ايىپپۇل مولشەرى 16 ملن تەڭگە شاماسىندا بولماق.
جىل باسىنان بەرى وسىنداي ارەكەتى ءۇشىن قىلمىستىق جاۋاپكەرشىلىككە تارتىلعان 28 ادامنىڭ 8ء-ى باس بوستاندىعىنان ايىرىلدى، دەپ حابارلايدى Almaty-akshamy.kz
ولاردىڭ اراسىندا كامەلەت جاسىنا تولماعان بالالار، ءتىپتى 1-سىنىپ وقۋشىسى دا بار.
بيىل 111 ادام مەملەكەتتىك مەكەمە مەن كاسىپورىندارعا جارىلعىش زات قويىلدى دەپ قوڭىراۋ شالىپ، حات جىبەرگەن. ال پوليسەيلەر جالعان اقپارات ءۇشىن قىلمىستىق جاۋاپكەرشىلىك قاراستىرىلعانىن ەسكەرتەدى.
جالعان اقپارات تاراتۋشىلاردىڭ اراسىندا كامەلەت جاسىنا تولماعان بالالار، ءتىپتى 1-سىنىپ وقۋشىسى دا بار.
مامانداردىڭ ايتۋىنشا، جارىلعىش زات تۋرالى حابارلاما كوبىندە ەرىككەن، ءىشى پىسقان، ماس ادامداردان تۇسەدى. ولار مۇنداي قادامعا كەك الۋ، بۇزاقىلىق، مەكەمەنىڭ جۇمىسىنا كەدەرگى كەلتىرۋ، مەكتەپتەگى ساباقتى بولدىرماۋ جانە قۇقىق قورعاۋ ورگاندارىنىڭ جۇمىسىن تەكسەرۋ ءۇشىن بارادى ەكەن.
«سوڭعى 3 ايدا «بومبا قويىلدى» دەگەن اقپاراتتان سوڭ الماتى، اقتوبە، پاۆلودار وبلىسىنداعى مەكتەپتەردە ساباق ۋاقىتشا توقتاتىلدى. ءبىر جاعدايدا جالعان حابارلامانى كامەلەت جاسىنا تولماعان بالا بەرگەن. ونىڭ اتا-اناسىنا 10 ايلىق ەسەپتىك كورسەتكىش مولشەرىندە اكىمشىلىك ايىپپۇل سالىندى. وسىعان دەيىن بولعان بارلىق جاعدايدا جارىلعىش زاتتار تۋرالى اقپارات راستالعان ەمەس. ءبىزدىڭ ەسەپتەۋىمىزشە، وسىنداي جالعان شاقىرتۋ بويىنشا ءبىر رەت شىققاندا 200-300 مىڭ تەڭگەگە دەيىن جۇمسالادى. ال ءىرى كاسىپورىنداردىڭ جۇمىسى توقتاپ قالعاندا، ءار ساعات سايىن ميلليونداعان تەڭگە زيان كەلەدى»، - دەدى ءىىم ەكسترەميزمگە قارسى ءىس-قيمىل دەپارتامەنتى باسقارما باستىعىنىڭ ورىنباسارى الماس تالقانبايەۆ.
بۇل رەتتە ول جالعان اقپارات ءۇشىن 16 ميلليون تەڭگەگە دەيىن ايىپپۇل سالىناتىنىن ەسكەرتىپ وتىر. سونداي-اق مۇنداي قىلمىستىق ىسكە بارعانداردى 5 جىلعا باس بوستاندىعىنان ايىرۋ جازاسى دا قاراستىرىلعان.