الماتى پوليسياسى ءىرى ەسىرتكى زەرتحاناسىن جويدى

سينتەتيكالىق ەسىرتكى شىعاراتىن سەح "قالقامان" شاعىناۋدانىنداعى جەكە ءۇيدىڭ جەرتولەسىندە جۇمىس ىستەگەن.

بەلگىلى بولعانداي، ءۇي وتكەن جىلدىڭ قازان ايىندا جاس جىگىتكە جالعا بەرىلگەن، دەپ حابارلايدى Almaty-akshamy.kz Polisia.kz-كە سىلتەمە جاساپ. 

«ءتىنتۋ كەزىندە پوليسيا قىزمەتكەرلەرى مەفەدرون سينتەتيكالىق پسيحوتروپتىق زاتىن ءوندىرۋ كەزىندە قىلمىسكەرلەر پايدالانعان ۇنتاق جانە كەسەك تۇرىندەگى زاتتاردى، حيميالىق زاتتار سالىنعان پلاستيك ىدىستاردى، سۇيىقتىقتارى بار كولبالاردى، ەلەكتروندى تارازىلاردى جانە باسقا دا قۇرالداردى تاركىلەدى. ەسىرتكى شىعارۋعا جاۋاپتى – 23 جاستاعى و.ەسىمدى ازامات. تولىق ەمەس مەديسينالىق ءبىلىمى بار جاس جىگىت ەسىرتكى ءوندىرىسىن جولعا قويعان. بارلىعى ەسىرتكى زەرتحاناسىندا بىرنەشە كەلى كەپتىرىلگەن زاتتار تاركىلەندى. ولاردىڭ ءتۇسى ءارتۇرلى: اق، قارا، جاسىل، قوڭىر. ءبىر قاپتاما قوڭىر “ءشوپتىڭ” سالماعى شامامەن 160 گرامم، اق – 500. بۇل دايىن ءونىم جانە ونى دوزاعا ساي وراۋ كەرەك بولدى. جەرتولەدەن تابىلعان سۇيىق، كريستالدى جانە ۇنتاق كۇيىندەگى زاتتاردىڭ بارلىعى سوت-حيميالىق ساراپتاماعا جىبەرىلدى. سوتقا دەيىنگى تەرگەۋ باستالدى»، — دەدى الماتى قالالىق پد ەسىرتكى قىلمىسىنا قارسى كۇرەس باسقارماسىنىڭ باستىعى ەرلان الماعامبەتوۆ.