اكسيا تالابى بويىنشا، بالالار 3 كەلى، ال ەرەسەكتەر 7 كەلى جاڭعاق جيناۋلارى ءتيىس.
ياعني، وسىنشا مولشەردە ەمەن جاڭعاعىن جيناعان ادامعا تەگىن بيلەت بەرىلەدى، دەپ حابارلايدى Almaty-akshamy.kz «حابار 24» cايتىنا سىلتەمە جاساپ.
بيىل ءىس-شارانىڭ تۇراقتى تۇردە ءوتىپ كەلە جاتقانىنا - 8 جىل. قازان ايىندا باستالىپ، ءبىر ايعا جالعاسادى. وعان قالانىڭ قاراپايىم تۇرعىندارىنان باستاپ، مەكەمەلەر مەن وقۋ ورىندارى دا قاتىسادى.
«وسىدان 3-4 جىل بۇرىن قالاداعى ءبىر بالاباقشا 160 كەلى جاڭعاق جيناپ الىپ كەلدى. كىشكەنتاي بۇلدىرشىندەر ساياباققا سەرۋەندەۋگە شىققاندا ءوز قولدارىمەن جيناعان. جوعارى وقۋ ورىندارىنىڭ ستۋدەنتتەرى جاقسى اتسالىسادى. ولار تەگىن بيلەتتەردى بالالار ۇيلەرىنە نەمەسە قارتتار ۇيىندەگى كىسىلەرگە بەرۋىمىزدى وتىنەدى»، - دەيدى الماتى حايۋاناتتار باعىنىڭ رەسمي وكىلى ءاقجامي راحيموۆا.
حايۋاناتتار باعىنىڭ قىزمەتكەرلەرى 2019 جىلى مۇنداعى جانۋارلاردىڭ قىس بويى جاڭعاق جەپ شىققاندىعىن ايتادى. سەبەبى سول كەزدە 4 توننادان استام ءونىم جينالعان. ازىرگە مۇنداي كورسەتكىش ءالى قايتالانباپتى. بىلتىر 3 توننادان اسىپتى.
«بۇل ەمەن جاڭعاعى نەگىزگى تاماقتىڭ ۇستىنەن قوسىمشا رەتىندە بەرىلىپ وتىرادى. ەمەن جاڭعاعىن قازاقتا شوشقا جاڭعاعى دەپ تە اتايدى. اتاۋى ايتىپ تۇرعانداي، بىزدەگى 2014 جىلدان باستاپ ءومىر ءسۇرىپ جاتقان جابايى قاباندار، بۇعى تۇقىمداستار، اقبوكەندەر دە جاڭعاق جەۋدى ۇيرەنە باستادى. ءبىز مالداردى قىسقى ۋاقىتقا كۇيلەرىن جاقسارتۋ ءۇشىن وسىنداي ءىس-شارالاردى جۇرگىزىپ وتىرمىز»، - دەيدى الماتى حايۋاناتتار باعىنىڭ ءبولىم مەڭگەرۋشىسى بالابەك ماقاتوۆ.
ودان وزگە كەرىك، مارال، ەشكى مەن قوي دا جاڭعاقتى ءسۇيسىنىپ جەيدى. مامانداردىڭ ايتۋىنشا، ونىڭ قۇرامى پايدالى زاتتارعا باي. سوندىقتان قىس كەزىندە ەشقانداي ارتىق بولمايدى. اكسيا 7 قاراشادا اياقتالادى. ءدال سول كۇن – حايۋاناتتار باعىنىڭ قۇرىلعان كۇنى. بيىل زووباققا – 85 جىل. ال، شاراعا بەلسەنە اتسالىسقاندارعا العىس حاتپەن قوسا باعالى سىيلىقتار دا تابىستالادى.