تىزە بۋىنى جاراقاتى بارلىق جاراقاتتار اراسىندا ەكىنشى ورىن يەلەنەدى.
ستاتيستيكاعا سۇيەنسەك، سپورتتىق ويىندارمەن جانە بيمەن اينالىساتىندار تىزەسىن كوپ جاراقاتتايدى ەكەن. تىزە بۋىنى ادەتتە، سوعىلعاندا، اۋىر سالماق تۇسكەن كەزدە جاراقاتتانادى. جاراقاتتىڭ بۇل ءتۇرى جاسوسپىرىمدەر اراسىندا ءجيى كەزدەسەدى دەيدى ماماندار. وعان سپورتپەن شۇعىلدانىپ، ءتۇرلى جۇكتەمەگە قوسا بويدىڭ تەز ءوسۋى، گورمونالدىق وزگەرىستەر، سالماق قوسۋ سىندى فاكتورلار سەبەپ.
تىزە بۋىنىندا اسىرەسە مەنيسك كوپ زاقىمدانادى. ونى تىگۋگە نەمەسە كەسىپ تاستاۋعا بولادى. ەمدەۋ تاكتيكاسىن ورتوحيرۋرگ مامان ناۋقاستىڭ جاسى، بۋىنداعى وزگەرىستەر، مەنيسكتىڭ ءۇزىلۋ ءتۇرى، بۇلىنگەن جەردىڭ كولەمى سىندى فاكتورلاردى ەسكەرە وتىرىپ تاڭدايدى. سەبەبى ول بۋىننىڭ فۋنكسيالارىن تولىق ساقتاپ قالۋعا مىندەتتى. سونىڭ ىشىندە تىگۋ تەحنيكاسىنىڭ دا ماڭىزى زور. قازىرگى تاڭدا ماماندار تىگىستىڭ «سىرتتان ىشكە قاراي»، «ىشتەن سىرتقا قاراي»، «ىشتەي» دەيتىن ءۇش ءتۇرىن قولدانادى.
الماتىداعى №7 قالالىق كلينيكالىق اۋرۋحانانىڭ ورتوحيرۋرگيا بولىمشەسى دارىگەرلەرى مەنيسكىسىن ەرتەدە زاقىمداعان پاسيەنتتەردىڭ تىزە بۋىنىن جاڭا ادىسپەن تىگەدى. «ىشتەن – سىرتقا» دەپ اتالاتىن جاڭا ءادىستىڭ اۆتورى ورتوحيرۋرگ ارنات بايزاقوۆ.
ءبىزدىڭ بۇگىنگى كەيىپكەرىمىز – 19 جاستاعى پاسيەنت كاسىبي سپورتتىق بيمەن اينالىسادى. ول «ەسكى جاراقات سالدارىنان وڭ جاق تىزەسىنىڭ مەدايالدى مەنيسكى زاقىمداندى» دەگەن دياگنوزبەن №7 اۋرۋحاناعا جاتقىزىلعان.
ايتۋىنشا، وڭ جاق تىزەسى اۋىر نارسە كوتەرگەندە قاتتى اۋىرىپ، ءجۇرىپ-تۇرۋى قيىنداعان. سپورتشى قىز وسىدان ءبىر اي بۇرىن جاتتىعۋ بارىسىندا وڭ جاق تىزەسىمەن قۇلاعان كورىنەدى. تىركەلگەن ەمحانا دارىگەرلەرى مرت جاساپ، جوسپارلى تۇردە ەمدەلۋگە جولداما بەرگەن.
دارىگەر ارنات بايزاقوۆ، كومەكشىلەر ەرلان ءامىروۆ، ءادىل جاڭابەرگەنوۆ، انەستيزيولوگ تەلجان تىنىمقۇلوۆ، مەدبيكە زاۋرە قۇراقبايەۆادان قۇرالعان بريگادا ناۋقاستىڭ تىزە بۋىنىنا اتروسكوپيالىق وتا جاساپ، زاقىمدانعان مەنيسكتى اۆتورلىق ادىسپەن تىكتى.
اۋرۋحانانىڭ ورتوحيرۋرگيا بولىمشەسى مەڭگەرۋشىسى ارنات بايزاقوۆتىڭ سوزىنە سۇيەنسەك، مەنيسكى زاقىمدانعان جاس پاسيەنتتەردى ەمدەۋدە اعزانىڭ قىزمەتىن ساقتاپ قالۋعا كومەكتەسەتىن ادىستەر قولدانىلادى. سونىڭ ءبىرى – مەنيسكىنى تىگۋ بولىپ تابىلادى.
«ىشتەن – سىرتقا» دەپ اتالاتىن تەحنيكا مەنيسكىنىڭ ارتقى جانە ورتاڭعى بولىگى زاقىمدانعان جاعدايدا قولدانىلادى. بۇل تەحنيكا بۋىن شەمىرشەگى مەن جۇيكە-بۋىن قۇرىلىمدارى اناتومياسىنىڭ بۇلىنۋىنە جول بەرمەيدى.
وپەراسيانىڭ ءساتتى شىعۋىنا تىگىستە قولدانىلاتىن ماتەريالدىڭ دا ماڭىزى زور. قازىرگى تاڭدا ميكروحيرۋرگيادا بۋىندى ۇزاق ۇستاپ تۇرۋعا قابىلەتتى، بەتى تەگىس، بۋىنعا ءسىڭىپ جوق بولىپ كەتپەيتىن پوليپروپيلەن سينتەتيكالىق پروپيلەنى قولدانىلادى.
«قولدانىستاعى ماتەريالدى پايدالانا وتىرىپ جاسالعان وپەراسيا جاقسى ناتيجە بەردى. وتادان كەيىن ەكىنشى كۇنى پاسيەنت بەلسەندى قيمىلدار جاساپ، اياعىن قوزعالتا باستادى. وتانىڭ ورنى دا جازىلدى. اۋىرسىنۋ باسىلىپ، زاقىمدانعان بۋىننىڭ قىزمەتى قالپىنا كەلتىرىلدى»، - دەيدى ارنات بايزاقوۆ.
پاسيەنت مەديسينالىق وڭالتۋ بولىمشەسى ماماندارىنىڭ كومەگىمەن تىنىس الۋ جاتتىعۋلارىن، وتا جاسالعان اياقتىڭ جامباس بۇلشىق ەتتەرىن يزومەتريالىق قىسقارتۋعا باعىتتالعان جاتتىعۋلار جاسادى. وتا ورنىنداعى جارا تەز جازىلىپ كەتۋ ءۇشىن بەس كۇن بويى جوعارى جيىلىكتەگى ۋلترا ماگنيتتى تەراپيا سەانسىن قابىلدادى. ناتيجەسىندە ستاسيوناردا جاتۋ مەرزىمى قىسقارىپ، ناۋقاس 7-كۇنى اۋرۋحانادان شىعارىلدى.
ناۋقاس ەمدىك جاتتىعۋلاردى جالعاستىرىپ، ەمحاناداعى حيرۋرگ ماماننىڭ باقىلاۋىندا بولدى. وتا جاساۋشى دارىگەر ونى ارتروسكوپيالىق وپەراسيادان كەيىن 6 اپتادان سوڭ قايتا قابىلدادى. قولدانىلعان پوليپروپيلەندى ءمونوجىپ مەنيسكتىڭ زاقىمدانعان فراگمەنتتەرىنىڭ بىرىگىپ، جازىلىپ كەتۋىنە ىقپال ەتتى، دەيدى دارىگەر.