8 قاراشا - ەلىمىزدە ۇلتتىق ستاتيستيكا كۇنى. بۇل كۇن قوعامنىڭ تىنىسىن ساندارمەن سيپاتتايتىن مامانداردىڭ كاسىبي مەرەكەسى.
ستاتيستيكا - بۇل جاي عانا ەسەپ ەمەس. ول ەلدىڭ ەكونوميكاسىن، تۇرمىس دەڭگەيىن جانە كۇندەلىكتى ءومىر سالتىن كورسەتەتىن اينا ىسپەتتى. Aqshamnews.kz وسى اتاۋلى كۇنگە وراي، رەسمي ستاتيستيكادان تىس قازاقستاندىقتاردىڭ ءومىر سالتىن سيپاتتايتىن بىرنەشە قىزىقتى فاكتىلەردى ۇسىنادى. ەلىمىزدە كوپ ماسەلە داستارحان باسىندا ايتىلىپ، سول جەردە باس قوسادى. سوندىقتان حالقىمىزدىڭ سۇيىكتى ءدامى مەن سۋسىنى جايلى ءجون كوردىك.
قازاقتىڭ سۇيىكتى سۋسىنى - شاي
Bigpicture.ru دەرەكتەرىنە سۇيەنسەك، قازاقستان الەمدەگى ەڭ كوپ شاي ىشەتىن ون ەلدىڭ قاتارىنا كىرەدى.
ءبىزدىڭ ەلىمىز بۇل تىزىمدە 10-ورىندا تۇر: ءاربىر قازاقستاندىق جىلىنا ورتا ەسەپپەن 1،54 كگ شاي تۇتىنادى.
ەل تۇرعىندارىنىڭ 99%-ى كۇن سايىن شاي ىشەدى، ال ولاردىڭ جارتىسى كۇنىنە ءتورت نەمەسە ودان دا كوپ كەسە ىشەتىنىن مويىندايدى.
زەرتتەۋشى م.يا. كيتتارى XIX عاسىردا-اق قازاقتاردىڭ شايدى "ۋاقىت پەن ورىنعا قاراماي ىشەتىنىن" جازعان. راسىندا، شاي – قازاق قوناقجايلىعىنىڭ سيمۆولى.
ەت - قازاق داستارحانىنىڭ باستى تاعامى
ق ر ۇلتتىق ستاتيستيكا بيۋروسىنىڭ دەرەگىنشە، 2024 جىلدىڭ ءۇشىنشى توقسانىندا ەلدە جان باسىنا شاققاندا 20،5 كگ ەت پەن ەت ونىمدەرى تۇتىنىلعان.
ەتتى ەڭ كوپ تۇتىناتىن ايماق - جامبىل وبلىسى (23،6 كگ)، ەڭ تومەن كورسەتكىش - شىمكەنت (15 كگ).
Worldpopulationreview مالىمەتىنە سايكەس، قازاقستان تمد مەن ورتالىق ازيا ەلدەرى اراسىندا جان باسىنا شاققانداعى ەت تۇتىنۋ بويىنشا ءۇشىنشى ورىندا:
بەلارۋس - 94،5 كگ
رەسەي - 81،7 كگ
قازاقستان - 70،2 كگ
ستاتيستيكا - ەل ءومىرىنىڭ ايناسى
قازاقستاندا رەسمي ەسەپ جۇرگىزۋ ءىسى ءبىر عاسىرعا جۋىق تاريحقا يە.
حح عاسىردىڭ باسىندا قاعاز ساۋالنامالار مەن اريفمومەترلەر قولدانىلسا، بۇگىندە دەرەكتەر ناقتى ۋاقىت رەجيمىندە جينالىپ، جاساندى ينتەللەكت ارقىلى وڭدەلەدى.
بۇگىنگى تاڭدا:
مەملەكەتتىك ورگاندارمەن 19 ينتەگراسيا ىسكە اسقان؛
36 اكىمشىلىك دەرەككوزى قولدانىلادى؛
94% رەسپوندەنت ەسەپتى ونلاين تۇردە تاپسىرادى.
ينتەرنەت-دۇكەندەر مەن فيسكالدىق چەكتەردەن الىناتىن پارسينگ جۇيەسى باعانىڭ وزگەرىسىن ناقتى ۋاقىتتا باقىلاۋعا مۇمكىندىك بەرەدى. ال دەرەكتەردى تالداۋعا جاساندى ينتەللەكت كومەكتەسەدى.
ساندار مەن پايىزداردىڭ ارتىندا – حالىقتىڭ ءومىر سالتى، تالعامى جانە ءداستۇرى تۇر.
شاي مەن ەت جايلى ستاتيستيكا – بۇل تەك تۇرمىس كورسەتكىشى ەمەس، قازاق مادەنيەتىنىڭ سيفرلىق كورىنىسى.
سوندىقتان ۇلتتىق ستاتيستيكا كۇنى – تەك ەسەپ جۇرگىزۋشىلەردىڭ مەرەكەسى ەمەس، سونىمەن بىرگە ەلدىڭ شىنايى بەينەسىن كورسەتەتىن كۇن.