جالعان اقپارات – شىندىققا ساي كەلمەيتىن نە قامتىلعان فاكتىلەر بۇرمالانعان، دايەكسىز، نەگىزسىز جانە قوعام اراسىندا جالعان تۇسىنىك قالىپتاستىراتىن اقپاراتتار.
شاريعاتىمىزدا جالعان اقپارات تاراتۋ ادامگەرشىلىككە جات ءارى ۇلكەن كۇنا بولىپ تابىلادى، دەپ حابارلايدى aqshamnews.kz
ويتكەنى جالعان اقپارات تاراتۋ ادامدار اراسىنداعى سەنىم مەن دوستىقتى بۇزىپ، قوعامدا داۋ-داماي مەن ارازدىق تۋدىرىپ، بۇلىككە جول اشادى.
جالعان اقپارات تاراتۋدىڭ كۇنا ءارى ارام ەكەنى قۇراندا دا، پايعامبارىمىزدىڭ (وعان اللانىڭ سالاۋاتى مەن سالەمى بولسىن) حاديستەرىندە دە انىق ايتىلعان. اللا تاعالا قۇراندا: «سوندا سەندەر ونى تىلدەرىڭمەن تاراتىپ، اۋىزدارىڭمەن وزدەرىڭ ەش بىلمەيتىن نارسەنى ايتتىڭدار دا، ونى جەڭىل دەپ ەسەپتەدىڭدەر، ال ول – اللانىڭ الدىندا اسا زور (كۇنا)»، – دەگەن. پايعامبارىمىز (وعان اللانىڭ سالاۋاتى مەن سالەمى بولسىن) ءبىر حاديسىندە: «ءاربىر ەستىگەنىن ايتۋ كىسىگە كۇنا رەتىندە جەتكىلىكتى»، – دەگەن. سول سەبەپتى كەز كەلگەن حاباردى انىققانىعىنا جەتپەي تۇرىپ تاراتۋعا تىيىم سالىنادى.
اللا تاعالا قۇراندا: «ءوزىڭ ناقتى بىلمەيتىن نارسەنىڭ (مالىمەتتىڭ) سوڭىنا تۇسپە (ياعني بىلمەگەندى ءبىلدىم، كورمەگەندى كوردىم، ەستىمەگەندى ەستىدىم دەپ ايتپا). شىندىعىندا ادام بالاسى قۇلاق، كوز جانە جۇرەك سىندى دەنە مۇشەلەرىن قالاي باسقارىپقولدانعانىنا قاتىستى (اللانىڭ الدىندا) جاۋاپقا تارتىلادى»، – دەگەن. دەمەك جالعان اقپارات تاراتۋ – ادامگەرشىلىككە جات ءارى ۇلكەن كۇنا. شاريعاتىمىزدا جالعان اقپارات تاراتۋعا قاتاڭ تۇردە تىيىم سالىنادى. سول سەبەپتى مۇسىلمان ادام ەستىگەن حابارىنىڭ شىندىعىنا كوز جەتكىزبەستەن ونى بىرەۋگە ايتۋدان تىيىلۋى ءتيىس.