الماتى پوليسياسى ۇرلىقتىڭ بەتىن اشتى

كولىكتەردىڭ كولەم ولشەگىشتەرىن ۇرلاۋدى كاسىپ قىلعان ۇرى قولعا ءتۇستى. 

بۇل قىلمىس قالانىڭ ناۋرىزباي اۋدانىندا ورنالاسقان تۇرعىن الابىندا ورىن العان، دەپ حابارلايدى Almaty-akshamy.kz Polisia.kz-كە سىلتەمە جاساپ. 

«31 جاستاعى س.ەسىمدى ازامات ۇستالدى. سوتقا دەيىنگى تەرگەۋ بارىسىندا جاس جىگىت زاڭسىز بايۋ ماقساتىندا Mercedes اۆتوكولىكتەردەن كولەم ولشەگىشتەردى – ماسسالىق اۋا اعىنىنىڭ داچيكتەرىن ۇرلاعانى انىقتالدى. قىلمىستىق ءىس ق ر قك-نىڭ 188-بابى (ۇرلىق) بويىنشا تەرگەلىپ جاتىر. قازىرگى ۋاقىتتا كۇدىكتى وسىعان ۇقساس قىلمىس جاساعانىن مويىندادى. ول ۋاقىتشا ۇستاۋ يزولياتورىنا قامالدى»، – دەدى ناۋرىزباي اۋداندىق پوليسيا باسقارماسىنىڭ باستىعى دانيار مەڭدەبايەۆ.

ءتارتىپ ساقشىلارىنىڭ ايتۋىنشا، سوڭعى ۋاقىتتا Mercedes كولىكتەرىنەن كولەم ولشەگىشتەردى ۇرلاۋ جيىلەپ كەتكەن. بۇل دەتالدى ءۇشىنشى تۇلعالارعا 15 مىڭ تەڭگەدەن 25 مىڭ تەڭگەگە دەيىن ساتۋعا بولاتىنى قىلمىسكەرلەردى قىزىقتىرادى. تەرگەۋ ارەكەتتەرى بارىسىندا س. ەسىمدى ازاماتتىڭ قالادا بۇرىن جاسالعان وسىعان ۇقساس قىلمىستارعا قاتىسىنىڭ بار-جوعى تەكسەرىلەتىن بولادى.