الماتىدا مۇقتاج وتباسىلاردىڭ ءومىر ءسۇرۋ ساپاسىن جاقسارتۋعا باعىتتالعان 9 «باقىتتى وتباسى» ورتالىعى جۇمىس ىستەيدى.
ماماندار قيىن جاعدايعا تاپ بولعان قالا تۇرعىندارىنا كومەكتەسەدى، ترەنينگتەر مەن كونسۋلتاسيالار وتكىزەدى. بۇل تۋرالى الماتىداعى «باقىتتى وتباسى» ورتالىعىنىڭ جەتەكشىسى زۋلفيا بايساقوۆا وڭىرلىك كوممۋنيكاسيالار قىزمەتىنىڭ بريفينگىندە مالىمدەدى، دەپ حابارلايدى Almaty-akshamy.kz.
ايتا كەتسەك، كوپ بالالى جانە از قامتىلعان وتباسىلارعا جان-جاقتى كومەك كورسەتۋ ماقساتىندا 2019 جىلدىڭ تامىزىنان باستاپ الماتىنىڭ ءار اۋدانىندا «ءبىر تەرەزە» قاعيداتى بويىنشا «باقىتتى وتباسى» ورتالىقتارى جۇمىس ىستەي باستادى.
«پاندەمياعا قاراماستان، ورتالىقتار سانيتارلىق-ەپيدەميولوگيالىق تالاپتاردى ەسكەرە وتىرىپ، جۇمىسىن جالعاستىرۋدا. مۇندا كوپ بالالى جانە از قامتىلعان وتباسىلار زاڭگەرلەردەن، الەۋمەتتىك قىزمەتكەرلەردەن جانە پسيحولوگتاردان تەگىن كەڭەس الا الادى»، - دەدى ز. بايساقوۆا.
ونىڭ ايتۋىنشا، ورتالىقتارعا كۇنىنە 700-دەن استام قالا تۇرعىنى كەلەدى.
«باقىتتى وتباسى» ورتالىقتارىندا اعىلشىن ءتىلىن ۇيرەنۋ، ماكياج، ماسساج، شاشتاراز، ءپىشۋ جانە تىگىن، گيمناستيكا، اسپازدىق، توقۋ، سومكە تىگۋ بويىنشا تەگىن كۋرستار، كومپيۋتەرلىك كۋرستار وتكىزىلەدى. كوپ بالالى جانە از قامتىلعان وتباسىلاردىڭ بالالارى ارت-تەراپيا، گيمناستيكا، ماتەماتيكا مەن لوگيكا، شاحماتپەن اينالىسۋعا، اعىلشىن ءتىلىن ۇيرەنۋگە، توقۋ كۋرستارىنا قاتىسۋعا جانە لوگوپەدپەن كەڭەسۋگە مۇمكىندىك الادى.
«باقىتتى وتباسى» ورتالىقتارىندا 33 مىڭ ادام، ونىڭ ىشىندە 2021 جىلى 4 643 ادام تىركەلگەن. جىل باسىنان بەرى مۇقتاج 35 250 ادامعا رەسۋرستىق، ادىستەمەلىك جانە 3 700 ءوتىنىش بەرۋشىگە قۇقىقتىق كومەك كورسەتىلدى. 5 694 ادام بالا تاربيەسى، كوشباسشىلىق، وتباسىلىق قۇندىلىقتار بويىنشا باستاپقى دايىندىقتان ءوتتى»، - دەپ جالعاستىردى ز. بايساقوۆا.
مەسەناتتار «باقىتتى وتباسى» ورتالىقتارىنا كومەك كورسەتەدى. مىسالى، دەمەۋشىلىك قاراجاتقا ازىق-تۇلىك سەبەتتەرى، كيىم-كەشەك، جەكە گيگيەنا قۇرالدارى، 10 مىڭنان استام ادامعا ارنالعان ويىنشىقتار ساتىپ الىندى، 2300-دەن استام بالانىڭ تۋريستىك جانە مادەني ورىندارعا ساياحات ۇيىمداستىرىلدى، قايىرىمدى جانداردىڭ قولداۋىمەن 370 ادام تۇراقتى جانە ۋاقىتشا جۇمىسقا ورنالاستى.
سونىمەن قاتار، قالادا «باستاۋ بيزنەس» باعدارلاماسى بويىنشا انالارعا كاسىپكەرلىك نەگىزدەرىن ۇيرەتۋگە باعىتتالعان «ىسكەر انا» جوباسى، سونداي-اق «ەڭبەك» مەملەكەتتىك باعدارلاماسى بويىنشا قىسقا مەرزىمدى كۋرستار جۇزەگە اسىرىلۋدا.
«ىسكەر انا» باعدارلاماسى» تىركەۋ، قۇقىقتىق جانە پسيحولوگيالىق كومەك كورسەتۋدەن باستاپ كاسىپكەرلىك نەگىزدەرى بويىنشا كۋرستارعا جىبەرۋگە، بيزنەس-جوسپار قۇرۋعا، كاسىپ اشۋعا، گرانت الۋعا نەمەسە شاعىن نەسيە الۋعا دەيىن كوپ بالالى انالارمەن بىرتىندەپ جۇمىس جاساۋدى ۇسىنادى»، - دەدى ز. بايساقوۆا.
بيىل جوبا دەمەۋشىلەرىنىڭ ارقاسىندا اۋەزوۆ اۋدانىندا قولدان جاسالعان توقىما جانە ازىق-تۇلىك ونىمدەرىن ساتاتىن 4 ساۋدا نۇكتەسى اشىلدى. تۇركسىب اۋدانىندا كوپ بالالى انالاردىڭ قولدان جاساعان بۇيىمدارىن ساتۋ ءۇشىن «ىسكەر اnا» ساۋدا ءۇيى اشىلدى. ساۋدا ءۇيى قازىرگى زامانعى ۇلتتىق كيىمدەردى، قۇراق-كورپە، ۇلتتىق ناقىشتاعى زەرگەرلىك بۇيىمداردى، ايەلدەرگە ارنالعان كيىمدەردى ۇسىنادى، سونىمەن قاتار كيىمدەردى وڭدەۋ مەن جوندەۋ بويىنشا قىزمەتتەر كورسەتەدى.
ءسوزىن قورىتىندىلاعان ز. بايساقوۆا بيىل «ءوز بيزنەسىڭدى باستاۋ» باعدارلاماسى بويىنشا 506 ادام، ونىڭ ىشىندە 290 كوپ بالالى وتباسى جانە 216 از قامتىلعان وتباسى مۇشەلەرى «اتامەكەن» ۇكپ-نىڭ بازاسىندا ءتۇرى كاسىپ نەگىزدەرى بويىنشا ءبىلىم العانىن اتاپ ءوتتى.