بۇگىن جامبىل اتىنداعى قازاق مەملەكەتتىك اكادەميالىق فيلارمونيا سوليستەرىنىڭ 90-شى مەرەيتويلىق ماۋسىمى اشىلدى، - دەپ حابارلايدى Aqshamnews.kz.
فيلارمونيانىڭ ۇلكەن زالىندا وتكەن ايتۋلى شارادا ونەر ۇجىمىنىڭ جەتەكشى سوليستەرى ونەر كورسەتىپ، تىڭدارمانعا ۇمىتىلماس مۋزىكالىق اسەر سىيلادى.
ارنايى باعدارلامادا كوپشىلىك نازارىنا ۆيرتۋوزدى مۋزىكانتتاردىڭ ورىنداۋىنداعى الەمدىك كلاسسيكا مەن ءداستۇرلى مۋزىكانىڭ جاۋھارلارى ۇسىنىلدى.
ءوز تىڭدارماندارىن جانرلىق الۋاندىعىمەن تاڭداي قاقتىرعان كونسەرتتە ۇجىمدا كوپ جىلدان بەرى تاباندى ەڭبەك ەتىپ كەلە جاقان گۇلجان وزەنبايەۆا، ايدا ايۋپوۆا، گۇلنارا قۇرامبايەۆا، ەرمەك قۇرمانايەۆ سىندى قازاقستاننىڭ ەڭبەك سىڭىرگەن قايراتكەرلەرى، مادەنيەت قايراتكەرى ەرجان الىمبەتوۆ، ءادىل نەسىپبايەۆ، ماقپال قازىبەك قىزى، مۇسا كەرىمبايەۆ سىندى مادەنيەت سالاسىنىڭ ۇزدىكتەرى ونەر كورسەتتى. ۇلتتىق جانە الەمدىك كلاسسيكانىڭ ۇيلەسىمىمەن ەرەكشەلەنگەن كەشتە قازاقتىڭ حالىق ءانى «اقباقاي»، ۇكىلى ىبىرايدىڭ «گاككۋىنەن» باستاپ ايگىلى باحتىڭ ورگانعا ارنالعان «توككاتا جانە فۋگا رە مينور» سىندى تۋىندىلارى ورىندالدى.
ايتا كەتۋ كەرەك، تاريح تولقىنىندا تالاي مادەني وقيعالارعا كۋا بولعان فيلارمونيا ءۇشىن ءداستۇرلى ونەر مەن وتاندىق كومپوزيتورلاردىڭ ەڭبەكتەرىن كەڭىنەن ناسيحاتتاۋ – باستى قاعيدا سانالادى. بۇل رەتتە ۇجىم توقسان جىل بويى وسى باعىتتان تايماي، ونەر بيىگىن باعىندىرىپ كەلەدى. فيلارمونيا سوليستەرىنىڭ بۇگىنگى ماۋسىماشار كونسەرتى وسى ۇردىسكە ايقىن دالەل بولدى.
