بيىلعى سۋارۋ ماۋسىمى باستالعالى جەرگىلىكتى شارۋالار 44 ملن تەكشە مەتر سۋ الدى. بۇگىنگى تاڭدا وڭىردەگى 15 مىڭ گەكتار ەگىس القابى سۋارىلدى.
كۇننىڭ ىستىعىنا بايلانىستى جامبىل وبلىسىندا سۋارۋ كەزەڭى 25 كۇنگە ەرتە باستالدى. ال جاۋىن-شاشىن بولماعاندىقتان، سۋارمالى سۋعا دەگەن سۇرانىس الدىڭعى جىلدارمەن سالىستىرعاندا ەكى ەسە ارتتى.
قازىرگى ۋاقىتتا جامبىل وبلىسىنىڭ «قازسۋشار» فيليالى ءتيىستى كەلىسىمشارتتار جاسالعان شارۋالاردى سۋارمالى سۋمەن قامتاماسىز ەتىپ جاتىر. شارۋا قوجالىقتارىمەن جاسالعان كەلىسىمدەردىڭ شارتتارى تولىق ورىندالىپ جاتىر. ال ديقاندار كەلىپ جاتقان سۋدىڭ كولەمىنە ءدان ريزا.
«شارۋاشىلىقپەن اينالىسىپ جاتىرمىن. سۋمەن ماسەلە جوق. ەگىنىمىزدى سۋارىپ جاتىرمىز. پياز ەكتىم، جاقسى ءوسىپ كەلەدى. تامشىلاتىپ سۋارۋ جۇيەسى ءتيىمدى، سۋدى، ءدارىنى ۇنەمدەۋگە كومەكتەسەدى. ەندى گەكتارىنا 70-80 توننا ءونىم جينايمىز دەپ ەسەپتەپ وتىرمىز»، - دەدى ەگىنشى اقىلبەك بايتىكوۆ.
«13 گەكتار ارپا ەكتىم. ءقازىر ءبىر رەت سۋارىپ قويدىق. سۋ مول كەلىپ جاتىر. تەك كەلىسىمشارتقا وتىرىپ، اقشاسىن تولەۋ قاجەت. قازاقتا «سۋدىڭ دا سۇراۋى بار» دەگەن ءسوز بار. ءبىزدىڭ جەر ىلعالدى جاقسى ۇستايدى. ءبىر مارتە سۋارساق، سول بىزگە جەتكىلىكتى. ونىڭ وزىنەن جاقسى ءونىم الامىز. جوڭىشقانى دا ءبىر رەت سۋارعاننان كەيىن، ەكى رەت ورىپ الامىز. گەكتارىنا 150-170 ورام ءشوپ الامىز. بۇل ءوزىمىز باعاتىن مالعا جەتەدى»،- دەدى قىزىلشارىق اۋىلىنىڭ تۇرعىنى، شارۋا قوجالىعىنىڭ يەسى ابدىبەك شىمىربايەۆ.
«ءقازىر بارلىق كۇش جامبىل وبلىسىنىڭ شارۋالارىن سۋارمالى سۋمەن قامتاماسىز ەتۋگە باعىتتالعان. ول ءۇشىن كيروۆ سۋ قويماسىنان سۋ جىبەرۋ كولەمىن ۇلعايتۋ بويىنشا قىرعىز ارىپتەستەرىمىزبەن كەلىسسوز جۇرگىزىلدى»، - دەدى جامبىل وبلىسىنىڭ «قازسۋشار» فيليالىنىڭ ديرەكتورى قايرات امانوۆ.