الماتىدا رەسپۋبليكا كۇنىنە وراي كينولوگيالىق ءىس-شارا — «قازاقى تازى» مونو تۇكىمدى كورمەسى جانە ۇلتتىق دارەجەدەگى قازاقستان كينولوگتار وداعىنىڭ قۋبوگى ءوتىپ جاتىر. ءىس-شارانى «قازاقستان كينولوگتار وداعى» رەسپۋبليكالىق قوعامدىق بىرلەستىگى ۇيىمداستىردى.
قازاقستان كينولوگتار وداعىنىڭ پرەزيدەنتى باۋىرجان سەرىكقاليدىڭ ايتۋىنشا، قازاقى تازى — قازاقستاننىڭ مادەني مۇراسى رەتىندە تانىلعان ەرەكشە تۇقىم. ال 2024 جىلى حالىقارالىق كينولوگيالىق فەدەراسيا قازاق تازىسىن الدىن الا يت تۇقىمى رەتىندە تانۋ تۋرالى شەشىم قابىلدادى.
- ءقازىر ءبىز ساپالى تازىلاردىڭ سانىن كوبەيتۋگە ارنالعان باعدارلاما بويىنشا دۇرىس كەلە جاتىرمىز. ولاردىڭ سانى ءوسىپ كەلەدى. تازىنىڭ حالىقارالىق دەڭگەيدە مويىندالۋى - ەلىمىز ءۇشىن ماڭىزدى وقيعا. ەندى وزگە مەملەكەتتەر بۇل تۇقىمدى وزىنە الا المايدى. سونداي-اق دۇنيەجۇزى تازى تۇقىمىن جاقسىراق تاني ءتۇستى، - دەدى ول.
مونو تۇقىمدى كورمەدە ەلىمىزدىڭ ءار وڭىرىنەن كەلگەن 60-تان استام تازى قاتىسىپ جاتىر. باعدارلاما تازىنىڭ تۇقىمىن جان-جاقتى باعالاۋعا باعىتتالعان. يتتەر بەكىتىلگەن ستاندارتتارعا سايكەس تەكسەرىلەدى دە، ۇلتتىق جانە حالىقارالىق ساناتتاعى تورەشىلەر شەشىمى بويىنشا ۇزدىكتەرى انىقتالادى.
كورمەگە ارنايى يتتەرىن قاتىستىرىپ وتىرعان داۋرەن جۇماعالييەۆ تازىنىڭ ەرەكشەلىگى تۋرالى ايتتى.
- وقۋشى كەزدە اتامىزدىڭ جانىندا ءجۇرىپ، ونىڭ ەكى تازىسىنا قىزىعاتىن ەدىم. وسە كەلە وسى ىسپەن ايلانىسا باستاپ، ءقازىر 20 شاقتى تازىم بار. مىنەزدەرى ءارتۇرلى بولادى - سابىرلى، ويىنقۇمار، قارۋلى، جۇيرىك جانە باسقا دا. ءبىراق ەشقايسىسىندا سۇعاناقتىق بولمايدى. اقىلدى ءارى العىر، ءيىسى بولمايتىن تازا جانۋار. ادامدى تىستەمەيدى. بوتەن ادام كەلسە، ۇرەدى دە ۇياسىنا كىرىپ كەتەدى - اقىلدىعى سوندا. سونىمەن قاتار تازىنى بايلاپ قويۋعا بولمايدى، كولىكپەن، اتپەن تۇزگە شىعارىپ تۇرۋ كەرەك. جۇگىرىپ تۇرسا، بابىندا بولادى. ءبىر ورىندا وتىرا بەرسە، تەز سەمىرىپ، مايتابان بولادى، - دەدى داۋرەن جۇماعالييەۆ.