بانكنوتتاردا بەدەر تۋدىراتىن ارنايى ءمور بار.
ۇلتتىق بانك وكىلى بانكنوتتىڭ ءتۇسى انىق جانە كونتراستىلى بولۋى ءتيىس، سۋ تاڭباسى مەن نومينالدىڭ سيفرلىق بەينەسىن كورۋ ءۇشىن بانكنوتتى جارىققا باعىتتاپ كورۋ قاجەت ەكەنىن ايتتى، دەپ حابارلايدى Almaty-akshamy.kz
ونىڭ ايتۋىنشا،جالعان اقشا جاساۋشىلار 2000، 5000 جانە 10 000 تەڭگەلىك نومينالداردى كوپ جاسايدى.
«2022 جىلدىڭ ءى جارتىجىلدىعىندا قازاقستان ۇلتتىق بانكى مەن ەكىنشى دەڭگەيلى بانكتەر 408 150 تەڭگەنىڭ قولدان جاسالعان 139 اقشا بەلگىسىن (136 بانكنوت پەن 3 مونەتا) انىقتادى. بۇل 2021 جىلدىڭ وسى كەزەڭىمەن سالىستىرعاندا 41 پايىزعا از كورسەتكىش (340 جالعان اقشا بەلگىسى). جالعان بانكنوتتاردىڭ كوپ بولىگى الماتىدا - 68 دانا (جالپى كولەمنىڭ 51 پايىزى)، نۇر-سۇلتان قالاسىندا - 16 دانا جانە شىعىس قازاقستان وبلىسىندا 29 دانا انىقتالدى»، - دەلىنگەن حابارلامادا.
قازاقستان ۇلتتىق بانكىنىڭ وكىلى ءتۇپنۇسقا بانكنوتتاردى قولدان جاسالعان اقشادان اجىراتۋعا كومەكتەسەتىن قاراپايىم قاعيدالاردىڭ بار ەكەنىن ەسكە سالدى. بانكنوتتاردا بەدەر تۋدىراتىن ارنايى ءمور بار.
«سول سياقتى بارلىق بانكنوتتاردا كورۋ قابىلەتى ناشار ادامدارعا ارنالعان، قولمەن ۇستاعاندا جاقسى بىلىنەتىن دوڭەس ءتارىزدى جوعارى بەدەرلى ەلەمەنت تۇرىندەگى بەلگىلەر بار. بانكنوتتىڭ ءتۇسى انىق جانە كونتراستىلى بولۋعا ءتيىس، سۋ تاڭباسى مەن نومينالدىڭ سيفرلىق بەينەسىن كورۋ ءۇشىن بانكنوتتى جارىققا باعىتتاپ كورۋ قاجەت»، - دەپ تولىقتىردى.
بانكنوت بەتىندەگى جازۋلارى بار تۇتاس ءجىپ تارىزدەس، جارىقتا انىق كورىنەتىن جازۋلار بار ۇزىك سىزىق تۇرىندەگى تۇتاس ماگنيتتىك جانە سۇڭگۋىر جىپكە دە نازار اۋدارعان ءجون.
«نومينالى 1 000، 2 000، 5 000، 10 000 جانە 20 000 تەڭگەلىك بانكنوتتاردا ءتۇرلى-تۇستى بوياۋمەن سالىنعان سۋرەت تۇرىندەگى بەينەلەر بار. بانكنوتتىڭ كولبەۋ بۇرىشى وزگەرگەن كەزدە بەينەلەردىڭ ءتۇسى جاسىلدان التىن تۇسكە دەيىن وزگەرەدى»، - دەدى ۇلتتىق بانك وكىلى.
