مۇنىڭ سىرىن Aqshamnews.kz ءتىلشىسى زەرتتەپ كوردى.
كەي ادامدار (ءتىپتى كەيبىر بيزنەس وكىلدەرى دە) ءۇشىن ماقسات قويۋ - بوس اۋرەشىلىك، ۋاقىتتى تەككە كەتىرۋ سياقتى كورىنۋى مۇمكىن. ولاردىڭ ويىنشا، جوسپار كوپ ويلانۋعا يتەرمەلەپ، ناقتى ارەكەتكە كەدەرگى جاسايدى. مۇنداي ادامدار كوبىنە تەك سىرتقى قىسىم بولعاندا عانا ماقسات ويلاپ تابادى. ءبىراق بۇل ءومىردى جاقسارتۋعا دەگەن ىشكى قاجەتتىلىكتەن ەمەس.
دەگەنمەن شىن مانىندە، ماقساتسىز ءوسۋ بولمايدى. ادام بالاسىنىڭ ومىرىندە ەشتەڭەنى وزگەرتكىسى كەلمەيتىن، جاقسارتۋعا ۇمتىلمايتىن كەزەڭى مۇلدە بولمايدى دەسەك، قاتەلەسپەيمىز.
سوندىقتان جاۋاپ قاراپايىم: ماقسات قويۋ - مىندەتتى ەمەس.
ءبىراق ەگەر ءومىردى جاقسى جاققا وزگەرتكىڭ كەلسە، دامىعىڭ كەلسە، ءوزىڭدى جاڭا دەڭگەيدە كورگىڭ كەلسە، ونسىز تاعى بولمايدى. ەڭ باستىسى، ماقساتتى جاي عانا ارمانداپ قويماي، ونى ناقتى ءارى سانالى تۇردە تۇجىرىمداۋ قاجەت.
وسى ماقالادا ءبىز وتكەن جىلدى قالاي دۇرىس قورىتىندىلاۋ كەرەگىن، جاڭا جىلعا ماقساتتى قالاي تاڭداپ، وعان جەتۋ جولىن قالاي جوسپارلاۋعا بولاتىنىن قاراستىرامىز.
وتكەن جىلدى قالاي قورىتىپ، باعالاۋ كەرەك؟
جىلدىق جوسپارلاۋدى وتكەن جىلدى سارالاۋدان باستاعان دۇرىس. بۇل مەكتەپتەگى "مەن بۇل جىلدى قالاي وتكىزدىم؟" دەگەن شىعارماعا ۇقسايدى. ول ءۇشىن بۇل ىستە تاجىريبەسى بار ماماندار ەكى قاراپايىم جاتتىعۋدى ۇسىنادى
1-جاتتىعۋ: ءۇش سۇراققا جاۋاپ بەرۋ
- 2025 جىلعى ەڭ جارقىن جەتىستىگىم نەمەسە وقيعام قانداي بولدى؟
- نەنى ىستەۋ ەڭ قيىن بولدى، العا قويعان ماقساتتىڭ قايسىسى جۇزەگە اسپادى؟
- 2026 جىلعا نەنى الىپ وتكىم كەلەدى، ال نەنى 2025 جىلى قالدىرعىم كەلەدى؟
العاشقى سۇراققا ۇلكەن جەتىستىكتەر دە، ۇساق، ءبىراق ماڭىزدى وزگەرىستەر دە كىرۋى مۇمكىن: ساياحات، قىزمەتتەگى ءوسۋ، جاڭا داعدى، ءۇي جوندەۋ، ءتىپتى، كوپتەن كۇتكەن پەردەنىڭ الىنۋى. "جارقىن" وقيعا شەڭبەرىنە نەنى جاتقىزۋعا بولاتىنىن ماقساتى مەن جوسپارىن جازۋشى ءوزى تاڭدايدى.
ەكىنشى سۇراقتا قيىندىقتار مەن ورىندالماعان ارماندارعا توقتالعان ءجون. كەيدە ەڭ جارقىن وقيعا ەڭ اۋىر سىناق تا بولۋى مۇمكىن - بۇل قالىپتى جاعداي.
ءۇشىنشى سۇراقتا الدىڭعى جاۋاپتارعا قاراپ، 2026 جىلى ساعان نە قاجەت ەكەنىن انىقتايسىڭ.
2-جاتتىعۋ: ءوزىڭدى ماقتاۋ
ءوزىڭدى ماقتاۋعا بولاتىن 30 نارسەنىڭ ءتىزىمىن جازۋ. بۇل تاپسىرمانى شىن كوڭىلدەن، ىقىلاس قويىپ جازعان جاقسى، ۇساق-تۇيەك دەپ بولمە. بۇل جاتتىعۋ وڭاي كورىنگەنىمەن، كوپ ادامعا قيىن.
ەكى جاتتىعۋدى دا قاعاز الىپ، قالاممەن جازعان دۇرىس. بۇل ەموسيانى سەزىنۋگە، وتكەندى شىن مانىندە تۇيسىنۋگە كومەكتەسەدى.
مۇنداي "اۋديت" 2026 جىلعا دۇرىس باستاپقى نۇكتە قويۋ ءۇشىن قاجەت.
جىلعا ماقساتتى قالاي تاڭداۋ كەرەك؟
بۇل جاتتىعۋلار وتكەن جىلى سەنى العا جەتەلەگەن ماقساتتاردى انىقتاۋعا كومەكتەسەدى. مۇنداي ماقساتتار:
- كاسىبي نەمەسە جەكە دامۋعا،
- تابىسقا،
- قاناعات سەزىمىنە،
- ەنەرگياعا اكەلەدى.
ەگەر 2025 جىلى بەلگىلى ءبىر باعىتتا ەڭبەك ەتىپ، ودان كۇش العان بولساڭىز، سول باعىتتى جالعاستىرۋعا بولادى. بۇل - 2026 جىلعا ماقسات قويۋداعى ءبىرىنشى شەكارا.
ەكىنشى شەكارادا - ورىندالماعان ماقساتتار تۇرادى. ولار وكىنىش سەزىمىن تۋدىرۋى مۇمكىن. بۇل قالىپتى. وزىڭە سۇراق قوي:
- بۇل ماقسات ماعان شىنىمەن كەرەك پە؟
- بۇل - مەنىڭ قالاۋىم با، الدە سىرتتان تاڭىلعان با؟
- ول ماعان بۇرىنعى ماقساتتارىم سياقتى قۋات بەرە مە؟
سوسىن ارماندارىڭ ءبارىن قايتادان "مەن..... بولعانىن قالايمىن...فورماتىندا جازۋ كەرەك.
قانشا ماقسات قويۋ كەرەك؟
ەڭ الدىمەن، ادام ءوزىنىڭ رەسۋرسىن باعالاپ السا ءجون:
- ۋاقىت
- اقشا
- ەنەرگيا
- ءبىلىم
- قولداۋ
كۇنىنە ورتا ەسەپپەن 2-3 ساعات قانا بوس ۋاقىت قالاتىنىن ەسكەرسەك، جاڭا ماقسات - ەسكى ءبىر ادەتتەن باس تارتۋ دەگەن ءسوز.
ماقساتتاردى ءومىر سالالارى بويىنشا بولگەن ءجون:
- دەنساۋلىق
- مانساپ
- قارىم-قاتىناس
- قارجى
- شىعارماشىلىق / جەكە ءىس
ادەتتە 1-2 سالا "اقساپ" تۇرادى. سولارعا باسىمدىق بەر.
2–3 ماڭىزدى ماقسات - جەتكىلىكتى.
ەڭ باستىسى، ادام وزىنە كۇش-قۋات بەرەتىن ماقساتتى تاڭداۋ كەرەك.
جىلدىق ماقسات قويۋ ادىستەرى:
- SMART - ناقتى، ولشەنەتىن، قولجەتىمدى، ماڭىزدى، مەرزىمى بار ماقسات
- HARD Goals - ەموسياعا اسەر ەتەتىن، شابىتتاندىراتىن، كۇردەلى ماقساتتار
- OKR - ماقسات + ولشەنەتىن ناتيجەلەر
- ءومىر دوڭگەلەگى - ءومىر سالالارىن تەڭگەرۋ
- WOOP - قالاۋ، ناتيجە، كەدەرگى، جوسپار
- كەرى جوسپارلاۋ - سوڭعى ناتيجەدەن باستاپ قادامداۋ
- "ماقساتتار اعاشى" - ۇلكەن ماقسات شاعىن ارەكەتتەردەن باستالادى.
قىسقا قادامداردى ۇزاق ماقساتپەن قالاي بايلانىستىرۋ كەرەك؟
ۇلكەن ماقسات مىندەتتى تۇردە:
- كەزەڭدەرگە (اي، توقسان)
- شاعىن ارەكەتتەرگە (15-30 مينۋت) بولىنۋگە ءتيىس.
كۇندەلىكتى ارەكەت مىنا سۇراققا جاۋاپ بەرۋى كەرەك:
"بۇل مەنى ماقساتقا قالاي جاقىنداتادى؟"
ماقساتتان اينىماي ءجۇرۋ ءۇشىن نە ىستەۋ كەرەك؟
- ماقساتىڭدى كوز الدىڭدا ۇستا
- قاۋىمداستىق نەمەسە سەرىك تاپ
- كۇن سايىن از دا بولسا ارەكەت ەت
- دەمالىستى جوسپارعا قوسۋدان قورىقپا
- ەگەر ماقسات مۇلدە شابىت بەرمەسە - ودان باس تارتۋعا دا بولادى