جالعان رەپرەسسيا قۇربانى بولعاندار تۋرالى قۇجاتتار اشىلۋدا

تاريح سويلەيدى

ساياسي قۋعىن-سۇرگىن قۇرباندارىن اقتاۋعا قاتىستى قۇپيا قۇجاتتار اشىلدى، دەپ حابارلايدى Almaty-akshamy.kz. Qazaqtv.com سايتىنا سىلتەمە جاساپ.

باستى ماقسات - اقتاڭداق جىلداردىڭ اقيقاتىن اشۋ. ساياسي قۋعىن-سۇرگىن قۇرباندارىنا قاتىستى تىڭ دەرەكتەردى جيناۋ قازاقستاندىق عالىمدار تاراپىنان قارقىندى جۇرگىزىلە باستادى.

ولار مادەنيەت جانە سپورت مينيسترلىگىنىڭ جابىق قورلارىنداعى، سونداي-اق پروكۋراتۋرانىڭ، ىشكى ىستەر مينيسترلىگى مەن ۇلتتىق قاۋىپسىزدىك كوميتەتى ۆەدومستۆولىق مۇراعاتتارىندا ساقتالاتىن ماتەريالداردى زەردەلەۋدە.

اقپارات ىزدەۋمەن ەل وڭىرلەرىندە ارنايى قۇرىلعان 10 جۇمىس توبى اينالىسادى. جينالعان زەرتتەۋ ماتەريالى بىرنەشە جيناققا بىرىكتىرىلمەك. ولاردىڭ ءبىرى جىل سوڭىندا شىعارىلادى.

«ءبىز جوسپارلارىمىزدا، ادىستەمەلىك نۇسقاۋلارىمىزدا وڭىرلىك كوميسسيالارعا اۋداندارعا بارۋدى، ەكسپەديسيالاردى، جەرلەۋ ورىندارىن ناقتىلاۋ ءۇشىن ۆولونتەرلىك توپتاردى جىبەرۋدى، ولكەتانۋشىلاردى، بەلسەندىلەردى قوسۋدى ۇسىنامىز. ادامدار ءبىلۋى ءۇشىن ەسكەرتكىشتەر، بەلگىلەر قويىلادى»، - دەدى ساياسي قۋعىن-سۇرگىن قۇرباندارىن تولىق اقتاۋ جونىندەگى مەمكوميسسيا جوبالىق كەڭسەسىنىڭ جەتەكشىسى سابىر قاسىموۆ.