نەگىزگى مىندەت سىبايلاس جەمقورلىق پەن كولەڭكەلى ەكونوميكا دەڭگەيىن تومەندەتۋ بولىپ تابىلادى.
بۇل تۋرالى وڭىرلىك كوممۋنيكاسيالار قىزمەتىنىڭ بريفينگىندە الماتى قالاسى بويىنشا مەملەكەتتىك كىرىستەر دەپارتامەنتىنىڭ وندىرىستىك ەمەس تولەمدەر باسقارماسىنىڭ باسشىسى قاناعات كۇلەمبايەۆ مالىمدەدى، دەپ حابارلايدى Almaty-akshamy.kz.
2021 جىلعى 1 قاڭتاردان باستاپ قازاقستاندا كەزەڭ-كەزەڭىمەن جالپىعا بىردەي دەكلاراسيالاۋ ەنگىزىلدى.
وكق سپيكەرى 2021 جىلعى 1 قاڭتاردان باستاپ مەملەكەتتىك قىزمەتشىلەر مەن ولارعا تەڭەستىرىلگەن ادامدار، سونداي-اق ولاردىڭ جۇبايلارى «كىرۋ» دەكلاراسياسىن تاپسىرعانىن ەسكە سالدى.
ەكىنشى كەزەڭدە 2023 جىلى دەكلاراسيانى مەملەكەتتىك مەكەمەلەر مەن كۆازيمەملەكەتتىك سەكتوردىڭ قىزمەتكەرلەرى، سونداي-اق ولاردىڭ جۇبايلارى تاپسىردى.
ءۇشىنشى كەزەڭدە، 2024 جىلعى 1 قاڭتاردان باستاپ دەكلاراسيانى زاڭدى تۇلعالاردىڭ باسشىلارى مەن قۇرىلتايشىلارى (قاتىسۋشىلارى)، جەكە كاسىپكەرلەر، سونداي-اق ولاردىڭ جۇبايلارى تاپسىرادى.
ءتورتىنشى كەزەڭدە، 2025 جىلعى 1 قاڭتاردان باستاپ - ازاماتتاردىڭ قالعان ساناتتارى (مىسالى، جەكە قۇرىلىمداردىڭ قىزمەتكەرلەرى، زەينەتكەرلەر، ءۇي شارۋاسىنداعى ايەلدەر، ستۋدەنتتەر جانە باسقالار) تاپسىرادى.
«اكتيۆتەر مەن مىندەتتەمەلەر تۋرالى دەكلاراسيا (250.00-نىسان) ءبىر رەت تاپسىرىلادى جانە 31 جەلتوقسانداعى جاعداي بويىنشا مالىمەتتەردى كورسەتەدى»، - دەدى ق.كۇلەمبايەۆ.
2024 جىلعى 1 قاڭتاردان باستاپ دەكلاراسيا تاپسىرىلۋى ءتيىس:
- جەكە كاسىپكەرلەر جانە ولاردىڭ جۇبايلارى؛
- زاڭدى تۇلعالاردىڭ باسشىلارى، قۇرىلتايشىلارى (قاتىسۋشىلارى) جانە ولاردىڭ جۇبايلارى.
بۇل تالاپ جۇمىسى جوق جانە قىزمەتىن توقتاتقان ادامدارعا دا قاتىستى.
فيليالدار مەن وكىلدىكتەردىڭ باسشىلارى 2024 جىلى اكتيۆتەر مەن مىندەتتەمەلەر تۋرالى دەكلاراسيانى ۇسىنۋعا مىندەتتى ەمەس، ويتكەنى ولار ازاماتتىق زاڭناماعا سايكەس (ق ر مك 43-بابى) زاڭدى تۇلعالار بولىپ تابىلمايدى.
2024 جىلى جالپىعا بىردەي دەكلاراسيالاۋ شەڭبەرىندە جەكە پراكتيكامەن اينالىساتىن ادامدار، ياعني نوتاريۋستار، ادۆوكاتتار، جەكە سوت ورىنداۋشىلارى جانە كاسىبي مەدياتورلار دەكلاراسيا تاپسىرمايدى.
ءسىز جەكە كاسىپكەر نەمەسە قىزمەتىن توقتاتقان زاڭدى تۇلعانىڭ باسشىسى ەكەنىڭىزدى نەمەسە سەنىمسىز سالىق تولەۋشىلەر تىزىمىندە ەكەنىڭىزدى مەملەكەتتىك كىرىستەر كوميتەتىنىڭ www.kgd.gov.kz.ينتەرنەت-رەسۋرسىنىڭ ەلەكتروندىق سەرۆيستەرىنە سىلتەمەلەر بويىنشا ءوز بەتىڭىزشە تەكسەرە الاسىز.
اكتيۆتەر مەن مىندەتتەمەلەر تۋرالى دەكلاراسيا قر-دا جانە ودان تىس جەرلەردە بولۋى تۋرالى اقپاراتتى كورسەتۋگە ارنالعان:
- شەتەلدەگى جىلجىمايتىن مۇلىك جانە كولىك؛
- شەتەلدىك بانكتەگى اقشا 3،5 ملن تەڭگەدەن اسادى (1000 اەك)؛
- شەتەلدىك كومپانياعا قاتىسۋ ۇلەسى؛
- باعالى قاعازدار، سيفرلىق اكتيۆتەر (بيتكويندەر جانە ت. ب.)؛
- ۇلەستىك قاتىسۋ شارتى (تۇرعىن عيماراتتاعى ۇلەسى)؛
- ينۆەستيسيالىق التىن (قۇيماداعى التىن)؛
- زياتكەرلىك مەنشىك جانە اۆتورلىق قۇقىق وبەكتىلەرى؛
- 34،5 ملن تەڭگە (10 000 اەك)شەگىندە قولما-قول اقشا؛
- باسقا تۇلعالارمەن نوتاريالدى كۋالاندىرىلعان قارىز شارتتارى.
- قۇنى 3،5 ملن تەڭگەدەن اساتىن باسقا مۇلىك (قالاۋى بويىنشا) (مادەني قۇندىلىقتار، زەرگەرلىك بۇيىمدار، اسىل تۇقىمدى جانۋارلار جانە ت. ب.) – باعالاۋدى 31.12.2023 ج. جاعداي بويىنشا دەكلاراسيانى تاپسىرۋ مەرزىمىنە دەيىن (2024 جىلعى 15 قىركۇيەكتەن كەشىكتىرمەي) جاساۋ قاجەت.
دەكلاراسيانى 2024 جىلعى 15 قىركۇيەككە دەيىن تۇرعىلىقتى جەرى بويىنشا تاپسىرۋ قاجەت. دەكلاراسيانى «سالىق تولەۋشى كابينەتى»، «ەلەكتروندىق ۇكىمەت» ۆەب-پورتالدارى، «e-salyqazamat»، Halyk، Bank CenterCredit ءموبيلدى قوسىمشالارى ارقىلى ۇسىنۋعا بولادى.
سونداي-اق ازاماتتار دەكلاراسيانى قاعاز تاسىعىشتا پوشتا ارقىلى نە كەلۋ تارتىبىمەن ۇسىنۋعا قۇقىلى.
سونداي – اق، سپيكەر دەكلاراسيانى ءبىرىنشى رەت ۇسىنباعانى ءۇشىن ەسكەرتۋ قاراستىرىلعانىن، ءبىر جىل ىشىندە قايتالاپ بۇزعانى ءۇشىن-55 380 تەڭگە (15 اەك) مولشەرىندە ايىپپۇل سالىنعانىن ايتتى.
دەكلاراسيادا تولىق ەمەس، سەنىمسىز مالىمەتتەردى ۇسىنعانى ءۇشىن:
- جىل ىشىندە العاش رەت - ەسكەرتۋ.
- ءبىر جىل ىشىندە قايتالاپ بۇزعانى ءۇشىن - 11 076 تەڭگە كولەمىندە ايىپپۇل (3 اەك).
سالىق سالۋ وبەكتىلەرىن جاسىرعانى ءۇشىن:
- جىل ىشىندە العاش رەت - تولەنبەگەن سالىقتار سوماسىنان 200%ك كولەمىند ايىپپۇل.
- ءبىر جىل ىشىندە قايتالاپ بۇزعانى ءۇشىن - تولەنبەگەن سالىقتار سوماسىنىڭ 300% مولشەرىندە ايىپپۇل.
ق ر قم مەملەكەتتىك كىرىستەر كوميتەتىنىڭ سايتىندا «جالپىعا بىردەي دەكلاراسيالاۋ» بولىمىندە بارلىق اقپارات ورنالاستىرىلعان (https://kgd.gov.kz/ru/content/vseobshchee-deklarirovanie-1-2)، ونىڭ ىشىندە دەكلاراسيانى تولتىرۋ بويىنشا قادامدىق نۇسقاۋلىق، قر-داعى ءوز اكتيۆتەرىن تەكسەرۋ بويىنشا بەينە نۇسقاۋلىق بار.
2024 جىلعى 1 قاڭتاردان باستاپ كىرىستەر مەن مۇلىك تۋرالى دەكلاراسيادا كورسەتۋ ءۇشىن اقپارات تىزبەسى قىسقاردى (270.00-نىسان).
«تولەم كوزىنەن سالىق سالىناتىن كىرىستەردى (جالاقى، دەپوزيتتەر بويىنشا سىياقىلار، زەينەتاقى تولەمدەرى جانە ت.ب.) جانە قازاقستاندا تىركەلگەن مۇلىكتى ساتىپ الۋ نەمەسە يەلىكتەن شىعارۋ نە وتەۋسىز الۋ تۋرالى اقپاراتتى كورسەتۋ قاجەتتىلىگى الىنىپ تاستالدى»، - دەپ ءتۇسىندىردى ق. كۇلەمبايەۆ.
بۇدان باسقا، كىرىستەر مەن مۇلىك تۋرالى دەكلاراسيادا (270.00-نىسان) مۇلىكتى ساتىپ الۋعا ارنالعان شىعىستاردى جابۋ كوزدەرى تۋرالى مالىمەتتەردى كورسەتۋ جونىندەگى مىندەت «سىبايلاس جەمقورلىققا قارسى ءىس-قيمىل تۋرالى» قازاقستان رەسپۋبليكاسىنىڭ زاڭىندا كورسەتىلگەن جەكە تۇلعالارعا عانا جۇكتەلگەن، اتاپ ايتقاندا:
- جاۋاپتى مەملەكەتتىك لاۋازىمدى اتقاراتىن ادامدار مەن ولاردىڭ جۇبايلارى؛
- مەملەكەتتىك فۋنكسيالاردى ورىنداۋعا ۋاكىلەتتىك بەرىلگەن ادامدار مەن ولاردىڭ جۇبايلارى؛
- لاۋازىمدى ادامدار مەن ولاردىڭ جۇبايلارى؛
- مەملەكەتتىك فۋنكسيالاردى ورىنداۋعا ۋاكىلەتتىك بەرىلگەن ادامدارعا تەڭەستىرىلگەن ادامدار جانە ولاردىڭ جۇبايلارى.
قازىرگى ۋاقىتتا كىرىستەر مەن مۇلىك تۋرالى دەكلاراسياعا (270.00-نىسان) جانە ونى جاساۋ قاعيدالارىنا وزگەرىستەر ەنگىزىلۋدە، بەكىتىلگەننەن كەيىن 270.00-نىسان مەملەكەتتىك كىرىستەر كوميتەتىنىڭ اقپاراتتىق جۇيەلەرىندە ىسكە اسىرىلاتىن بولادى.
ونىڭ ايتۋىنشا، كىرىستەر مەن مۇلىك تۋرالى دەكلاراسيانى تاپسىرۋ مەرزىمىنىڭ باستالۋىنا بايلانىستى ءسىز قولدانىستاعى 270.00 نىسانى بويىنشا مىندەتتەمەنى ورىنداۋعا قۇقىلىسىز.
«ەگەر 2024 جىلى «قابىلدانعان» جانە «بولىنگەن» مارتەبەسى بار كىرىستەر مەن مۇلىك تۋرالى دەكلاراسيانىڭ قولدانىستاعى نىسانى (270.00 نىسانى) ۇسىنىلسا، وندا 270.00 نىسانىنداعى دەكلاراسيانى قايتا تاپسىرۋدىڭ قاجەتى جوق ەكەنىن ءبىلۋ ماڭىزدى»، - دەپ اتاپ ءوتتى سپيكەر.
سونداي-اق، 2024 جىلى كىرىستەر مەن مۇلىك تۋرالى دەكلاراسيانى (270.00-نىسان) 2021 جىلدان 2023 جىلعا دەيىنگى كەزەڭدە اكتيۆتەر مەن مىندەتتەمەلەر تۋرالى دەكلاراسيانى (250.00-نىسان) ۇسىنعان بارلىق جەكە تۇلعالار تاپسىراتىنىن ەسكە سالدى.
تاپسىرۋ مەرزىمى - 2024 جىلعى 15 قىركۇيەكتەن كەشىكتىرىلمەۋى كەرەك.