ەلوردادا قاليبەك قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىندا وزبەك كينوسى كۇندەرىنىڭ سالتاناتتى اشىلۋى ءوتتى
ق ر مادەنيەت جانە سپورت مينيسترلىگى دەرەگىنشە، وزبەكستان پرەزيدەنتى شاۆكات ميرزيويەۆتىڭ قازاقستانعا مەملەكەتتىك ساپارى بارىسىندا ۇيىمداستىرىلعان مادەني ءىس-شاراعا وزبەكستاننىڭ بەلگىلى كينورەجيسسەرلەرى مەن اكتەرلەرى قاتىستى، دەپ حابارلايدى Almaty-akshamy.kz
وزبەكستاننىڭ كينەماتوگرافيستەر دەلەگاسياسىن «وزبەككينو» ۇلتتىق اگەنتتىگىنىڭ باس ديرەكتورى فيرداۆس ابدۋحاليكوۆ باستاپ كەلدى.
القالى جيىنعا قازاقستان تاراپىنان ق ر مادەنيەت جانە سپورت ءمينيسترى اقتوتى رايىمقۇلوۆا، ق ر مادەنيەت جانە سپورت مينيسترلىگى مادەنيەت كوميتەتىنىڭ ءتوراعاسى اقان ابدۋالييەۆ، «قازاقفيلم» كينوستۋدياسىنىڭ پرەزيدەنتى اقان ساتايەۆ، سونداي-اق ەلىمىزدىڭ كينو ونەرىنىڭ كورنەكتى قايراتكەرلەرى قاتىستى.
ءىس-شارا بارىسىندا قازاقستان مەن وزبەكستان اراسىندا كينەماتوگرافيا سالاسى بويىنشا قارىم-قاتىناس پەن تاجىريبە الماسۋ ماقساتىنداعى ەكىجاقتى مەموراندۋمعا قول قويىلدى.
جيىندا ءسوز العان اقتوتى رايىمقۇلوۆا كوپشىلىكتى وزبەك كينوسى كۇندەرىنىڭ اشىلۋىمەن قۇتتىقتادى.
«قازاق پەن وزبەك حالىقتارىنىڭ مادەني بايلانىسىنىڭ تامىرى تەرەڭدە جاتىر. ءبىزدىڭ وتكەن شاعىمىز ورتاق، رۋحاني مۇرامىز دا وراسان. ءتىلىمىز، ءدىنىمىز، ءدىلىمىز ءبىر. وسى وتكىزىلىپ وتىرعان شارا – وسىنىڭ ءبىر ايعاعى.
وزبەك مادەنيەتى مەن ونەرى، اسىرەسە، كينو ونەرى قازاقستاندىقتار اراسىندا كەڭىنەن تانىمال. وزبەك تەلەسەريالدارى ءبىزدىڭ كورەرمەن ءۇشىن ەتەنە تانىس. ءۇش كۇن بويى، ياعني، جەلتوقساننىڭ التىسى مەن سەگىزى ارالىعىندا ءبىز ءۇشىن وزبەكستان كينوسىنىڭ زاماناۋي تۋىندىلارىمەن تانىسۋ مۇمكىندىگى تۋىپ وتىر. وزبەك فيلمدەرى كينوتەاترلاردا عانا ەمەس، رەسپۋبليكالىق تەلەارنالاردا دا كورسەتىلەتىن بولادى»،- دەدى مادەنيەت جانە سپورت ءمينيسترى.
سونىمەن قاتار «وزبەككينو» ۇلتتىق اگەنتتىگىنىڭ باس ديرەكتورى فيرداۆس ابدۋحاليكوۆ الداعى ۋاقىتتا باۋىرلاس ەكى ەل اراسىندا، ورتاق جوبالاردى جۇزەگە اسىرۋعا نيەتتى ەكەنىن جەتكىزدى.
«ءىس-شارا وزبەكستان پرەزيدەنتىنىڭ قازاقستانعا كەلۋىنە وراي وتكىزىلىپ جاتىر. بۇگىنگى تاڭدا وزبەكستان كينەماتوگرافياcى قازاقستاندىق كينو سالاسىنا ورتاق جوبالار جايلى ۇسىنىس جاساي الاتىنداي دارەجەدە ەكەنىن ماقتانىشپەن ايتامىز. وزبەكستان تاراپىنان باۋىرلاس ەكى ەلدىڭ دوستىعىن بەينەلەيتىن «ميروس» جانە «اباي» اتتى ەكى ءفيلمدى ۇسىنىپ وتىرمىز.
جاس ماماندارىمىز دا تاجىريبە الماسۋعا دايىن. بۇگىن «شابىت» ۇلتتىق ونەر اكادەمياسىندا قوناقتا بولدىق. اتالعان وقۋ ورنىندا بولاشاق ماماندارعا بارلىق جاعداي جاسالعانىن كوردىك. بۇگىنگى مەموراندۋم اياسىندا ورتاق جوبالارىمىزدىڭ قاتارى ارتادى دەگەن ۇمىتتەمىن»،- دەدى فيرداۆس ابدۋحاليكوۆ.