الماتى قالاسىندا «سامۇرىق-قازىنا» قولداۋىمەن 2،3 ملرد تەڭگەگە 20-عا جۋىق الەۋمەتتىك جوبا ىسكە اسىرىلۋدا.
الماتىدا «سامۇرىق-قازىنا» اق كومپانيالار توبىنىڭ ءبىرىڭعاي قايىرىمدىلىق وپەراتورى - «Samruk-Kazyna Trust» قورىنىڭ قىزمەتى تانىستىرىلدى. «الماتى-ارەنا» كوپسالالى سپورت كەشەنىنە جينالعان ب ا ق قىزمەتكەرلەرى مەن قوعام بەلسەندىلەرى ەرەكشە بالالارمەن بىرگە كوڭىلدى ەستافەتاعا قاتىستى.
شارادا «Samruk-Kazyna Trust» الەۋمەتتىك جوبالاردى دامىتۋ قورى ارقىلى قارجىلاي قولداۋ تاپقان ءبىرقاتار قايىرىمدىلىق جوبالارىنىڭ تاربيەلەنۋشىلەرى مەن ولاردىڭ اتا-انالارى باس قوستى.
«بالالىق شاق – ءبىر رەت عانا بولاتىن، قايتا ورالمايتىن، ساعىنا ەسكە الاتىن عاجايىپ الەم ىسپەتتەس. وسى ورايدا، بىرنەشە جىل بويى «Samruk-Kazyna Trust» الەۋمەتتىك جوبالاردى دامىتۋ قورى بالالاردىڭ سەنىمدى سەرىگىنە اينالعانىن ايتقىم كەلەدى. بۇگىن بىرنەشە جوبادا قامتىلعان جەتكىنشەكتەرمەن كەزدەسىپ وتىرسىزدار. بولاشاقتا باسقا وڭىرلەردە دە وسىنداي شارالاردى ۇيىمداستىرۋ جوسپاردا بار»، - دەپ اتاپ ءوتتى شارانىڭ اشىلۋ راسىمىندە «Samruk-Kazyna Trust» قورىنىڭ باس ديرەكتورى الفيا ادييەۆا.
مىسالى، «سالاماتتى بولاشاق» جوباسى 2018 جىلدان باستاپ كومپانيالار توبى اتىنان قارجىلاندىرىلىپ كەلەدى. جوبا اياسىندا ەلىمىزدىڭ 21 قالاسى مەن ەلدى مەكەنىندە تەگىن ينكليۋزيۆتى جانە بەيىمدەلگەن سپورت سەكسيالارىنىڭ جەلىسى قۇرىلىپ، 1 100 ەرەكشەلىگى بار بالا سپورتتىڭ 12 تۇرىنە قاتىسۋ مۇمكىندىگىنە يە بولدى.
جاقىندا عانا قوردىڭ قامقورشىلىق كەڭەسى ماقۇلداعان «All ability Camp» سپورتتىق لاگەرى» جوباسىندا باسقا وسكەلەڭ ۇرپاق وكىلدەرىمەن قاتار، «سامۇرىق-قازىنا» قۇرامىنداعى كاسىپورىن قىزمەتكەرلەرىنىڭ ەرەكشە بالالارىنىڭ جازعى دەمالىسىن ۇيىمداستىرۋ جوسپارلانعان.
سيرەك كەزدەسەتىن سىرقاتقا شالدىققان بالالارعا كومەك بەرۋگە باعىتتالعان «بالالارعا ءومىر سىيلا»، اتا-اناسىنىڭ قامقورلىعىنسىز قالعان بالالارعا زاڭگەرلىك قولداۋ كورسەتۋگە ارنالعان «جەتىمى جوق قازاقستان» جانە اۋتيزم دەرتىنە دۋشار بولعان جانۇيالارعا جاردەم بەرۋدى ماقسات تۇتقان «ءاۋتيزمدى جەڭەمىز» وڭالتۋ ورتالىقتارى سياقتى جوبالار دا وڭتۇستىك شاھاردا جۇزەگە اسۋدا.
«داۋن سيندرومى بار بالالارعا ارنالعان ورتالىق اشۋ جانە جاراقتاندىرۋ، داۋن سيندرومى بار بالالار مەن جاسوسپىرىمدەردى قوعامعا الەۋمەتتىك بەيىمدەۋ مەن ىقپالداستىرۋعا جاردەمدەسۋ» جوباسى اياسىندا الماتىداعى ورتالىق پەداگوگتارىنىڭ شتاتى كەڭەيتىلىپ، شەتەلدەن بىلىكتى ماماندار شاقىرۋ جانە داۋن سيندرومى بار ادامداردى جۇمىسپەن قامتۋ كوزدەلۋدە.
شاراعا قاتىسقان ۇەۇ وكىلدەرى وزدەرىنىڭ جوبالارى تۋرالى اڭگىمەلەپ، «سامۇرىق-قازىنا» كومپانيالار توبىنىڭ كورسەتكەن قولداۋىنا العىس ايتتى.
2016-2023 جىلدار ارالىعى «Samruk-Kazyna Trust» قايىرىمدىلىق قىزمەتى اياسىندا مەگاپوليستە دەنساۋلىق ساقتاۋ مەن ءبىلىم، حالىقتىڭ الەۋمەتتىك وسال توپتارىن قولداۋ مەن بۇقارالىق سپورتتى دامىتۋ جانە الەۋمەتتىك كاسىپكەرلىك باعىتتارىندا جالپى سوماسى 2،3 ملرد تەڭگەگە 19 جوباعا جۇزەگە اسىپ وتىر.