جالعان ينتەرنەت-دۇكەن اشىپ، تۇرعىنداردى تاقىرعا وتىرعىزعان الماتى تۇرعىنىنا قاتىستى مۇنداي ۇكىمدى پەتروپاۆل قالالىق سوتى شىعاردى.
پەتروپاۆل قالالىق سوتىنىڭ ءتوراعاسى ميحايل گۋسيەۆتىڭ ايتۋىنشا، جاقىندا ەش جەردە جۇمىس ىستەمەيتىن، بۇعان دەيىن سوتتالماعان الماتى تۇرعىنىنا سوت ۇكىمى شىقتى. ەر ادام Instagram الەۋمەتتىك جەلىسىندە ون شاقتى ادامدى الداپ، ولاردىڭ اقشالارىن قالتاسىنا باسقان.
«الەۋمەتتىك جەلىدە Modnyi-store اتتى اككاۋنت قۇرىپ، ول جەردە ايەلدەردىڭ ءساندى، سۇرانىسقا يە كيىمدەرىن جارتى باعاسىنا ساتامىن دەپ جارنامالاعان. ادەمى فوتو، ارزان باعا ونلاين-تۇتىنۋشىلاردىڭ قىزىعۋشىلىعىن تۋدىرادى. ەشتەڭەدەن سەكەم الماعان قىز-كەلىنشەكتەر شارتتاردى قابىل الىپ، الدىن الا تولەم جاساعان. وسىلايشا ك. دەگەن ازامات 12 ادامدى 900 مىڭ تەڭگەگە الداعان»، - دەيدى ميحايل گۋسيەۆ.
جابىرلەنۋشىلەرگە كەلتىرىلگەن ماتەريالدىق شىعىندى ەر ادامنىڭ تۋىستارى تولىق وتەدى. پەتروپاۆل قالالىق سوتى الماتى تۇرعىنىن كىنالى دەپ تاۋىپ، 3 جىلعا باس بوستاندىعىنان ايىردى. جازانى سوتتالۋشى قىلمىستىق-اتقارۋ جۇيەسىنىڭ ورتاشا قاۋىپسىزدىك دەڭگەيدەگى مەكەمەسىندە وتەيدى.
«سوڭعى كەزدە كەڭ تارالعان ينتەرنەت الاياقتىقتىڭ تاعى ءبىر ءتۇرى – بانك قىزمەتكەرى بولىپ حابارلاسۋ. اڭگىمە بارىسىندا ولار حابارلاسقان ادامىنىڭ بارلىق جەكە قۇپيا مالىمەتتەرىن بىلۋگە جانە ونىڭ اتىنا ۇلكەم سومادا نەسيە راسىمدەۋگە تىرىسادى. الاياقتاردىڭ ءبىر عانا ماقساتى بار – الداۋ ارقىلى اقشاعا قول جەتكىزۋ. ولار حابارلاسقان كەزدە اسا ءدىنشىل بولىپ كورىنگىسى كەلەدى، پسيحولوگيانى جاقسى مەڭگەرگەن، تەز ءتىل تابىسادى. سەزىمگە اسەر ەتىپ، قاجەت بولسا قورقىتادى دا. سوندىقتان دا الاياقتاردىڭ قۇرىعىنا ءتۇسىپ قالماۋ ءۇشىن قىراعىلىق تانىتۋ كەرەك. بىلمەيتىن ادامدارعا جەكە مالىمەتتەردى بەرمەگەن ءجون»، - دەيدى پەتروپاۆل قالالىق سوتىنىڭ ءتوراعاسى.