قازاعىم، قايدا باراسىڭ؟
م.اۋەزوۆ اتىنداعى قازاق ۇلتتىق اكادەميالىق دراما تەاترىندا جازۋشى-دراماتۋرگ ف.زەللەردىڭ «جان اكە» اتتى دراماسىنىڭ پرەمەراسى ءوتتى. اتالمىش سپەكتاكل قاراپايىم وتباسىنىڭ قيىندىققا تولى ءومىرىن شەبەر كورسەتەدى. كورنەكتى فرانسۋز جازۋشىسى فلوريان زەللەر شىعارماسى نەگىزىمەن قازاق ساحناسىنا لايىقتالىپ جازىلعان پەسا كوپشىلىكتىڭ كوڭىلىنەن شىقتى.
«تەاترعا كەلۋدى وتباسىمىزبەن جاقسى كورەمىز. مىنە، تەاتردىڭ جاڭا قويىلىمىن تاماشالاۋ باقىتى بىزگە دە بۇيىرىپتى. سپەكتاكل ەكى كۇن قاتارىنان انشلاگپەن ءوتتى. بۇل دەگەنىمىز، بەكزات ونەرگە قىزىعاتىن جانداردىڭ كوبەيىپ كەلە جاتقانىن بىلدىرەدى. بۇنى كورىپ، ءبىز دە قۋانىپ جاتىرمىز. قويىلىم ءار جاستاعى كورەرمەندەرگە وي سالىپ، وتباسىلىق قۇندىلىقتاردى اسپەتتەۋگە شاقىرادى. سپەكتاكلدەن كوزىمىزگە جاس الىپ، اتا-انانىڭ ءقادىرىن ۇعىنىپ قايتتىق. اكتەرلىك قۇرام مەن تەاتر ۇجىمىنا ەرەكشە العىسىمىزدى ايتامىز»، – دەيدى ايدانا بەيسەن ەسىمدى كورەرمەن.
سپەكتاكلدىڭ باستى كەيىپكەرى – اقساقال. ءومىردىڭ قىزىعى مەن قيىندىعىن بىرگە وتكەرگەن اياۋلى جارى ءاپپاق باقيلىق بولادى. تاعى ءبىر قايعىسى – شەتەلدىككە تۇرمىسقا شىعىپ كەتكەن كەنجە قىزى. جاسى كەلىپ، كۇش-قۋات ازايىپ، جادى توزعان اكەنى وزىنشە وبەكتەيتىن ۇلكەن قىزى ايجان عانا قاسىندا قالادى. ءبىراق ەڭبەگى، ءبىر ەسەپتەن، زايا، سەبەبى، اكەسىن «ەستىمەيدى». دەسە دە، اكەسىنە مەدەۋ بولىپ، ءوز ومىرلەرىن جاقسارتۋعا بار كۇشىن سالادى. الايدا، ايجان مەن اكەسى ءومىردىڭ بارلىق اۋىرتپالىعىن ارقالاپ، قيىندىقتارعا مويىنسۇنباي، جەڭىپ شىعۋعا تىرىسادى. ال جادى توزدى دەمەسەڭىز، رۋحى مىقتى، اقىل-ويى ورنىندا، قىزدارىنىڭ تاعدىرىن، ۇلتتىق ۇستىنداردان اجىراي باستاعان ۇرپاقتى، قازاعىنىڭ بولاشاعىن ويلايتىن اقساقالدىڭ جانى جالعىز، مەيىرىمگە شولدەۋلى...
پسيحولوگيالىق تۇرعىدان كۇردەلى قويىلىمدا شىن ءومىر مەن باس كەيىپكەر قيالىنداعىنىڭ اراجىگىن اجىراتۋ وڭاي ەمەس، ءسىز بەن ءبىز كۇتپەگەن ينتريگالار دا جەتكىلىكتى. ءارتۇرلى جاعدايلاردا وينالاتىن ديالوگتاردا قاراما-قايشى كوزقاراستار شيەلەنىسە تۇسەدى.