الماتى ەكونوميكالىق ءوسۋدى قالالىق ورتانى جاقسارتۋمەن ۇشتاستىرا وتىرىپ، قارقىندى دامىپ كەلەدى. مەگاپوليستە تۇرعىنداردىڭ ءومىر ساپاسىن ارتتىرۋعا باعىتتالعان ينفراقۇرىلىمدىق جانە الەۋمەتتىك جوبالار بەلسەندى تۇردە جۇزەگە اسىرىلىپ جاتىر.
جىل سوڭىنا دەيىنسكۆەر، اللەيا جانە سەرۋەن ايماعى سىندى ونداعان قوعامدىق كەڭىستىكتى اباتتاندىرۋ جۇمىسى تولىق اياقتالادى. سونىمەن قاتار كولىك ينفراقۇرىلىمى جاڭارتىلىپ جاتىر: ۇزىندىعى 264 كم بولاتىن 318 كوشەدە ورتاشا جوندەۋ باستالدى. جوسپارلانعان 35 كم جاڭا جولدىڭ 25 كم-ى قولدانىسقا بەرىلدى، ال التى كوشەدە قۇرىلىس جۇمىسى جالعاسىپ جاتىر.
الەۋمەتتىك ينفراقۇرىلىم بويىنشا بيىل جىلدىڭ باسىنان بەرى 26 نىسان پايدالانۋعا بەرىلدى، ال جىل سوڭىنا دەيىن تاعى 30 نىساننىڭ قۇرىلىسى اياقتالادى.
پرەزيدەنتتىڭ باستاماسىمەن جۇزەگە اسىرىلىپ جاتقان «كەلەشەك مەكتەپتەرى» ۇلتتىق جوباسى اياسىندا 22 500 ورىنعا ارنالعان 12 جاڭا مەكتەپ سالىندى. ونىڭ جەتەۋى جاڭا وقۋ جىلىندا اشىلدى، قالعان بەسەۋى ەكىنشى وقۋ توقسانىندا پايدالانۋعا بەرىلەدى.
2030 جىلعا دەيىن 32 جاڭا مەديسينالىق مەكەمە سالىنىپ، 14 دەنساۋلىق ساقتاۋ نىسانىن جاڭعىرتۋ جوسپارلانعان. قازىرگى ۋاقىتتا الماتىدا 8 مەديسينالىق نىساننىڭ قۇرىلىسى قولعا الىنعان.