الماتىدا ءوتىپ جاتقان «ەۋروپالىق وداق – ورتالىق ازيا» ەكىنشى ەكونوميكالىق فورۋمى اياسىندا پرەمەر-مينيستر ءاليحان سمايىلوۆ ەۋروپالىق قايتا قۇرۋ جانە دامۋ بانكىنىڭ پرەزيدەنتى وديل رەنو-باسسو جانە ەۋروپالىق ينۆەستيسيالىق بانكتىڭ ۆيسە-پرەزيدەنتى تەرەزا چەرۆينسكايامەن كەزدەسۋلەر وتكىزدى، دەپ حابارلايدى Almaty-akshamy.kz.
ەقدب باسشىسىمەن كەلىسسوزدەر بارىسىندا قر-داعى ءىرى ينۆەستيسيالىق جوبالاردى ىسكە اسىرۋ، سونىڭ ىشىندە اۆتوجولداردى رەكونسترۋكسيالاۋ، كارىز-تازارتۋ قۇرىلىستارى مەن ەنەرگەتيكالىق قۋاتتاردى جاڭعىرتۋ ماسەلەلەرى تالقىلاندى.
ءاليحان سمايىلوۆ قازاقستان بانكپەن ءوزارا ءىس-قيمىلدىڭ ستراتەگيالىق سيپاتىن جانە ونىڭ رەسپۋبليكانىڭ دامۋىنا قوسقان ۇلەسىن جوعارى باعالايتىنىن اتاپ ءوتتى.
«قازىرگى ۋاقىتتا ءبىز ەكونوميكالىق ماسەلەلەردىڭ كەڭ اۋقىمىن قامتيتىن تىعىز بايلانىستار ورناتتىق جانە ونى ودان ءارى دامىتۋدى كوزدەپ وتىرمىز. قازاقستان مەن ەقدب اراسىنداعى ىنتىماقتاستىقتى ساپالى جاڭا دەڭگەيگە شىعارۋعا بولاتىنىنا سەنىمدىمىن»، — دەدى پرەمەر-مينيستر.
ماسەلەن، جاقىن كۇندەرى ەقدب باسقارۋشىلار كەڭەسىنىڭ جىل سايىنعى وتىرىسى ءوتىپ، ونىڭ شەڭبەرىندە قازاقستانعا جەكە ينۆەستيسيالىق سەسسيا ارنالدى. ءاليحان سمايىلوۆ بۇل شارانىڭ قازاقستان مەن شەتەلدىك سەرىكتەستەر اراسىنداعى ينۆەستيسيالىق ىنتىماقتاستىققا جاڭا سەرپىن بەرەتىنىنە سەنىم ءبىلدىردى.
«قازاقستان ۇكىمەتى ەقدب-مەن ەكىجاقتى ماسەلەلەردىڭ كەڭ اۋقىمى بويىنشا ارىپتەستىكتى تەرەڭدەتۋگە دايىن ەكەنىن راستايدى»، — دەپ اتاپ ءوتتى ول.
ءوز كەزەگىندە وديل رەنو-باسسو ەقدب قازاقستانداعى جوبالارعا بەلسەندى اتسالىسىپ جاتقانىن اتاپ ءوتتى.
«ءبىز ىنتىماقتاستىعىمىزدى ودان ءارى جالعاستىراتىنىمىزعا قۋانىشتىمىز. «جاسىل» ەنەرگەتيكانى، جەكە سەكتوردى جانە ينفراقۇرىلىمدى دامىتۋ جوبالارى ءبىزدىڭ باسىمدىقتارىمىز بولىپ قالا بەرەدى. سونىمەن قاتار ءبىز ەلدىڭ بانك سەكتورىن دامىتۋعا ءارى قاراي ءوز ۇلەسىمىزدى قوساتىن بولامىز»، — دەدى وديل رەنو-باسسو.
تەرەزا چەرۆينسكايامەن كەزدەسۋدە كولىك-لوگيستيكا سالاسىنداعى جانە اگروونەركاسىپتىك كەشەندەگى ىنتىماقتاستىق، اتاپ ايتقاندا، ينۆەستيسيالىق جانە تەحنولوگيالىق جوبالاردى جۇزەگە اسىرۋ ماسەلەلەرى تالقىلاندى.
پرەمەر-مينيستر قازاقستان ەۋروپالىق ينۆەستيسيالىق بانكتىڭ ءبىزدىڭ ەلمەن ىنتىماقتاستىقتى كەڭەيتۋ نيەتىن جوعارى باعالايتىنىن اتاپ ءوتتى. وسىعان بايلانىستى قازاقستاندا ەيب كەڭسەسىنىڭ اشىلۋى ينۆەستيسيالىق پورتفەلدى جانە بانكتىڭ وڭىردەگى قىزمەتىن ايتارلىقتاي دامىتۋعا مۇمكىندىك بەرەدى.
«قازاقستان ۇكىمەتى ەيب-پەن ءوزارا مۇددەلى ماسەلەلەردىڭ كەڭ اۋقىمى بويىنشا ارىپتەستىكتى تەرەڭدەتۋگە دايىن ەكەنىن بىلدىرەدى. ەڭ باسىم باعىتتاردىڭ ءبىرى – «جاسىل» ەكونوميكانى دامىتۋدى ىنتالاندىرۋ»، — دەدى ءاليحان سمايىلوۆ.
ول سونداي-اق ەيب-تى «جاسىل» قارجىلاندىرۋ جانە يننوۆاسيالارمەن الماسۋ تۇرعىسىنان استانا حالىقارالىق قارجى ورتالىعىمەن تىعىز ىنتىماقتاستىق ورناتۋ مۇمكىندىگىن قاراستىرۋعا شاقىردى. ءوز كەزەگىندە تەرەزا چەرۆينسكايا قازاقستاندى ەكونوميكالىق كووپەراسيا سالاسىندا جاقسى سەرىكتەس رەتىندە تانيتىنىن اتاپ ءوتتى.
«ءبىز بۇل وڭىردە ۇزاق ۋاقىت جۇمىس ىستەپ كەلەمىز جانە «جاسىل» ەكونوميكا باعىتىنداعى ىنتىماقتاستىقتى ودان ءارى تەرەڭدەتۋدى جوسپارلاپ وتىرمىز. بۇل «جاسىل» ەنەرگيانى ءوندىرۋ مەن تاسىمالداۋعا، ءارتۇرلى نىساندار مەن كولىك سالاسىنىڭ ەنەرگيا تيىمدىلىگىن ارتتىرۋعا قاتىستى. بۇل ءتيىستى ينفراقۇرىلىم قالىپتاستىرۋدى جانە دامىتۋدى قاجەت ەتەدى. ءبىز سونداي-اق ورتا كاسىپورىندارمەن تىعىز جۇمىس ىستەۋگە دايىنبىز»، — دەدى تەرەزا چەرۆينسكايا.