ەل قۇراماسى بوسنيا جانە گەرسەگوۆينامەن تەڭ ءتۇستى

فۋتبولدان ەل قۇراماسى ىلگەرىلەپ كەلەدى

2022 جىلعى فۋتبولدان الەم چەمپيوناتىنىڭ ىرىكتەۋ كەزەڭى اياسىنداعى بوسنيا جانە گەرسەگوۆينا مەن قازاقستان قۇراماسى كەزدەستى، دەپ حابارلايدى Almaty-akshamy.kz Prosports.kz.-كە سىلتەمە جاساپ.

ەۋروپانىڭ بوسنيا ەلىنىڭ زەنيسا قالاسىندا وتكەن ويىن 2:2 ەسەبىمەن تەڭ اياقتالدى.

العاشقى تايم تولىقتاي الاڭ يەلەرىنىڭ باسىمدىلىعىمەن ءوتتى. كوماندا كاپيتانى ەدين دجەكونىڭ وزىندە گول سوعاتىن بىرنەشە مۇمكىندىك بولدى. ءبىراق يگور شاسكيي قورعاعان قاقپادان ساڭىلاۋ تابا العان جوق.

ال ەكىنشى تايمدى قازاقستان قۇراماسى شابۋىلمەن باستادى. ناتيجەسىندە بۇرىشتاما ساتىندە يسلامبەك قۋات گول سوعىپ كەتتى. بۇل ويىننىڭ 52-مينۋتى بولاتىن. ءبىراق 70-مينۋتتا الەكساندر ماروچكين ايىپ الاڭىنىڭ ىشىندە ويىن ءتارتىبىن بۇزىپ، قاقپامىزعا پەنالتي بەلگىلەندى. ونى ميرالەم پيانيچ ءساتتى ورىنداپ، ەسەپتى تەڭەستىردى. ال 86-مينۋتتا قوسالقى قۇرامنان شىققان لۋكا مەنالو بۇرىشتامادان گول سوقتى. ءبىراق قازاقستان فۋتبولشىلارى ويىن سوڭىنا قاراي ەسەپتى تەڭەستىردى. باحتيەر زاينۋتدينوۆ قوسىمشا ۋاقىتتا ايىپ دوبىنان گول سوقتى.

وسى ويىننان كەيىن بوسنيا قۇراماسى 3 ۇپاي جيناپ، D توبىندا 4-ورىنعا جايعاستى. قازاقستان قۇراماسى دا 3 ۇپاي جيناپ، سوڭعى ورىندا تۇر.

الەم چەمپيوناتىنا ىرىكتەۋ. D توبى.

بوسنيا جانە گەرسەگوۆينا - قازاقستان - 2:2 (0:0)

گول سوققاندار: پيانيچ، مەنالو - قۋات، زاينۋتدينوۆ

بوسنيا جانە گەرسەگوۆينا: يبراحيم شەحيچ (ق) – سەاد كولاشيناس، سينيشا سانيچانين، انەل احمەدحودجيچ، دەننيس حادجيكادۋنيچ، ميروسلاۆ ستيەۆانوۆيچ – گويكو سيميروت، ميرالەم پيانيچ، ادي ناليچ – ەرمەدين دەميروۆيچ، ەدين دجەكو (ك)؛

قازاقستان: يگور شاسكيي (ق) – يان ۆوروگوۆسكيي، يۋريي لوگۆينەنكو، سەرگەي مالىي، الەكساندر ماروچكين، مارات بىستروۆ – يسلامبەك قۋات، اسحات تاعىبەرگەن (ك)، گەورگيي جۋكوۆ، ۆلاديسلاۆ ۆاسيليەۆ – ارتۋر شۋشەناچيەۆ.