قازاقستاندا پرەزيدەنتتىك جاستار كادر رەزەرۆىنە ءتورتىنشى ىرىكتەۋ باستالدى
2025 جىلدىڭ 1 شىلدەسىنەن باستاپ قازاقستاندا پرەزيدەنتتىك جاستار رەزەرۆىنە ىرىكتەۋدىڭ ءتورتىنشى – جاڭا كەزەڭى باستالماق. دارىندى جاستار وسى باعدارلاما ارقىلى ءوزىن كورسەتىپ، مەملەكەتتىك قىزمەتتە كارەرا جاساي الادى. الماتىنىڭ وڭىرلىك كوممۋنيكاسيالار قىزمەتىندە وتكەن پرەسس-كونفەرەنسيادا، قازاقستان رەسپۋبليكاسىنىڭ مەملەكەتتىك قىزمەت ىستەرى اگەنتتىگى دەپارتامەنتىنىڭ باسشىسى ماقسات جاڭبىرشين الداعى ىرىكتەۋ جۇمىسىنىڭ بارىسىن، ونىڭ كەزەڭدەرىن، كۆوتالار مەن وزگەرىستەرى جايلى ايتتى.
پرەزيدەنتىمىزدىڭ باستاماسىمەن قۇرىلعان پرەزيدەنتتىك جاستار رەزەرۆى دارىندى، جاڭاشا ويلايتىن جاستاردى مەملەكەتتىك باسقارۋعا تارتۋدى كوزدەيدى.
باعدارلاما باستالعالى بەرى ىرىكتەۋ جۇمىسى ءۇش رەت – 2019 جىلى، 2021 جىلى جانە 2023 جىلى وتكەن. وعان 60 مىڭنان استام جاستار قاتىسىپ، ولاردىڭ ىشىنەن 400 (2019 جىلى -300، 2001، 2023 جىلى – 50) ادام رەزەرۆكە ىرىكتەلىپ الىندى. ولاردىڭ شامامەن 80 پايىزى، ياعني 318ء-ى مەملەكەتتىك ورگاندار مەن ءارتۇرلى ۇيىمدارعا جۇمىسقا ورنالاسقان.
2025 جىلى ءتورتىنشى رەت ىرىكتەۋ جۇمىسى وتپەك ەندى. ونىڭ باستى ەرەكشەلىگى – كانديداتتاردى سالا-سالاعا بىردەي ەتىپ بولەدى. ءار باعىتقا كۆوتا بەرىلەدى. ىرىكتەۋ جۇمىسى دا بارىنشا قاتاڭ بولماق.
كانديداتتارعا قويىلاتىن جالپى تالاپ وزگەرگەن جوق:
• 35 جاسقا دەيىنگىلەر،
• جوعارى ءبىلىمى بولۋى،
• جوق دەگەندە بەس جىل جۇمىس ءوتىلى بولۋى،
• قازاق ءتىلىن B1 دەڭگەيىنەن كەم بىلمەۋى.
ىرىكتەۋگە قاتىسپايتىندار
• پرەزيدەنتتىڭ ءوزى تاعايىنداعاندار،
• ساياسي قىزمەتكەرلەر،
• «ا» كورپۋسىنداعى اكىمشىلىك قىزمەتكەرلەر،
• كادرلىق رەزەرۆكە كىرىپ ۇلگەرگەندەر.
ىرىكتەۋ جۇمىسى 2025 جىلدىڭ شىلدە ايىنان قازان ايىنا دەيىنگى ارالىقتا التى كەزەڭ بويىنشا وتەدى:
I كەزەڭ (1–30 ماۋسىم):
ارناۋلى اقپاراتتىق جۇيە ارقىلى ونلاين قۇجات قابىلداۋ.
II كەزەڭ (2–3، 9–10 تامىزدا):
ساندىق جانە ماتىندىك اقپاراتپەن جۇمىس ىستەي الاتىن قابىلەتىن باعالاۋ. كانديداتتاردىڭ بارلىعى تالاپ بويىنشا ماتىندىك تەكستتەن وتەدى. ءار سالادان ۇزدىك شىققانداردىڭ 50 پايىزى ساندىق تەكست تاپسىرادى.
سوڭىنا قاراي 600 كانديدات كەلەسى كەزەڭگە وتەدى. (ءار سالادان جوق دەگەندە 100-دەن كانديدات وتپەك).
III كەزەڭ (16–17 تامىزدا):
ونلاين-ەسسە فورماتىندا تاپسىرما ورىندايدى. سوڭىنا تامان 300 كانديدات كەلەسى كەزەڭگە ءوتىپ، قارىم- قابىلەتىنە باعا بەرەدى.
IV كەزەڭ (22 تامىز بەن 3 قازان ارالىعى):
قوس كەزەڭنەن تۇراتىن قابىلەتىنە باعا بەرۋ ءىس-شاراسى.
• اسسەسسمەنت-ورتالىق (22–28 تامىز) مەملەكەتتىك باسقارۋ اكادەمياسىندا وتەدى. ليدەرلىك جاعىنا، ساراپتاي الاتىن، ادامدى يلاندىرا الاتىن قابىلەتى مەن بەلسەندىلىگىنە قارايدى،
• HR-مەنەدجەرمەن قابىلەتىن تەكسەرەتىن سۇقبات الۋ (23–28 قىركۇيەكتە). سوڭىندا 150 كانديدات ارى قاراي قاتىسادى
V كەزەڭ (8–15 قازان):
ەكسپەرتتىك كوميسسيادا سۇقباتتاسىپ شىققان سوڭ، جۇزگە جۋىق كانديدات قانا قالادى. وسىلاردىڭ ءتىزىمىن كەيىن ۇلتتىق كوميسسياعا ۇسىنادى.
VI كەزەڭ (25 قازانعا دەيىن):
ۇلتتىق كوميسسيا ەڭ ۇزدىك 50 كانديداتتى پرەزيدەنتتىك جاستار رەزەرۆىنە قابىلداۋ تۋرالى شەشىم شىعارادى.
پرەسس-كونفەرەنسيانىڭ سوڭىندا ماقسات جاڭبىرشييەۆ جاستارعا ارناپ ءسوز سويلەيدى:
«بۇگىنگى اقپاراتتىق الاڭدى پايدالانىپ، جاستاردى ەلگە ادال قىزمەت ەتىپ، وسى ىرىكتەۋگە اتسالىسۋعا شاقىرامىن. مەملەكەتتىك اپپاراتقا ءبىلىمدى، ەڭبەكقور، وتان الدىنداعى مىندەتىن تۇسىنەتىن جاستار كەرەك. اگەنتتىكتىڭ ءبىر مىندەتى دە – مەملەكەتتىك قىزمەتكەرلەردىڭ جاڭا، كاسىبي بۋىنىن قالىپتاستىرۋ»، - دەپ اتاپ ءوتتى ول.
قۇجاتتى الماتىداعى دوستىق داڭعىلى – 134 مەكەنجايىندا (505 كابينەت)، قازاقستان رەسپۋبليكاسىنىڭ مەملەكەتتىك قىزمەت ىستەرى اگەنتتىگىنىڭ اۋماقتىڭ دەپارتامەنتىندە قابىلدايدى. تەلەفونى: (727) 254 90 31، (727) 254 90 29.
پرەزيدەنتتىك جاستار رەزەرۆى – قازاقستاننىڭ بولاشاعىن بىرگە قالاساتىن جاس ماماندارعا جاسالعان ۇلكەن مۇمكىندىك. ىرىكتەۋ باستالدى. بۇل وعان قاتىساتىن ادامنىڭ مەملەكەتتىك قىزمەتتەگى العاشقى قادامى بولماق.