ءۇي اۋلاسىنان ەسىرتكى وسىرەتىن جىلىجاي انىقتالدى
پوليسەيلەر جامبىل وبلىسىنان الماتىعا ەسىرتكى تاسىمالداعانداردى ۇستادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
پوليسيا قىزمەتكەرلەرى ارنايى ءىس-شارانىڭ ناتيجەسىندە جامبىل وبلىسىنان الماتىعا ەسىرتكى تاسىمالدايتىن ارنانى جاپتى.
«شىلدە ايىندا 32 جاستاعى گ.ەسىمدى ازامات كاننابينويدتى توبىنداعى ەسىرتكىمەن ۇستالدى. رۇقسات ەتىلگەن ارنايى ءىس-شارالار بارىسىندا ۇستالعان ادام 56 جاستاعى ز.ەسىمدى ازاماتتان ەسىرتكىنى قايتا ساتۋ ءۇشىن ساتىپ العانى انىقتالدى.تەرگەۋ بارىسىندا بەلگىلى بولعانداي، ءىرى كولەمدەگى ماريحۋانا ەسىرتكىسىن جامبىل وبلىسىنان اكەلىپ وتىرعان»، – دەدى الماتى قالالىق پد ەسىرتكى قىلمىسىنا قارسى كۇرەس باسقارماسىنىڭ باستىعى ەرلان الماعامبەتوۆ.
كۇدىكتىنىڭ كولىگىن پوليسەيلەر قالاعا كىرەبەرىستە بوگەپ تاستاعان. جەكە ءتىنتۋ بارىسىندا «ماريحۋانا» جانە «شيشكا» تۇقىمى تابىلىپ، تاركىلەندى.
«ەسىرتكى جەتكىزۋشىلەردى جويۋ بويىنشا ارنايى ءىس-شارا جامبىل وبلىسىندا ءوتتى. باسىپ الۋ توبى پايدا بولعان كەزدە ءۇي يەلەرى ەسىكتەرىن قۇلىپتاپ، زاتتاي ايعاقتى دارەتحاناعا اعىزىپ، جويۋعا ارەكەتتەنگەن. ءبىراق ولارىنان تۇك شىقپادى. رۇقسات ەتىلگەن ءتىنتۋ كەزىندە جاسىرىلعان ماريحۋانا تۇقىمى، ۇنتاق تۇرىندەگى ەسىرتكى زاتى بار كاپسۋلالار جانە 160 دانا تەگىس ۇڭعىلى شولاق مىلتىعىنىڭ وقتارى، 60 قولدان جاسالعان پاترون، بىرنەشە قولدان جاسالعان اڭشىلىق پىشاق تابىلدى جانە تاركىلەندى. سونداي-اق، ەرەكشە ءيىسى بار مەتالل ىدىستارى دا تاركىلەندى. ءۇيدىڭ اۋلاسىنان 18 گۇل قۇمىراسىمەن ەسىرتكى وسىرىلەتىن جىلىجاي انىقتالدى»، – دەدى پوليسيا وكىلى.
ەسىرتكى زاتىن ساتۋ ماقساتىندا اسا ءىرى كولەمدە ساقتاۋ فاكتىسى بويىنشا قىلمىستىق ءىس تەرگەلىپ جاتىر.