جامبىل وبلىسىنا جۇمىس ساپارى بارىسىندا پرەمەر-مينيستر ءاليحان سمايىلوۆ جەرگىلىكتى ەگىنشىلەرمەن كەزدەستى، دەپ حابارلايدى ۇكىمەتتىڭ باسپا ءسوز قىزمەتى.
پرەمەر-مينيستر سەڭكىباي سۋ ارناسى قۇرىلىسىنىڭ بارىسىن تەكسەرىپ، ۆەگەتاسيالىق كەزەڭدە سۋدى پايدالانۋ تيىمدىلىگىن ارتتىرۋ شارالارىمەن تانىستى. ءاليحان سمايىلوۆتىڭ وڭىرلىك اۋىل شارۋاشىلىعى قۇرىلىمدارىنىڭ باسشىلارىمەن كەزدەسۋى بارىسىندا سۋبسيديالاۋ، اۋىل شارۋاشىلىعى تەحنيكاسى مەن مينەرالدى تىڭايتقىشتار ساتىپ الۋ، سۋارمالى سۋمەن قامتاماسىز ەتۋ جانە باسقا دا ءبىرقاتار ماسەلە كوتەرىلدى. اتاپ ايتقاندا، قۇرعاقشىلىق سالدارىنان بولعان ەگىن شىعىنىن وتەۋ تۋرالى ماسەلە كوتەرىلدى.
پرەمەر-مينيستر ءقازىر وڭىرلىك اۋقىمداعى توتەنشە جاعداي جاريالاۋ جانە ۇكىمەت رەزەرۆىنەن قاراجات ءبولۋ ەسەبىنەن فەرمەرلەردىڭ شىعىندارىن وتەۋ ماسەلەسى پىسىقتالىپ جاتقانىن اتاپ ءوتتى.
«جوسپار بويىنشا قىركۇيەك ايىنىڭ سوڭىنا دەيىن بارلىعى ەسەپتەلىپ، ءتيىستى قاراجات بولىنەتىن بولادى. سونداي-اق رەسپۋبليكالىق بيۋدجەتتەن سۋبسيديالارعا قارجى ءبولۋ جانە ولاردى كەشىكتىرمەي تولەۋ ماسەلەسىن جىلدامداتىپ جاتىرمىز. بۇل جۇمىس مەملەكەت باسشىسىنىڭ باقىلاۋىندا»، - دەدى ءاليحان سمايىلوۆ.
تاعى ءبىر ماسەلە «جاسوركەن» گيدروبەكەتىن قالپىنا كەلتىرۋگە قاتىستى بولدى. ول سۋدى ادىلەتتى ءبولىپ، ەسەپكە الۋعا مۇمكىندىك بەرەدى. پرەمەر-مينيستر ول ءۇشىن ۇكىمەت رەزەرۆىنەن 450 ملن تەڭگە قاراجات ءبولۋ تۋرالى ءتيىستى مينيسترلىككە جانە اكىمدىككە تاپسىرما بەرىلگەنىن حابارلادى.
«بۇل جۇمىستى بيىل باستاۋ كەرەك»، - دەدى ول.
تاعى ءبىر سۇراققا جاۋاپ بەرە وتىرىپ، ءاليحان سمايىلوۆ ءقازىر ۇڭعىمالاردى قازۋعا كەتكەن شىعىنداردى وتەۋ ۇلەسىن 50%-دان 80%-عا دەيىن ۇلعايتۋ مۇمكىندىگىن قاراستىرىپ جاتقانىن اتاپ ءوتتى.
وڭىردە سۋارمالى جەر كولەمى – 181،8 مىڭ گەكتار. 2025 جىلعا قاراي ينفراقۇرىلىم نىساندارىن جوندەۋ جانە 14 جاڭا سۋ قويماسىن سالۋ ەسەبىنەن تاعى 54،9 مىڭ گەكتاردى اينالىمعا ەنگىزۋ جوسپارلانىپ وتىر.
سۋدى ءتيىمدى پايدالانۋ ماقساتىندا ءقازىردىڭ وزىندە 54،3 مىڭ گەكتار جەرگە سۋ ۇنەمدەۋ تەحنولوگيالارى ەنگىزىلدى. جىل سوڭىنا دەيىن بۇل كورسەتكىشتى 57 مىڭ گەكتارعا جەتكىزۋ جوسپارلانعان. وبلىس اكىمى نۇرجان نۇرجىگىتوۆ جەراستى سۋلارىن ءتيىمدى پايدالانۋ، ۇڭعىمالاردى بۇرعىلاۋ جانە باسقا دا سۋ ۇنەمدەۋ شارالارىن جۇزەگە اسىرۋ باستى نازاردا ەكەنىن ايتتى.
ديقانداردى ىلعال ۇنەمدەيتىن تەحنولوگيالاردى قولدانۋعا ىنتالاندىرۋ ءۇشىن ينۆەستيسيالىق سۋبسيديالار تۇرىندە مەملەكەتتىك قولداۋ كورسەتىلەدى. ول زاماناۋي سۋارۋ جۇيەلەرىن ساتىپ الۋعا جۇمسالعان شىعىنداردىڭ 50%-ىن وتەۋدى، سونداي-اق بارلىق قاجەتتى ينفراقۇرىلىمدى جۇرگىزۋدى كوزدەيدى. بىرنەشە جىل ىشىندە 385 شارۋا قوجالىعى 5 ملرد تەڭگەگە كولەمىندە قولداۋ كورسەتىلدى.
سونىمەن قاتار جالپى كولەمى 53،9 مىڭ گا اۋماقتا ماڭىزى بار سۋارۋ كانالدارىن، درەناجدىق جۇيەلەردى جانە باسقا دا قۇرىلىستاردى قايتا جاڭعىرتۋ جانە سالۋ بويىنشا جوبالاردى پىسىقتاۋ جۇمىستارى جۇرگىزىلىپ جاتىر. اتاپ ايتقاندا، ۇزىندىعى 21،8 شاقىرىم بولاتىن سەڭكىباي كانالى 4 مىڭ گا سۋارمالى جەردى سۋمەن قامتاماسىز ەتەدى.
سونداي-اق پرەمەر-مينيسترگە «اۋىل اماناتى» جوباسىنىڭ ىسكە اسىرىلۋ بارىسى تۋرالى اقپارات بەرىلدى.
مەملەكەت باسشىسىنىڭ قولداۋىمەن ازىرلەنگەن جوبا 2019 جىلى جامبىل وبلىسىندا ىسكە قوسىلىپ، ءوزىنىڭ ەكونوميكالىق جانە الەۋمەتتىك تيىمدىلىگىن دالەلدەدى. جالپى، 2019-2023 جىلدار ارالىعىندا وبلىس بويىنشا ونى جۇزەگە اسىرۋعا 42،3 ملرد تەڭگە ءبولىندى. سونىڭ ناتيجەسىندە 50 اۋىلدىق وكرۋگتەن 11 مىڭعا جۋىق ادام ءوز كاسىبىن اشتى.