پوليسيانىڭ 3 قىزمەتكەرىنە ۇكىم شىقتى، ولار قارۋ مەن وق-دارىلەردى ۇرلادى دەپ ايىپتالدى، دەپ حابارلايدى aqshamnews.kz بوستاندىق اۋداندىق سوتىنا سىلتەمە جاساپ.
الماتى قالالىق پوليسيا دەپارتامەنتىنىڭ قىزمەتكەرلەرى ەسەپتەن شىعارىلعان 50-گە جۋىق قارۋدى ۇرلاپ، ولاردى زاڭسىز ساتقان.
ونىڭ ىشىندە كالاشنيكوۆ اۆتوماتى، مىلتىق، ماكاروۆ تاپانشالارى، گراناتالار مەن ءارتۇرلى كاليبردەگى وق-دارىلەر بولعان.
سوت ۇكىمىنە سايكەس، بۇل قىلمىستىق سحەماعا تىل باسقارماسىنا قاراستى اسكەري جانە ارنايى قامتاماسىز ەتۋ ءبولىمىنىڭ اعا ينسپەكتورى م.ج.، پوليسيا دەپارتامەنتىنىڭ كريميناليستى م.ش. جانە جۇرگىزۋشى ن.ا. قاتىسقان. ولار جويۋعا ارنالعان قارۋدى جۇيەلى تۇردە ۇرلاپ، ساتقان دەپ تانىلدى.
"تەرگەۋ بارىسىندا انىقتالعانداي، تىل باسقارماسىنا قاراستى ءبولىمنىڭ اعا ينسپەكتورى سوت ىستەرى بويىنشا ايعاق زات رەتىندە ساقتالعان نەمەسە تاركىلەنگەن اتىس قارۋلارىن الدىمەن زاڭدى تۇردە ەسەپتەن شىعارعان. جويىلۋى ءتيىس قارۋلار شىن مانىندە ۇرلانعان. قالعان ەكى ارىپتەسى (ەكەۋى دە پد قىزمەتكەرلەرى) بۇل قارۋلاردىڭ زاۋىتتىق نومىرلەرىن جويىپ، بوياپ نەمەسە وزگەرتىپ، ساتقان. كەيىن پوليسيا قىزمەتكەرى ولار جويىلدى دەگەن جالعان اقپاراتتى رەسمي تىركەۋلەرگە ەنگىزىپ وتىرعان"، - دەلىنگەن سوت حابارلاماسىندا.
بوستاندىق اۋداندىق سوتىنىڭ ۇكىمىمەن 3 ايىپتالۋشى دا جۇيەلى تۇردە قارۋ ۇرلاپ، ساتۋ ءىسى بويىنشا كىنالى دەپ تانىلدى. سحەمانىڭ ۇيىمداستىرۋشىسى - پوليسيا دەپارتامەنتىنىڭ اعا ينسپەكتورى م.ج. 8 جىلعا، كريميناليست - 5،5 جىلعا، جۇرگىزۋشى - 7 جىلعا باس بوستاندىعىنان ايىرىلدى.
"قىزمەتتىك وكىلەتتىكتەرىن پايدالانىپ، ولار بىرنەشە مارتە الدىن الا ءسوز بايلاسۋ ارقىلى اتىس قارۋى مەن وق-دارىلەردى ۇرلاعان. بۇل قارۋلار ايعاق زات رەتىندە ارنايى قويماعا تاپسىرىلعان. ولار بۇل قارۋلاردى زاڭسىز اينالىمعا شىعارعان، قوعامدىق قاۋىپسىزدىك پەن تارتىپكە قارسى ارەكەتتەر جاساعان، سونداي-اق مەملەكەتتىك قىزمەت پەن باسقارۋ مۇددەسىنە قارسى اۋىر قىلمىستار جاساعان"، – دەلىنگەن سوت ۇكىمىندە.
پوليسەيلەر ارنايى شەندەرىنەن ايىرىلىپ، ەكەۋىنە مەملەكەتتىك قىزمەتتە ءومىر بويى جۇمىس ىستەۋگە تىيىم سالىندى.