جامبىلدا اۆتوبۋس پەن تراكتور سوقتىعىسىپ، ەكى ادام قازا تاپتى

اۆتوبۋستىڭ جۇرگىزۋشىسى رۋلگە يە بولا الماي، ءبىر باعىتتا كەلە جاتقان تراكتوردىڭ تىركەمەسىنە سوعىلعان

جامبىل وبلىسىندا 12 مامىر كۇنى ساعات 15.50 شاماسىندا «باتىس ەۋروپا-باتىس جۇڭگو» رەسپۋبليكالىق ماڭىزى بار اۆتوجولىنىڭ 571-شاقىرىمىندا جول-كولىك وقيعاسى بولدى، دەپ حابارلايدى Almaty-akshamy.kz قازاقپاراتقا سىلتەمە جاساپ.

الدىن الا بولجام بويىنشا كۇن رايىنىڭ ناشارلاۋىنا بايلانىستى (جاڭبىر مەن بۇرشاق) جولاۋشىلار تاسىمالدايتىن اۆتوبۋستىڭ جۇرگىزۋشىسى رۋلگە يە بولا الماي، ءبىر باعىتتا كەلە جاتقان تراكتوردىڭ تىركەمەسىنە سوعىلعان.

جول-كولىك وقيعاسى سالدارىنان اۆتوبۋس جۇرگىزۋشىسىنىڭ كومەكشىسى مەن جولاۋشىسى وقيعا ورنىندا قازا تاپتى، اۋرۋحاناعا 33 ادام قارالىپ، ولاردىڭ ۇشەۋى جانساقتاۋ بولىمىنە جاتقىزىلدى.

«اتالعان دەرەك بويىنشا ق ر قك 345-بابى 4-بولىگىمەن (كولىك قۇرالىن باسقاراتىن ادامنىڭ ابايسىزدا ەكى نەمەسە ودان دا كوپ ادامنىڭ ولىمىنە اكەپ سوققان جول ءجۇرىسى نەمەسە كولىك قۇرالدارىن پايدالانۋ قاعيدالارىن بۇزۋى) بويىنشا سوتقا دەيىنگى تەرگەۋ امالدارى باستالدى. قاجەتتى ساراپتامالار تاعايىندالدى»،-دەلىنگەن پوليسيا دەپارتامەنتىنىڭ حابارلاماسىندا.